قازاقستان حالقى اسسامبلەياسىنىڭ عىلىمي-ساراپشىلىق كەڭەسى ءتىل ماسەلەسىنە ەرەكشە نازار اۋداراتىن بولادى. بۇل تۋرالى Nur.kz ءتىلشىسى حابارلادى.
اقوردادا مەملەكەتتىك حاتشى مارات ءتاجيننىڭ قاتىسۋىمەن وتكەن قازاقستان حالقى اسسامبلەياسى عىلىمي-ساراپشىلىق كەڭەسىنىڭ كەڭەيتىلگەن وتىرىسى بارىسىندا جۋرناليستەرگە كەڭەس ءتورايىمى ايگۇل سادۋاقاسوۆا وسىلاي مالىمدەدى.
كەڭەس وتىرىسى «قازاقستان-2050» ستراتەگياسى اياسىنداعى قازاقستان حالقى اسسامبلەياسىنىڭ عىلىمي-ساراپشىلىق كەڭەسى مەن مەملەكەتتىك ورگانداردىڭ جاڭا عىلىمي-ساراپتامالىق جۇمىسىنداعى باسىم مىندەتتەرى جانە قازاقستان حالقى اسسامبلەياسىنىڭ 2020 جىلعا دەيىنگى دامۋ تۇجىرىمداماسى تاقىرىبىنا» ارنالدى.
شارا اياسىندا اتقارىلعان جۇمىستارعا توقتالعان كەڭەس ءتورايىمى, تەرمينولوگيا ءىسىن ءبىر جۇيەگە كەلتىرۋ ماسەلەسىنە ەرەكشە نازار اۋدارىلعانىن ايتتى. ونىڭ سوزىنە قاراعاندا, بۇل باعىتتا ون شاقتى عالىم جۇمىس ىستەپ, بىلتىرعى جىلى «قازاقستان رەسپۋبليكاسىنىڭ مەملەكەتتىك ەتنوساياسات يمپەراتيۆتەرى» اتتى مەملەكەتتىك قىزمەتشىلەرگە جانە ساراپشىلارعا ارنالعان باسپا ءونىمىن شىعارعان.
«عىلىمي- ساراپتامالىق كەڭەس قولعا العان تاعى ءبىر جوبا - «تاريح ءۇشىن تاعزىم» جوباسى. وسىناۋ ۇلكەن جوبانى 2009 جىلى اسسامبلەيا قولعا العان بولاتىن. سونىڭ ىشىندە دەپورتاتسياعا ۇشىراعان حالىقتار, ساياسي قۋعىنمەن كەلگەن ازاماتتاردىڭ ءومىرى تۋرالى دەرەك ىزدەپ, جيناپ, ۇرپاعىنان سۇحبات الىپ, ۇلكەن ەكى كىتاپ شىعاردىق. دەرەكتى فيلم دە تۇسىردىك», - دەيدى ا. سادۋاقاسوۆا. ونىڭ ايتۋىنشا, عىلىمي-ساراپتامالىق كەڭەس ءتىل ماسەلەسىنە دە ەرەكشە نازار اۋدارادى. اتاپ ايتقاندا, كەڭەس عالىمدارى, لينگۆيستەر مەملەكەتتىك ءتىلدى جەتىلدىرۋگە باعىتتالعان جوبالار ۇسىندى. «ولار قازىرگى تاڭدا جارىق كوردى, سونىڭ نەگىزىندە قازىر تىكەلەي پراكتيكالىق ۇسىنىستار دايىندالىپ جاتىر. سونىمەن قاتار ساياساتتانۋ عىلىمى دا نازارىمىزدا. ساياسي جۇيەنى جاڭعىرتۋ كەزەڭىندە قانداي وزگەرىستەر بولادى, قوعام وعان قالاي بەيىمدەلەدى, ساياسي جۇيەنىڭ ىشىندەگى اسسامبلەيانىڭ ءرولى جانە اتقاراتىن قىزمەتتەرىن انىقتاپ بەرگەن جۇمىستارىمىز بارشىلىق», - دەدى ا. سادۋاقاسوۆا.
ساكەن مايلىباي.
