ەلورداداعى نازارباەۆ ورتالىعىندا «ساقتاردىڭ التىن مۇراسى» اتتى كورمە اشىلدى.
ەلورداداعى نازارباەۆ ورتالىعىندا «ساقتاردىڭ التىن مۇراسى» اتتى كورمە اشىلدى.
كورمەنىڭ ەڭ باستى ءارى باعالى جادىگەرى – ەسىك قورعانىنان تابىلعان «التىن ادام». 1967-1970-جىلدارى الماتى ماڭىنداعى ەسىك قورعانىنان ارحەولوگ-عالىم كەمال اقىشەۆتىڭ باسقارۋىنداعى ەكسپەديتسيا جۇمىسىنىڭ ناتيجەسىندە تابىلعان «التىن ادام» سكيف-ساق ءداۋىرىنىڭ «اڭ ستيلىندەگى» تەحنولوگياسى جوعارى بۇيىمدار قاتارىنا جاتادى. بۇگىندە ول تاۋەلسىز قازاقستاننىڭ باستى سيمۆولدارىنىڭ ءبىرى. جاۋىنگەردىڭ كيىمىندە جولبارىس, بۇلان, قار بارىسى, جىلقى, بۇركىت ۇلگىسىمەن بەينەلەنگەن ءتورت مىڭنان استام التىن قاپتاما مەن پلاستينالار بار. بۇل سول داۋىردە سكيفتەردىڭ مەتالل وڭدەۋدىڭ قۇيما, سوعۋ, قالىپتاۋ, شەكىمە, بەدەرلەۋ جانە ويمالاۋ ادىستەرىن وتە جاقسى مەڭگەرگەنىن, ياعني, زەرگەرلىك ونەرىنىڭ بيىك دارەجەدە بولعانىن تانىتادى. ساق جاۋىنگەرىنىڭ التىن اشەكەيلەرى ب.ز.د V-ءىV عاسىرلارعا جاتادى. «التىن ادامنىڭ» كيىم ەلەمەنتتەرىنىڭ كوشىرمەسىن التىن جانە باعالى بۇيىمدار مەملەكەتتىك مۋزەيى ۇسىندى.
سونداي-اق, 1993 جىلى ءنوۆوسىبىر ارحەولوگتارى پازىرىق قورعانىنان ايەل مەن ەر ادامنىڭ مۋميالارىن تاپقان بولاتىن. وعان قوسا سول ماڭايدان بىرقاتار زاتتار تابىلعان. جادىگەرلەر التايلىق اڭ ستيلىندە دايىندالعان. پازىرىق الەمى ءبىزدى سول داۋىرگە ءتان سكيفتىك, ونىڭ ىشىندە التايلىق اڭ ستيلىمەن تانىستىرادى. وسى كۇنگە دەيىن امان جەتكەن تەڭدەسسىز جادىگەرلەر «ساقتاردىڭ التىن مۇراسى» كورمەسىنە قويىلدى.
كورمەگە بۇدان وزگە «مادەني مۇرا» مەملەكەتتىك باعدارلاماسى اياسىندا تابىلعان عاجايىپ ارتەفاكتىلەر قويىلدى. 2004 جىلى باعدارلاما جۇزەگە اسا باستاعان تۇستان باستاپ 40-تان استام ارحەولوگيالىق قازبا جۇمىستارى جۇرگىزىلگەن بولاتىن. ناتيجەسىندە قىزىل ۋىق عيباداتحاناسى مەن بەرەل قورىمىنان ب.ز.د. V-III عاسىر كەزەڭىنە جاتاتىن, ساق زامانىندا تەمىردەن جاسالعان بىرەگەي ارتەفاكتىلەر تابىلعان. سول زاتتار دا كەلۋشىلەردىڭ نازارىنا ۇسىنىلعان.
نازارباەۆ ورتالىعى ديرەكتورىنىڭ عىلىمي-گۋمانيتارلىق جۇمىس جونىندەگى ورىنباسارى ءلايلا ماحات پەن التىن جانە باعالى مەتالدار مەملەكەتتىك مۇراجايىنىڭ ديرەكتورى الماز نۇرازحان سالتاناتتى شارانىڭ جىبەك ءجىبىن كەستى. شاراعا مادەنيەت مينيسترلىگى مادەنيەت كوميتەتىنىڭ تاريحي-مادەني مۇرا باسقارماسىنىڭ باستىعى بولات مولداشەۆ, قر ۇلتتىق مۇراجايىنىڭ ديرەكتورى دارحان مىڭباي جانە جاپونيا, ءۇندىستان, رەسەي مەملەكەتتەرىنىڭ ەلشىلەرى مەن ەۋرووداق وكىلدەرى قاتىستى.
«ەگەمەن-اقپارات».
