قوڭىر كۇزدە توتىدايىن تارانىپ, سۇڭقاردايىن سىلانىپ تۇرعىندارىنا ەرەكشە كوڭىل-كۇي, اسەم ءان, شات-شادىمان دۋمان سىيلايتىن كۇنگەيدەگى باس شاھار – الماتىنىڭ ءوز ءتول مەرەكەسى – قالا كۇنى جىل سايىن ۇلكەن ماحابباتپەن اتالىپ وتىلەدى. بيىل دا سولاي بولدى. بىراق, «بۇل ءان بۇرىنعى اننەن وزگەرەك» دەمەكشى, بيىلعى ءداستۇرلى مەرەكە تىپتەن ەرەكشە جاعدايدا تويلانىپ, ەرەكشە تارتۋلار جاسالدى.
قوڭىر كۇزدە توتىدايىن تارانىپ, سۇڭقاردايىن سىلانىپ تۇرعىندارىنا ەرەكشە كوڭىل-كۇي, اسەم ءان, شات-شادىمان دۋمان سىيلايتىن كۇنگەيدەگى باس شاھار – الماتىنىڭ ءوز ءتول مەرەكەسى – قالا كۇنى جىل سايىن ۇلكەن ماحابباتپەن اتالىپ وتىلەدى. بيىل دا سولاي بولدى. بىراق, «بۇل ءان بۇرىنعى اننەن وزگەرەك» دەمەكشى, بيىلعى ءداستۇرلى مەرەكە تىپتەن ەرەكشە جاعدايدا تويلانىپ, ەرەكشە تارتۋلار جاسالدى.
ارينە, بۇل ايتۋلى كۇنگە شاھار بيلىگى ەرتەرەك قامداندى. ءبىر اي بويى قالا جۇرتشىلىعى ارۋ الماتىنى انگە بولەپ, جىرعا قوسىپ, ءتىپتى قىلقالام شەبەرلەرى ءوز سۋرەتتەرىن ارنادى. «ارت بات فەست» ونەر فەستيۆالى ءتورتىنشى رەت شىمىلدىعىن ءتۇرىپ, شارادا وتاندىق, سونداي-اق, فرانتسيا, يتاليا, گەرمانيا, شۆەتسيا, رەسەي سىندى ەلدەردەن كەلگەن قىلقالام شەبەرلەرىنىڭ, سۋرەتشىلەردىڭ تۋىندىلارى كورەرمەن نازارىنا ۇسىنىلدى. «الماتى – ىڭكارىم مەنىڭ» رەترو فەستيۆالىندە شەتەلدەن كەلگەن جۇلدىزداردىڭ ونەرىن تاماشالاۋعا مۇمكىندىك تۋدى.
قالا تۇرعىندارى مەن قوناقتارى الماتى تۋرالى جاڭا اندەردى تەك «الماتىم – جۇرەگىمدە» بايقاۋىندا تىڭداي الدى. دۋماندى كەش 13 قىركۇيەك كۇنى كەشكىسىن رەسپۋبليكا سارايىنىڭ الدىنداعى اباي الاڭىندا ءوتتى. ءان دوداسىندا 13 ورىنداۋشى باقتارىن سىنادى. بيىل بەسىنشى رەت وتكىزىلىپ وتىرعان ءان فەستيۆالىندە قالا اكىمى احمەتجان ەسىموۆ ءسوز ءسويلەپ, بايقاۋدىڭ جوعارى دەڭگەيدە ءوتكەنىن, قازىلار القاسى مەن بايقاۋعا قاتىسۋشىلاردىڭ بارلىعى – كرەاتيۆتى جاستار ەكەنىن, «ەگەر مەنەن قاي ءان سىزگە قاتتى ۇنادى دەسە, بارلىعى دەر ەدىم» – دەپ, ونەرلى جاستارعا شىعارماشىلىق تابىس تىلەپ, گران-ءپريدى جەڭىپ العان ايكۇمىس بولەگەنگە اۆتوكولىكتىڭ كىلتىن تاپسىردى. ءبىرىنشى ورىندى ديانا شاراپوۆا, 2-ورىندى سالتانات باكاەۆا, 3-ورىندى انەل ارينوۆا يەلەندى.
