بيىل كارانتينگە بايلانىستى كوپشىلىك جينالۋعا بولمايتىندىقتان, نۇر سۇلتاندا «جەڭىس كۇنى» مەرەكەسى ونلاين اتاپ وتىلەدى. سوڭعى جىلدارى ۇلى وتان سوعىسى ارداگەرلەرىنىڭ ۇرپاقتارى باتىرلاردىڭ پورترەتىن ۇستاپ شەرۋگە شىعاتىن «جاۋجۇرەك پولكى» شاراسىنىڭ دا فورماتى وزگەردى. ەندى اكتسيا الەۋمەتتىك جەلى ارقىلى جاڭا فورماتتا جالعاساتىن بولادى.
«الەۋمەتتىك جەلى پايدالانۋشىلارى (فەيسبۋك الەۋمەتتىك جەلىسىندە) ەكىنشى دۇنيەجۇزىلىك سوعىستىڭ 75 جىلدىعىنا ارنالعان لوگوتيپى بار دايىن رامكانى قولدانا الادى. الەۋمەتتىك جەلىدەگى ءپروفيلدىڭ نەگىزگى سۋرەتىن (اۆاتارىن) بەزەندىرۋ ءۇشىن جۇكتەپ الۋعا بولادى», – دەيدى «جاۋجۇرەك پولك» اكتسياسىنىڭ نۇر-سۇلتانداعى ۇيلەستىرۋشىسى ايدا بايماقوۆا.
قاتىسۋشىلار جەڭىستىڭ 75 جىلدىعىنا وراي ارنايى جاسالعان ماسكانى ورناتۋى كەرەك (Facebook-تەگى جەكە پاراقشا - نەگىزگى فوتوسۋرەتتى شەرتۋ- رامكانى قوسۋ - NS Jenis75 ماسكاسىن تابۋ - ورناتۋ). مايداندا قايتىس بولعان نەمەسە سوعىسى كەزىندە ومىردەن وتكەن تۋىسقاندارى تۋرالى مالىمەتتەر, ارداگەر تۋرالى فوتو نەمەسە ۆيدەو حابارلامانى جۇكتەۋ قاجەت.
بارلىق اقپارات #جاۋجرەكپولكونلاين #نۇر-سۇلتان #ۇيدەبول #2020 حەشتەگتەرىمەن جاريالاناتىن بولادى. چەللەندج ءبىرىنشى بولىپ ەلوردا اكىمدىگىنىڭ رەسمي سايتىندا (astana.gov.kz) جاريالانادى. كەيىن بارلىق ماتەريالدار «استاناداعى 24/7» فەيسبۋك پاراقشاسىندا شىعاتىن بولادى. «جاۋجۇرەك پولك – 2020» ونلاين-چەللەندجىنىڭ نەگىزگى قاعيداسى – شاراعا ەرىكتى تۇردە قاتىسۋ جانە ونى ساياسي PR ءۇشىن پايدالانۋعا جول بەرمەۋ. اكتسيانىڭ ماقساتى – ارداگەرلەردى ءوز ۇرپاعى ۇمىتپاي ەسكە الۋ, وتباسىلىق قۇندىلىقتاردى ساقتاۋ. وسىعان بايلانىستى ەل باسشىلارى مەن كوشباسشىلارىنىڭ (تاريحي تۇلعالار تۋىستارى بولماسا) پورترەتتەرىن, سونداي-اق اكتسيانىڭ ماقساتتارىنا قاتىسى جوق باسقا تۇلعالاردىڭ پورترەتتەرىن پايدالانۋ ورىنسىز.
