شىنىندا حالىق سانىن قانداستار كوشىنىڭ ەسەبىنەن كوبەيتە الامىز با؟ قازىردىڭ وزىندە ءبىر ميلليونداي قانداسىمىز الپاۋىت رەسەي حالىقتارىنىڭ اراسىنا ءىز-ءتۇزسىز ءسىڭىپ كەتەدى دەگەن قاۋىپ بار. ولاردىڭ ايتۋىنا قاراعاندا, ورىستانۋ قاۋپى بار جانە قانداستارىمىز ءارتۇرلى قىسپاق تا كورەدى ەكەن. ال رەسەي باسشىلىعى باسقا ەلدەردەگى ورىستاردى ءوز جەرىنە ۇلكەن جەڭىلدىكتەرمەن كوشىرىپ الۋعا بەلسەنە كىرىسكەنى بەلگىلى. ارينە, شەتەلدەن كەلگەن قانداستارىمىزدى ەڭ الدىمەن باسپانا ماسەلەسى الاڭداتادى. بۇل جاعدايدا ەكى جاققا دا ۇتىمدى جولى: قازاقستان جانە رەسەي تۇرعىندارى اراسىندا جەكە ءۇي نە پاتەرلەر ايىرباستاۋ ينتەرنەتتىك بازاسىن قۇرۋ دۇرىس بولار ەدى. سوندا ءىس العا باساتىنى ءسوزسىز. ول ءۇشىن ەكى ەل اراسىندا كەلىسىمشارت جاسالۋى ءتيىس. تاعى ءبىر ايتا كەتەر جايت, قانداستاردىڭ باسىم كوپشىلىگى وڭتۇستىك وڭىرلەرگە كوشىپ كەلۋدە. بۇل ارينە, تۇسىنىكتى, بىراق قانداستارىمىزدى سولتۇستىك ايماقتارعا ورنىقتىرۋعا دا زور كوڭىل ءبولىنۋى قاجەت. بۇل ماسەلەدە شاعىن قالالاردىڭ مۇمكىندىكتەرىن ءتيىمدى پايدالانۋ قاجەت. ونداي قالاشىقتار سانى ەلىمىزدە از ەمەس. سونداي-اق سولتۇستىك وبلىستاردا قانشاما اۋىلدار بوس قالعان.
تاعى ءبىر وي. سولتۇستىك وبلىستاردا قانداستارىمىز ۋاقىتشا تۇراتىن جاتاقحانالار سالۋ ءىسى قولعا الىنسا. جاتاقحانالار ەشقاشان ارتىق بولمايدى. جالپى العاندا قانداستاردىڭ حال-احۋالىن قاداعالاۋ, مۇڭ-مۇقتاجىنا كوڭىل اۋدارۋ, كومەك كورسەتۋ تەك ۇكىمەتتىڭ عانا ەمەس, بارشامىزدىڭ مىندەتىمىز.
ناقىپبەك سادۋاقاسوۆ,
زاڭگەر