قالا كۇنىنە ارنالعان ەڭ اۋقىمدى شارالار دەمالىس كۇندەرى ءوتتى. سەنبى كۇنى «تۇڭعىش پرەزيدەنت ساياباعىندا» «ەپپل فەست» الما فەستيۆالى ءوتىپ, بۇل شارادا شارۋا قوجالىقتارى 50 توننادان اسا ونىمدەرىن ۇسىندى. سونداي-اق, ەكىنشى حالىقارالىق تسيرك فەستيۆالى ۇيىمداستىرىلىپ, وعان الەمنىڭ 20 قالاسىنان كەلگەن ارتىستەر قاتىستى. شارا 22-ءشى قىركۇيەككە دەيىن جالعاسپاق. ال مەرەكەنىڭ باستى تارتۋى – «استانا» الاڭىندا بۇرىن-سوڭدى بولماعان «اڭىز» مۋلتيمەديالىق جانە پيروتەحنيكالىق شوۋ – 3D فورماتتى Mapping Show جارىق فەستيۆالى ەدى. ساعات كەشكى سەگىزدەن باستاپ الماتى اسپانى سان ءتۇرلى تۇسكە كومكەرىلىپ, قالا اجارىن اشا ءتۇستى.
– مەرەكەلىك عالامات وتشاشۋدى ۇيىمداستىرۋ ءۇشىن گوللانديا مەن بولگاريادان مامانداردى شاقىردىق, – دەدى بۇل شارانى ۇيىمداستىرۋشى اندرەي سيزيكوۆ. – انيماتسيالىق شوۋدى كورسەتۋ ءۇشىن 5 مىڭنان اسا پيروتەحنيكالىق وتشاشۋ قولدانىلىپ, الماتى كوگىن ورنەكتەۋ شاراسى ەكى ساعاتقا سوزىلدى.
الماتى – تاۋەلسىزدىكتىڭ بەسىگى, ەگەمەندىگىمىزدىڭ بۋىنىن بەكىتكەن قالا. الماتى – ەلىمىزدىڭ ءىرى وندىرىستىك جانە قارجى ورتالىعى, ونەردىڭ ءتورى. الماتى – ءىرى عىلىم, مادەنيەت جانە ءبىلىم ورتالىعى. الماتىنىڭ تابيعات سۇلۋلىعىنا تامسانبايتىندار كەمدە كەم. ەلىمىزگە ايرىقشا ايبار بەرەتىن, ماقتان تۇتاتىن باستى قۇندىلىقتار دا وسى ارۋ قالادا ورنالاسقان. قازىرگى تاڭدا قالادا 2 ميلليونعا جۋىق حالىق تۇرادى, كۇن سايىن 175 مىڭ وقۋشى مەكتەپكە بارىپ, 230 مىڭنان استام ستۋدەنت جوعارى وقۋ ورىندارىندا ءبىلىم الادى. سوڭعى جىلدارى مەگاپوليس تۇرعىندارى مەن قالا قوناقتارىنىڭ سپورتتىق شاراعا, سالاماتتى ءومىر سۇرۋدە بەلسەندىلىكتەرى ارتا تۇسۋدە. وعان دالەل, قالا كۇنىنە ارنالعان ۆەلوجۇگىرۋگە الماتىدا 4000-نان استام ادام قاتىسۋى.
– ۆەلوجۇگىرۋدە بۇگىنگىدەي ادامدار بۇرىن-سوڭدى بولعان ەمەس. بۇل الماتىلىقتاردىڭ سالاماتتى ءومىر سالتىنا شىنداپ دەن قويعاندىعىن بىلدىرەدى, – دەدى جەڭىمپازدارعا ەسكەرتكىش سىيلىقتار تابىس ەتكەن قالا اكىمى احمەتجان ەسىموۆ.
ال, كەشكىسىن ءدۇبىرلى دۋمان ورتالىق ستاديوندا جالعاستى. مۇندا وتاندىق ەسترادا جۇلدىزدارى – «ەما 2013» مۋزىكالىق بايقاۋىنىڭ جەڭىمپازدارىنا ارنايى مۇسىنشەلەر تابىستالدى.
گۇلزەينەپ سادىرقىزى,
«ەگەمەن قازاقستان».
سۋرەتتى تۇسىرگەن
بەرسىنبەك سارسەنوۆ.
