2020 جىلى 1 مامىردا وزبەكستاننىڭ سىرداريا وبلىسى ساردوبا سۋ قويماسىنداعى دامبانىڭ ءبىر بولىگىن سۋ شايىپ كەتۋىنىڭ سالدارىنان جانە سۋ قويماسىندا دەڭگەيىن تومەندەتۋ ءۇشىن سۋدى اعىزۋ كەسىرىنەن قازاقستاننىڭ تۇركىستان وبلىسى ماقتاارال اۋدانىنداعى شەكارا ماڭى كوللەكتورلارى سۋعا تولىپ كەتكەن. كوللەكتورلارعا اققان سۋ كولەمى سەكۋندىنا 180 كۋبومەتردى قۇراعان, ال كوللەكتورلاردىڭ وتكىزگىشتىگى سەكۋندىنا 120 كۋبومەتردى قۇرايدى. سونىڭ سالدارىنان ماقتاارال اۋدانىندا بىرنەشە اۋىل سۋ استىندا قالدى. وڭىردە توتەنشە جاعداي جاريالاندى.
بۇگىنگى تاڭدا 14 ەلدى مەكەننەن 31 606 تۇرعىن ەۆاكۋاتسيالاندى. تۇرعىندارىنىڭ سانى 6 127 ادام بولاتىن 5 ەلدى مەكەن — جاڭا تۇرمىس, جەڭىس, فيردوۋسي, ورگەباس, دوستىق اۋىلدارى تولىعىمەن سۋ استىندا قالعان. 7 ەلدى مەكەننىڭ ءالى دە سۋ استىندا قالۋ قاۋپى بار, ال ەكى ەلدى مەكەندە — مىرزاكەنت جانە اقجولدا سۋ باسۋ قاۋپى سەيىلگەندىكتەن, تۇرعىندار ءوز ۇيلەرىنە ورالدى. 15 مىڭ ادام تۇراتىن مىرزاكەنت كەنتىندە سۋ باسۋ قاۋپىن بولدىرماۋ ءۇشىن اۋقىمدى جۇمىستار جۇرگىزىلدى.
2 مامىر كۇنى ماقتاارال اۋدانىندا شۇعىل تۇردە تەحنوگەندى سيپاتتاعى توتەنشە جاعداي جاريالانىپ, شۇعىل شتاب قۇرىلدى. اپاتتان قۇتقارۋ جۇمىستارىن جۇرگىزۋ ءۇشىن 986 ادام مەن 190 تەحنيكا تارتىلدى. سونىمەن قوسا, شىمكەنت قالاسىنان, قىزىلوردا جانە جامبىل وبلىستارىنان 30 موتوپومپ, سۋ جينايتىن سورعىلار الىندى. سونىمەن قاتار, ۇلتتىق گۆارديانىڭ اسكەري ءبولىمى 413 اسكەري قىزمەتكەر مەن 37 تەحنيكا جىبەردى. قوسىمشا الماتى قالاسىنداعى ۇلتتىق گۆارديانىڭ قۇتقارۋ باتالونىنان 320 اسكەري قىزمەتكەر مەن 26 تەحنيكا جەتكىزىلدى.
اتاكەنت جانە ماقتاارال كەنتتەرىنىڭ, جامبىل اۋىلدىق وكرۋگىنىڭ مەكتەپتەرىنىڭ بازاسىندا 14 ەۆاكۋاتسيالىق قابىلداۋ پۋنكتى ۇيىمداستىرىلدى, ولاردا بۇگىنگى تاڭدا 3 200 ادام ورنالاستىرىلعان. قالعان ادامدار تۋىسقاندارىن پانالاعان. ەۆاكۋاتسيالىق قابىلداۋ پۋنكتتەرى بارلىق قاجەتتى جابدىقتارمەن جاراقتالعان. كارانتينگە بايلانىستى جاعدايدى ەسكەرە وتىرىپ, 120 مەديتسينا قىزمەتكەرى كومەك كورسەتۋدە.
