ءىسساپار بارىسىندا مينيستر «قورداي» جانە «قاراسۋ» كەدەن بەكەتتەرىنىڭ جۇمىسىمەن تانىستى. سونداي-اق, جامبىل وبلىسى اكىمىنىڭ ءبىرىنشى ورىنباسارى بەكبولات ورىنبەكوۆ پەن قورداي اۋدانىنىڭ اكىمى رۇستەم داۋلەتپەن بىرگە «قاراسۋ» كەدەن بەكەتىنە باردى. مۇندا شەكاراشىلار پۋنكتتىڭ قازىرگى الەۋەتى مەن جۇمىسى جايىندا مالىمەت بەردى. بۇل رەتتە اۋدان اكىمى رۇستەم داۋلەت مينيستر بەيبىت اتامقۇلوۆقا «قورداي» وتكىزۋ بەكەتىنىڭ كۇردەلى جوندەۋگە جابىلۋىنا بايلانىستى بۇل بەكەتكە ايتارلىقتاي كۇش تۇسكەنىن ەسكەرىپ, اۋدان اكىمدىگى تاراپىنان مۇندا بىرقاتار جاعدايدىڭ جاسالعانىن ايتتى. سونىمەن قاتار, ادامداردى وزگە پۋنكتتەرگە تاسىمالداۋ ماقساتىندا ارنايى كولىكتەر ۇيىمداستىرىلعانىن دا جەتكىزدى. مينيستر بەيبىت اتامقۇلوۆ الداعى ۋاقىتتا «قاراسۋ» كەدەن بەكەتىن كەڭەيتۋ جۇمىستارى بويىنشا شەكاراشىلاردىڭ ۇسىنىستارىن تىڭدادى. «بۇل بەكەت ەكى ەل اراسىندا ادامدار مەن كولىك قۇرالدارى كوپ وتەتىن پۋنكتەردىڭ ءبىرى بولعاندىقتان, حالىق ءۇشىن بارلىق جاعدايلار جاسالۋ قاجەت. ينتەرنەت جەلىسىنەن باستاپ, ەلەكتروندىق وتكىزۋ قۇرىلعىلارى, بەينەباقىلاۋ جۇيەسى, مەديتسينالىق پۋنكت, ءتىپتى قاجەت بولعان جاعدايدا شەكاراشىلارعا جاتاقحانا سالۋ ماسەلەسى دە قۇرىلىس جوسپارىنا ەنگىزىلۋى كەرەك», دەگەن مينتستر ءتيىستى مەكەمە باسشىلارىنا تاپسىرما بەردى.
بۇدان كەيىن مينيستر اعىمداعى جىلدىڭ ناۋرىز ايىنان باستاپ كۇردەلى جوندەۋ جۇمىستارى باستالعان «قورداي» وتكىزۋ پۋنكتىنىڭ قۇرىلىس بارىسىمەن دە تانىستى. بۇگىندە قۇرىلىس جۇمىستارى قىزۋ ءجۇرىپ جاتقان نىساننىڭ جاعدايىن باس مەردىگەر باياندادى. ال, مينيستر ناقتى مەرزىمدەرى مەن جۇزەگە اسىرۋ كەزەڭدەرى كەلىسىلگەن مەرزىم ىشىندە قۇرىلىس جۇمىستارىن ساپالى اياقتاۋ قاجەت ەكەندىگىن باسا ايتتى. "نەگىزىنەن «قورداي» وتكىزۋ-باقىلاۋ بەكەتى قازاقستان مەن قىرعىزستان ەلدەرى اراسىندا حالىق پەن كولىك اعىنى ەڭ كوپ شەكارالىق پۋنكت بولىپ سانالادى. تاۋلىگىنە بىرنەشە مىڭ ادام مەن اۆتوكولىكتەر وتەتىن ايماقتا جاز ايلارىندا جول ءجۇرۋشى ازاماتتار دا كوبەيەدى. سوندىقتان دا وسىنداي جاعدايلاردى ەسكەرىپ, اۋا جىلىتۋىمەن بىرىكتىرىلگەن اۋا جىلىتۋ جانە سالقىنداتۋ جۇيەلەرى جانە سىرتتان سورۋ جەلدەتۋ جۇيەلەرى مىندەتتى تۇردە بولۋى كەرەك» - دەدى مينيستر. سونىمەن قاتار, باس مەردىگەر مەن جاۋاپتى مەكەمە باسشىلارىنا تاپسىرما بەرىپ, بۇل ماسەلە اۋدان اكىمىنىڭ تىكەلەي باقىلاۋىندا بولاتىندىعىن جەتكىزدى.
جامبىل وبلىسى
