بۇكىلالەمدىك قاۋىمداستىقتىڭ بەدەلدى ءبىر مۇشەسىنە اينالعان قازاقستان بەتپە-بەت كەلىپ وتىرعان ىندەتپەن الەم ەلدەرىمەن تىزە قوسا وتىرىپ كۇرەسۋدە جانە نەگىزگى ۇستانىمى اتا زاڭىندا جازىلعانداي, «...ەڭ قىمبات قازىناسى – ادام جانە ادامنىڭ ءومىرى...» بولىپ وتىر. رەسپۋبليكا پرەزيدەنتى ق.توقاەۆتىڭ ەلىمىزدە توتەنشە جاعداي جاريالاۋى جانە ونى تاعى 11 مامىرعا دەيىن ۇزارتۋ تۋرالى شەشىمىنىڭ باستى ماقساتى دا – ادام ءومىرىن ساقتاۋ, ىندەتتىڭ جاپپاي تارالۋىنا جول بەرمەۋ.
جالپى, جوعارعى بيلىكتىڭ جوسپارلارى, قيمىل-قارەكەتتەرىنىڭ قوعام ءۇشىن قاشاندا, ال وسىنداي كۇردەلى كەزەڭدە اسىرەسە ماڭىزدى. پرەزيدەنت ق.توقاەۆتىڭ 27 ساۋىردە جاساعان مالىمدەمەسىندە ەلىمىزدەگى توتەنشە جاعدايعا بايلانىستى جانە مەملەكەتتىڭ داعدارىسقا قارسى جان-جاقتى ءىس-شارالارى ايقىن كورسەتىلىپ, بۇگىنگى قوعامدىق-الەۋمەتتىك, ەكونوميكالىق احۋال بارىنشا قامتىلعانى قالىڭ جۇرتشىلىقتىڭ كوڭىلىنەن شىقتى. «...قازىرگىدەي كۇردەلى كەزدە ءاربىر ازامات ءبىزدىڭ نازارىمىزدا بولادى. مەملەكەت ەشكىمدى قيىندىقتا قالدىرمايدى» دەدى پرەزيدەنت. ەلىمىزدىڭ تۇڭعىش پرەزيدەنتى – ەلباسى ن.نازارباەۆ تا 8 ساۋىردەگى جاريالانعان ماقالاسىندا, بىردە-ءبىر ادام, ەلىمىزدىڭ ەشبىر ازاماتى قامقورلىقسىز قالمايتىنىن اتاپ كورسەتكەن بولاتىن. مۇنىڭ ءوزى ادامدارعا سەنىم مەن كۇش-قۋات بەرەدى, ءوزىن قابىرعالى ەلدىڭ ازاماتى ەكەنىن سەزىنۋگە باستايدى جانە جاۋاپكەرشىلىگىن كۇشەيتەدى.
مالىمدەمەنىڭ ەرەكشە ءبىر مازمۇنىن – ەلىمىزدىڭ الداعى ومىرىنە, داعدارىستان كەيىنگى كەزەڭگە بايلانىستى كەشەندى جوسپارلار مەن شارالار ايقىندايدى. ء«بىز قازىردەن باستاپ داعدارىستان كەيىنگى كەزەڭگە دايىندالۋىمىز كەرەك. بۇل جونىندە ەلباسى قاۋىپسىزدىك كەڭەسىنىڭ 24 ساۋىردە وتكەن وتىرىسىندا ناقتى ايتتى. ۇكىمەت پەن ۇلتتىق بانك 11 مامىرعا دەيىن ەكونوميكالىق دامۋدى قالپىنا كەلتىرۋ جونىندەگى كەشەندى جوسپاردى دايىندايدى. وندا داعدارىستان زارداپ شەككەن سالالارعا قولداۋ كورسەتۋ شارالارى قامتىلادى» دەدى پرەزيدەنت ق.توقاەۆ. سونىمەن قاتار مەملەكەت باسشىسى, بۇگىندە ەلىمىز دامۋدىڭ جاڭا دەڭگەيىنە قادام باسىپ وتىرعانىن, ءبىز ەندى شىن مانىندە مۇلدە جاڭا جاعدايدا ءومىر سۇرەتىنىمىزدى, سوندىقتان دا ەكونوميكاعا جانە مەملەكەتتىك باسقارۋ جۇيەسىنە اۋقىمدى ءارى ماڭىزدى وزگەرىستەر قاجەتتىگىن ەرەكشە قاداپ ايتتى. بىزدىڭشە, بۇل – الداعى دامۋىمىزدىڭ ناقتى ءبىر شارتى.
ەكونوميكاعا جانە مەملەكەتتىك باسقارۋ جۇيەسىنە جاسالاتىن اۋقىمدى ءارى ماڭىزدى وزگەرىستەردى قابىلداي ءبىلۋ – قوعامنىڭ اسا سەرگەكتىگىن, جاڭا ءبىلىمىن, ىرگەلى مادەنيەتىن قاجەت ەتەدى. بۇل تۇستا مەيلىنشە جاسامپازدىق ءرول اتقارۋى ءتيىس ونەردىڭ دە دامۋى, رۋحاني اينالىمعا ءتۇسۋى, قوعاممەن كوممۋنيكاتسياسى باعىتىندا ءبىرتالاي ماڭىزدى وزگەرىستەر ءجۇرۋى مۇمكىن. سونىمەن قاتار ونەردى, كەيدە ءتىپتى ءومىردى وزىنشە پروەكتسيالايتىن باق پەن ەلەكتروندى باق جانە الەۋمەتتىك جەلىلەردە. ارينە ءبارىن ۋاقىت كورسەتەدى. قالاي دەگەندە دە الداعى كۇننەن تەك جاقسىلىق كۇتەتىن, ءار نارسەنى تۇبىنەن ويلايتىن, «سابىر ءتۇبى – سارى التىن دەيتىن» حالىقپىز. ەلدىڭ بىرلىگى مەن بەرەكەسى, جوعارعى بيلىك پەن قوعامنىڭ ءبىر ماقسات جولىندا جۇمىلا قارەكەت ەتۋى – جاقسىلىققا, جارقىن كۇندەرگە باستاسىن.
ءاليا بوپەجانوۆا,
قازاقستاننىڭ ەڭبەك سىڭىرگەن قايراتكەرى,
حالىقارالىق «الاش» ادەبي سىيلىعىنىڭ لاۋرەاتى
الماتى