توتەنشە جاعداي سالدارىنان الدىن الا ەسەپتەۋلەر بويىنشا 845 تۇرعىن ءۇي, 3 مەكتەپ, 5 بالاباقشا, 4 مەديتسينا ۇيىمى, 1 مادەنيەت ءۇيى مەن 10 دۇكەن سۋ استىندا قالعان. سونىمەن قاتار جەڭىس اۋىلىنداعى كوپىر مەن رەسپۋبليكالىق جانە وبلىستىق ماڭىزى بار 54,7 كم اۆتوجول سۋ استىندا قالعان. بۇدان باسقا, 7 639 گەكتار ەگىس القابى زارداپ شەككەن. سونداي-اق سۋ باسقان اۋماقتاعى ءولىپ قالعان مال سانى ناقتىلاندى. بۇگىندە كەلتىرىلگەن زالالدى ەسەپتەۋ جالعاسىپ جاتىر.
اۋداندا ءتارتىپتى ساقتاۋ جانە سۋ استىندا قالعان ەلدى مەكەندەردەگى م ۇلىكتى قورعاۋ ءۇشىن 8 بلوكپوست قويىلعان. پوليتسيا دەپارتامەنتىنىڭ جەكە قۇرامىنىڭ 303 قىزمەتكەرى مەن 53 ارنايى تەحنيكا تارتىلعان.
نۇرلى جول, ورگەباس, ىرىستى, جانتاقساي ەلدى مەكەندەرىندە سۋ باسۋدى بولدىرماۋ ماقساتىندا بوگەتتەر سالىندى, فيردوۋسي ەلدى مەكەنىنىڭ ماڭىندا مىرزاكەنت باعىتىندا كوللەكتور ورنالاستىرىلدى. سونىمەن قاتار, ماقتاارال اۋدانىندا سۋدى جىلدام شىعارۋ ءۇشىن وزبەك تاراپى كانال قازدى.
«جالپى, ءبىز وزبەك ماماندارمەن تىعىز ارەكەتتەسىپ وتىرمىز. وزبەكستاندا جاعداي تۇراقتالدى. سوندىقتان ولار ءوز تەحنيكاسىمەن كەلىپ, ءبىزدىڭ كوللەكتورلاردى تازارتىپ بەرۋگە ءازىر», — دەدى ءو. شوكەەۆ.
سۋ استىندا قالعان ەلدى مەكەندەردەن سۋ كەتكەن سوڭ ارىس قالاسىنداعى توتەنشە جاعداي تاجىريبەسى بويىنشا ءار اۋلا ارالانىپ, ءار وتباسىنىڭ شەككەن زاردابى باعالانادى. ودان سوڭ كوميسسيا ۇيلەردىڭ قالاي قالپىنا كەلتىرىلەتىنىن شەشەدى. سونىمەن قاتار, ءاربىر زارداپ شەككەن وتباسىعا وتەماقى تولەۋ مۇمكىندىگى قاراستىرىلۋدا. ءو. شوكەەۆ ەگىس القاپتارى سۋ استىندا قالعان شارۋالاردىڭ شەككەن زالالىن وتەۋ قاجەتتىگىن دە اتاپ ايتتى.
ء«بىز ەۆاكۋاتسيالانعان تۇرعىندارمەن ءتۇسىندىرۋ جۇمىستارىن جۇرگىزىپ جاتىرمىز. حالىق بۇل جاعدايدا تۇسىنىستىك پەن سابىرلىق تانىتۋدا. وزبەكستاندا دا جاعداي قيىن. وندا 10 ەلدى مەكەن سۋ استىندا قالعان, 70 مىڭ ادام ەۆاكۋاتسيالانعان. ءبىز وسى قيىن جاعدايدان ورتاق كۇش-جىگەرىمىزبەن شىعۋ تۋرالى كەلىسىمگە كەلدىك», — دەپ تۇيىندەدى تۇركىستان وبلىسىنىڭ اكىمى.
