بۇدان بۇرىن حابارلاعانىمىزداي, بۇگىن, 22 قىركۇيەك, جەكسەنبى كۇنى قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ قىزىلوردا وبلىسىنا بۇگىن ءتۇس اۋا باستالعان جۇمىس ساپارى بيىلعى وقۋ جىلىندا اشىلعان «نازارباەۆ زياتكەرلىك مەكتەبىنىڭ» جۇمىسىمەن تانىسۋدان باستالدى. بۇل تۋرالى Egmenenews.kz ءتىلشىسى حابارلادى.
سىر وڭىرىندە بوي كوتەرگەن زاماناۋي ۇلگىدەگى 720 ورىندىق ءزاۋلىم عيماراتتىڭ ءوزى قالاعا ءوڭ بەرىپ تۇر دەسەك, ارتىق ايتپاعان ەدىك. ەلباسى اتىنداعى زياتكەرلىك مەكتەپكە وبلىستىڭ بارلىق ايماعىنان دارىندى, تالانتتى وقۋشىلار قابىلداندى. ساباق ءۇش تىلدە جۇرگىزىلەدى. العاشقى 7-9 سىنىپتا بەرىلەتىن ساباق ءبىلىم بەرۋ ورتالىعىنىڭ باعدارلاماسى اياسىندا بولسا, 9-11 سىنىپ وقۋشىلارى حالىقارالىق ستاندارتقا ساي وقىتىلادى. الىستان كەلىپ وقيتىن بالالارعا بارلىق جاعدايى جاسالعان. سونىڭ دالەلى رەتىندە 120 ورىندىق جاتاقحانانى ايتار ەدىك. قىزىلورداداعى «نازارباەۆ زياتكەرلىك مەكتەبى» حيميا جانە بيولوگيا ءپانى بويىنشا تەرەڭدەتىپ وقىتادى. سونىمەن قاتار, تاعى ءبىر ەرەكشەلىگى, رەتىندە ەكونوميكا, ەكولوگيا, قازاقستان زاماناۋي الەمدە اتتى ارنايى كابينەتتەر اشىلعان. مۇندا بالالار ءار سالا بويىنشا جان-جاقتى اقپارات الىپ, بىلىمدەرىن جەتىلدىرەدى. مەكتەپتە ءبىلىم الۋ ءۇشىن 4001 بالا ءوتىنىش بىلدىرگەن. ولاردىڭ اراسىنان سۇرىپتالىپ, 553 وقۋشى «نازارباەۆ زياتكەرلىك مەكتەبىنىڭ» وقۋشىسى اتانعان. ءتىپتى, مۇعالىمدەردىڭ ءوزى سىناق ارقىلى قابىلدانعان. سونىڭ ناتيجەسىندە 93 مۇعالىم بۇگىندە وقۋشىلارعا ءبىلىم بەرىپ جاتىر. ولاردىڭ ىشىندەگى 53 ۇستاز ءۇش دەڭگەيلى كونكۋرستىڭ ناتيجەسىندە قابىلدانعان. مۇنىڭ ءوزى تالاپتىڭ وتە كۇشتى ەكەنىن اڭعارتسا كەرەك.
– بىرىنشىدەن, ەلدەگى بالالاردىڭ بارلىعى تالانتتى, دارىندى ەمەس. ءومىردىڭ شىندىعى وسى عوي. سوندىقتان اتا-انالار بالالارى «نازارباەۆ زياتكەرلىك مەكتەبىنە» تۇسە الماي قالىپ جاتسا رەنجىمەۋى كەرەك. مۇندا تەك تالانتتى بالالار عانا ءبىلىم الادى. ەكىنشىدەن, بۇل وقۋ ورداسى وبلىستاعى قاي مەكتەپتىڭ قانداي دەڭگەيدە ەكەنىن كورسەتەدى. ويتكەنى, مۇندا تەك مىقتىلار عانا وقيدى. سوندىقتان مەكتەپتەردىڭ ءبىلىم ساپاسى انىقتالادى. ال وسى مەكتەپتى بىتىرگەن وقۋشىلار ءبىلىمىن ودان ءارى استاناداعى «نازارباەۆ ۋنيۆەرسيتەتىندە» جالعاستىرا الادى. بولاشاقتاعى ءبىلىمنىڭ ەڭ بيىك شىڭى بيولوگيا بولىپ سانالادى. سەبەبى, بيولوگيانىڭ ءوزى ماتەماتيكامەن جانە نانوتەحنولوگيامەن قاتار جۇرەدى. اشىلاتىن جاڭالىقتىڭ ءبارى وسى سالادا بولادى. سوندىقتان مەكتەپتىڭ بيولوگيا مەن حيميا ءپانىن تەرەڭدەتىپ وقىتۋى قۋانىشتى جاعداي,– دەدى ەلباسى.
