ازىرگە كارانتين كەزىندەگى اۋە تاسىمالىنا جاسالعان ەڭ ۇزاق شەشتەۋ وسى ەلدە تىركەلىپ وتىرعانىن شەتەلدىك باق جارىسا جازۋدا. وسى ورايدا بۇل جەكەمەنشىك كومپانيالار مەملەكەت مەنشىگىندەگى اۋە كەمەلەرىمەن باسەكەلەس ەكەنى انىقتالىپ وتىر. JetSMART اۋە كەمەسىنىڭ اتقارۋشى ديرەكتورى ەستۋاردو ورتيز جۋرناليستەرگە بەرگەن سۇحباتىندا جەكەمەنشىك ۇشاقتىڭ ەندى جۇمىسىن باستاعانىن, ولارعا شەكتەۋ قويۋ تۋرالى ەشكىم ەسكەرتىپ يا بولماسا بۇل ماسەلەنىڭ تالقىعا تۇسپەگەنىن ايتىپ, قىنجىلعان. ول سۇحباتىندا ەلدەگى اۋە-ساياحات يندۋسترياسى ءبىر مۇددە ءۇشىن جۇمىس جاساماي, باسەكەگە قابىلەتتى بولۋى كەرەك ەكەنىن دە ايتىپتى.
كارانتين كەزىندە تاقىر تايانعان اۋە كومپانيالارىنىڭ تەك ۇكىمەتكە يەك ارتپاي, باسقا جولداردى دا قاراستىرۋى كەرەكتىگىن ۇلىبريتانيانىڭ قارجى ءمينيسترى ريشي سۋناك بۇعان دەيىن دە ايتقان بولاتىن. ونىڭ سوزىنشە, مەملەكەتتىڭ قولداۋى ەڭ سوڭعى نۇسقا رەتىندە قارالۋى ءتيىس. ريشي سۋناك ءدال قازىرگى جاعدايدا كومپانيالارعا اكتسيونەرلەردەن اقشا جيناپ, «كۇنەلۋگە» كەڭەس بەرەدى.
نارىقتىڭ بالتالاساڭ بۇزىلمايتىن ءوز زاڭدىلىعى بار. ەشكىمگە تەگىننەن تەگىن كومەك كورسەتىلمەيدى. ءتىپتى, قازىرگى قىسىلتاياڭ كەزەڭدە دە ءار سالا ءوز قامىن كۇيىتتەپ الەك. وسى رەتتە فرانتسۋز بيلىگى Air France-KLM اۋە كومپانياسىنا كومەكتەسۋ ءۇشىن جالپى سوماسى 7 ملرد ەۋرونى قۇرايتىن ۇزاقمەرزىمدى ۋاقىتقا نەسيە بەردى. Air France-KLM باسشىلىعى بارلىق كەتەتىن شىعىنداردى ەكشەلەپ, سالىقتار مەن تولەمدەردى كەيىنگە قالدىرعاننىڭ وزىندە ءتىپتى, كەيبىر ۇشاقتاردى ەسەپتەن شىعارۋ مەرزىمىنە جەتپەستەن قولدانبايتىنىن, كەيبىر قىزمەتكەرلەردىڭ ەڭبەكاقىسىن قىسقارتۋ جوسپارلانىپ وتىرعانىن ايتادى. ءسويتىپ, الداعى ۋاقىتتا ۇنەمدەۋدىڭ بارلىق جولدارى قاراستىرىلاتىن جاڭا جوسپار قۇرىلماق.
