بۇگىن, 22 قىركۇيەك, جەكسەنبى كۇنى استانانىڭ «بارىس» كومانداسى قۇرلىقتىق حوككەي ليگاسى چەمپيوناتىندا ەكاتەرينبۋرگتىڭ «ءاۆتوموبيليسىن» قابىلداپ, ونى 7:2 ەسەبىمەن تالقانداپ شىقتى. بۇل تۋرالى Egemennews.kz ءتىلشىسى حابارلادى.
بۇل كەزدەسۋدىڭ ءبىرىنشى كەزەڭىندە قارسىلاستار كىمنىڭ مىقتى ەكەنىن انىقتاي المادى. بىراق كەزدەسۋ قوناقتاردىڭ تەز العا شىعۋلارىمەن باستالدى. ولاردىڭ الەكساندر سترەلتسوۆ جانە توبياس ۆيللۋند ەسىمدى ەكى شابۋىلشىسى اري احونەن قورعاعان ءبىزدىڭ قاقپاعا ەكى شايبا سوعىپ كەتتى. سودان كەيىن ارادا 6 مينۋت وتكەندە, رومان ستارچەنكو ءبىر شايبانىڭ قارىمتاسىن قايتارا الدى. ال كەزەڭنىڭ سوڭىنا قاراي تالعات جايلاۋوۆ ەسەپتى تەڭەستىردى - 2:2. سودان كەيىن تەك قانا استانالىقتار قاقپا قۇلپىن بۇزۋمەن بولدى. كەلەسى كەەزڭ باستالعاندا 11 سەكۋند وتىسىمەن, نايدجەل دوۋس الاڭ يەلەرىن ماتچتا ءبىرىنشى رەت العا شىعاردى. وسى كەزەڭدە فەدور پوليششۋك تە كوزگە ءتۇسىپ, ەسەپتى 4:2 ەتتى.
ءۇشىنشى كەەزڭدە استانالىقتار جاۋاپسىز ءۇش شايبا ءتۇسىرىپ ۇلگەردى. ولاردى ميحايل راحمانوۆ, رومان ستارچەنكو جانە تالعات جايلاۋوۆ ءوز ەسەپتەرىنە جازدى. ءسويتىپ, ەسەپ 7:2-گە تياناقتادى.
«بارىس» وسىلايشا چەمپيوناتتاعى التىنشى جەڭىسىنە جەتتى. سونىمەن بىرگە كوماندا بىرىنشىلىكتەگى سوققان شايبالارى سانىن 40-قا تولتىرىپ, بۇل جونىنەن دە كوش باستادى.
استانالىقتار قازىر 18 ۇپايمەن بۇرىنعىسىنشا شىعىس كونفەرەنتسياسىندا توپ باستاپ كەلەدى.
دامير قوجامقۇل.