نۇرسۇلتان ءابىش ۇلى بۇدان سوڭ «نازارباەۆ زياتكەرلىك مەكتەبىن» ارالاپ كوردى. اتقارىلىپ جاتقان جۇمىستار مەن وقۋشىلاردىڭ عىلىمدى يگەرۋى ءۇشىن جاسالعان جاعدايمەن تانىستى. ونان سوڭ ۇستازدار قاۋىمىمەن جولىعىپ, پىكىر الماستى.
«نازارباەۆ زياتكەرلىك مەكتەبىندە» ەلباسى ايماقتا ءبىلىم سالاسى بويىنشا اتقارىلىپ جاتقان شارۋالاردىڭ جايىمەن دە تانىستى. قىزىلوردا وبلىسىندا ءبىلىم سالاسىن دامىتۋعا ارنالعان 2013-2015 جىلدار ارالىعىنداعى «جول كارتاسى» ازىرلەندى. سونىڭ ارقاسىندا بيىل ءۇش اۋىسىمدا ءبىلىم بەرەتىن مەكتەپتەردىڭ ماسەلەسى تۇبەگەيلى شەشىلگەن. سونىمەن قاتار, اپاتتى جاعدايداعى مەكتەپتەردىڭ سانى ناقتىلانىپ, ولاردىڭ قۇجاتتارىن دايىنداۋ ءۇشىن ءتيىستى قاراجاتى بولىنگەن. سولايشا, 2014 جىلدىڭ سوڭىنا دەيىن اپاتتى جاعدايداعى مەكتەپتەردىڭ ماسەلەسى تولىعىمەن شەشىلمەك. «بالاپان» باعدارلاماسى بويىنشا دا اتقارىلىپ جاتقان جۇمىستار كوڭىل كونشىتەرلىكتەي. باعدارلاما بويىنشا 2020 جىلعا دەيىن بالالاردى تولىعىمەن بالاباقشامەن قامتۋ كوزدەلگەن. دەگەنمەن, قىزىلوردا وبلىسى 2015 جىلى بۇل تاپسىرمانى ورىنداپ قويماق. تاعى ءبىر ايتا كەتەتىن ماسەلە بار. بيىل كوپ بالالى جانە الەۋمەتتىك جاعىنان از قامتىلعان وتباسىلاردان شىققان تالانتتى بالالارعا وبلىس اكىمىنىڭ ارنايى 123 گرانتى بولىنگەن. بالالاردىڭ بارلىعى ايماققا قاجەتتى ماماندىق بويىنشا ءبىلىم الىپ جاتىر. ال وقۋىن اياقتاعاننان كەيىن 5 جىل شەڭبە رىندە وبلىستا ەڭبەك ەتەتىن بولادى. ءبىلىم سالاسىنداعى ۇلكەن جاڭالىقتىڭ ءبىرى دە وسى.
– مەكتەپتەردە ەكى اۋىسىمدا ءبىلىم بەرگەن دۇرىس. سەبەبى, عيمارات بوس تۇرماۋى كەرەك. وسى ۋاقىتقا دەيىن 700-دەن استام جاڭا مەكتەپ سالدىق. بىراق مىنا جاقتا اپاتتى جاعدايداعى مەكتەپتەردىڭ ماسەلەسى نازاردان تىس قالۋدا. سوندىقتان وسى اپاتتى جاعدايداعى مەكتەپتەر مەن ءۇش اۋىسىمدا ءبىلىم الاتىن وقۋ وشاقتارىنىڭ ماسەلەسىن جويۋ كەرەك. ال مەكتەپكە دەيىنگى تاربيە ەڭ نەگىزگى ماسەلە بولىپ قالا بەرمەك. قىزىلوردا وبلىسىندا بالالار بالاباقشامەن ءجۇز پايىز قامتىلىپ جاتسا, ول ۇلكەن تابىس,– دەدى نۇرسۇلتان ءابىش ۇلى.
وسىمەن مەملەكەت باسشىسىنىڭ قىزىلوردا وبلىسىنا جاساعان جۇمىس ساپارىنىڭ ءبىرىنشى كۇنى اياقتالدى. ال ەرتەڭ ەلباسى جاڭادان سالىنعان «مۇز ايدىنىڭ» قۇرىلىسىمەن تانىسىپ, «باستاۋ» بيزنەس ورتالىعىندا ءوڭىردىڭ زيالى قاۋىمىمەن كەزدەسەدى دەپ جوسپارلانىپ وتىر.
ەرجان بايتىلەس,
«ەگەمەن قازاقستان».
قىزىلوردا.
سۋرەتتەردى تۇسىرگەن الەكساندر كوچەرەششەنكو.
