گۇلمايرا قۋقاەۆا كوپ جىلداردان بەرى التىنسارين اۋدانىندا ەگىن شارۋاشىلىعىمەن اينالىسادى. 1800 گەكتار جەرى بار. ونىڭ 1300 گەكتارىنا بيداي ەگىپ, قالعانىن پارعا قالدىرىپ وتىرادى. بيداي ەگۋ ەسىگىڭنىڭ الدىنا باقشا ەگۋ ەمەس ەكەندىگىن ول وسى ىسپەن اينالىساتىن جولداسى ومىردەن قايتقاندا ءبىر-اق ءبىلدى.
گۇلمايرا قۋقاەۆا كوپ جىلداردان بەرى التىنسارين اۋدانىندا ەگىن شارۋاشىلىعىمەن اينالىسادى. 1800 گەكتار جەرى بار. ونىڭ 1300 گەكتارىنا بيداي ەگىپ, قالعانىن پارعا قالدىرىپ وتىرادى. بيداي ەگۋ ەسىگىڭنىڭ الدىنا باقشا ەگۋ ەمەس ەكەندىگىن ول وسى ىسپەن اينالىساتىن جولداسى ومىردەن قايتقاندا ءبىر-اق ءبىلدى.تەحنيكانىڭ قوسالقى بولشەكتەرى, جانار-جاعارماي, تىڭايتقىش, القاپتى ارام شوپتەن ارىلتۋ سەكىلدى جۇمىستار التى اي جاز وتىرعىزبايدى. ەڭبەگىنە اركىم دە قۇل شىعار, الايدا وسى جۇمىستاردىڭ بارلىعى دا قارجىسىز ورنىنا كەلمەيتىنىن بىلگەندە گۇلمايرانىڭ سالى سۋعا كەتەتىن. 2005 جىلى «التىن كومەك» نەسيە سەرىكتەستىگىنە مۇشە بولىپ كىردى. كىرۋ جارناسىنا قارجى تاۋىپ بەردى. سول جىلى وسى سەرىكتەستىك ديقاندىق جۇمىستى ءالى جەتە بىلمەيتىن, ءارى قارجىدان تاپشىلىق كورىپ وتىرعان گۇلمايرانى تىعىرىقتان الىپ شىقتى. سودان كەيىنگى جىلدارى وسى نەسيە سەرىكتەستىكتىڭ ارقاسىندا ول قارجىدان قيىندىق كورگەن ەمەس. وتكەن جىلى 9 ميلليون تەڭگە قارجى العان بولاتىن. الايدا, كوكتەن تامشى تامباي, قۇرعاقشىلىق بولدى دا, ديقانداردىڭ كەۋسەنىنە ەشتەڭە ىلىنبەدى. نەسيە سەرىكتەستىگى ديقانداردىڭ ابىرجۋىنا جول بەرگەن جوق, ولاردىڭ العان قارىزىن ءۇش جىل سوزىپ تولەۋگە كەلىستى. گۇلمايرا بەكسۇلتانقىزى باسقارىپ وتىرعان «قۋقاەۆ» شارۋا قوجالىعى دا بۇل جەڭىلدىكتى سەزىندى. بۇل شارۋانىڭ ەڭسە كوتەرۋىنە ۇلكەن كومەك بولدى.
– وسى نەسيەنىڭ ارقاسىندا تۇقىم الدىق. ەگىندى ۋاقىتىلى سەپتىك. ەندى بيىل ەگىننىڭ رەڭى جاقسى. ىلعال كوپ تۇسكەندىكتەن وراقتى كەش باستاعانبىز. قازىر بيدايدى جيناپ جاتىرمىز, گەكتارىنا 10-15 تسەنتنەردەن كەلىپ قالادى دەپ قۋانىپ وتىرمىز. استىقتى تولىق جيناپ بولعاننان كەيىن وسى 9 ميلليون نەسيەنىڭ بارلىعىن بيىل قايتىپ بەرەمىز دە, كەلەر جىلعا قايتادان الامىز, – دەيدى «قۋقاەۆ» شارۋا قوجالىعىنىڭ جەتەكشىسى گۇلمايرا قۋقاەۆا.
ماڭدايدىڭ تەرىن سىپىرىپ ەتكەن ەڭبەككە, جاقسى نيەتكە قولتىقتان دەمەپ جىبەرەر كومەك بولماسا ءىس قيىنعا سوعار ەدى. وسىنداي كەزدە «اگرارلىق نەسيە كورپوراتسياسى» اكتسيونەرلىك قوعامىنىڭ وتە قولايلى, بەيىم شارتى اۋىل شارۋاشىلىعى تاۋار وندىرۋشىلەرىنىڭ ادىمىن اشتى.
– ءبىزدىڭ اگرارلىق نەسيە كورپوراتسياسى نەسيەسىنىڭ ارتىقشىلىقتارى كوپ. الدىمەن ونىڭ ۇستەمە پايىزى باسقا قارجى ينستيتۋتتارى بەرگەن نەسيەگە قاراعاندا الدەقايدا تومەن. ەكىنشىدەن, اۋىل شارۋاشىلىعى تاۋارلارىن وندىرۋشىلەر نەسيەنى جىلىنا ەكى رەت قانا تولەيدى, ياعني استىعىن جيناپ بولعاننان كەيىن جانە جىلدىڭ باسىندا. بۇل ولار ءۇشىن وتە قولايلى. ءبىز نەسيە سەرىكتەستىكتەرى ارقىلى التى باعىت بويىنشا نەسيە بەرەمىز, – دەيدى «اگرارلىق نەسيە كورپوراتسياسى» اكتسيونەرلىك قوعامى قوستاناي وبلىسى بويىنشا فيليالىنىڭ ديرەكتورى ايبەك جۇماشەۆ.
فيليال وبلىستاعى نەسيە سەرىكتەستىكتەرىنە بيىل 1 ميلليارد 400 ميلليون تەڭگە نەسيە بەردى. ونى ءتورت جۇزدەن اسا شارۋاشىلىقتار الىپ, يگىلىگىن كورۋدە. ال وتكەن جىلى بەرىلگەن 1 ميلليارد 500 ميلليون تەڭگە نەسيەنىڭ 1 ميلليارد 300 ميلليون تەڭگەسىنىڭ قايتارۋ ۋاقىتى ءۇش جىل مەرزىمگە ۇزارتىلدى. «قايىر قىلساڭ, ءبۇتىن قىل» دەگەن دە وسى.
ءنازيرا جارىمبەتوۆا,
«ەگەمەن قازاقستان».
قوستاناي
