2010 جىلى حالىقارالىق تسيرك قاۋىمداستىعى موناكو حانشايىمى ستەفانيانىڭ دەمەۋشىلىگىمەن, ءساۋىر ايىنىڭ ءۇشىنشى سەنبىسىن تسيرك كۇنى ەتىپ سالتاناتتى تۇردە مەرەكەلىك رۋحپەن وتكىزەيىك, سول ارقىلى تسيرك قىزمەتكەرلەرىنىڭ كاسىپتىك ىنتىماعىن, دوستىق قارىم-قاتىناسىن ارتتىرايىق دەگەن نيەتپەن باستاما كوتەرەدى. سودان بەرى بۇل كۇن حالىقارالىق تسيرك كۇنى رەتىندە اتالىپ كەلەدى. اقپارات الماسۋ, فەستيۆالدىك شارالار, جاڭا تسيرك ۇجىمدارىنىڭ ۇيىمداسۋىنا قولداۋ كورسەتۋ, ءوزارا قارىم-قاتىناس شىعارماشىلىق يەلەرىنە تىڭ سەرپىن بەردى.
قاۋىمداستىق ماسكەۋدە وتەتىن ءداستۇرلى «يدول», نۇر-سۇلتان قالاسىندا وتەتىن «ازيا جاڭعىرىعى» فەستيۆالدارىنا بەلسەنە قاتىسىپ, تسيرك ونەرىنىڭ جالپى دەڭگەيىن, رەكوردتىق جەتىستىكتەرىن سارالاپ, مونتە-كارلودا وتەتىن فەستيۆالگە شاقىرىپ, شىعارماشىلىقتى ىنتالاندىرىپ وتىرادى. بۇل كۇندە موناكودا ورنالاسقان قاۋىمداستىقتان قۇتتىقتاۋلار كەلىپ جاتادى.
قۇرىلعانىنا نەبارى 8 جىل بولعان شىمكەنت-تسيرك ۇجىمى دا تەز ارادا كاسىپتىك شەبەرلىكتەرىن شىڭداپ, مارتەبەلى بايقاۋلاردا بيىكتەن كورىنە ءبىلدى. وسىلايشا قاۋىمداستىقتىڭ مۇشەسى رەتىندە ءوز ورنىن ايقىندادى.
50 جىلدىق تاريحى بار قازاق مەملەكەتتىك تسيركىنىڭ (رەسپۋبليكادا 3 عانا كاسىپتىك تسيرك بار) قۇرامداس ءبىر بولىگى بولىپ تانىلاتىن ۇجىم اكروباتتار مەن گيمناستاردىڭ, جونگلەرلىك, ۆولتيج, ەكستسەنتريكا, يلليۋزيا ونەرىنىڭ شەبەرلەرىن دايىنداپ, كەزەڭ-كەزەڭىمەن جاڭا قويىلىمدار دايىنداپ, كورەرمەنىن تاڭعالدىرىپ كەلەدى.
اتاپ ايتار بولساق, كەرمەلى ارقاندا ەركىن ءجۇرىپ ونەر كورسەتەتىن اعايىندى سۇرانشيەۆتەر, كەرەمەت ەپتىلىك پەن ەرجۇرەكتىلىكتى, تەپە-تەڭدىكتىڭ جوعارى نۇسقاسىن تالاپ ەتەتىن «سەمافور» اتتراكتسيونىنداعى حاس شەبەرلەر مەگاپوليس تۇرعىندارىن تاڭعالدىرۋدان شارشاعان ەمەس.
تسيرك ونەرىندەگى ۇلتتىق بوياۋى قانىق ق.دۇيسەقۇلوۆتىڭ جەتەكشىلىگىندەگى شاباندوزدار توبىنىڭ, قازاق قىزدارىنىڭ ىشىندە بۇگىنگى تاڭدا توپ جارىپ, جەكە دارا جىرتقىش اڭدارمەن ونەر كورسەتەتىن درەسسۋرا شەبەرى ج.قالمەتوۆانىڭ تاۋەكەلى دە كورەرمەندى شاپالاق سوقتىرىپ, دەلەبەسىن قوزدىرىپ-اق كەلەدى. ال ە.تاڭاتوۆ, ءا.ابدرازاقتىڭ كوڭىلدى ازىلدەرمەن كومكەرىلگەن كلوۋندىق ويىندارى كىشكەنتاي كورەرمەننىڭ قيالىن اسپانداتىپ, الىسقا جەتەلەي تۇسۋدە.
2019 جىلعى «ازيا جاڭعىرىعى» فەستيۆالىنىڭ قوس جۇلدەگەرى «بايقوڭىر» جانە «سەرىپپەلى تاقتايلار» قويىلىمدارى تەك شىمكەنت تسيركىنىڭ عانا ەمەس, ۇلتتىق تسيركىمىزدىڭ التىن قورىنا كىرگەن دۇنيەلەر دەسەك ارتىق بولماس. وسى 8 جىل ىشىندە شىمكەنت-تسيرك ارتىستەرى نۇر-سۇلتان, كوكشەتاۋ, قىزىلوردا, تاراز, تۇركىستان سىندى ەلىمىزدىڭ بىرقاتار قالالارىندا بولىپ, تاۋەكەلى باسىم ونەرگە سۋساعان كورەرمەنگە ءوز قويىلىمدارىن كورسەتتى. سونداي-اق شىمكەنت-تسيرك تولىققاندى ويىن باعدارلامالارىن شاپيتو نۇسقاسىمەن كوپتەگەن اۋدان ورتالىقتارى مەن قالالاردا كورسەتۋدى داستۇرگە اينالدىردى.
ونەردىڭ بيىك مۇراتتارىنا بەرىك ۇجىم اتىنان بارشا وتاندىق ارىپتەستەرىمىزدى ءتول مەرەكەسىمەن قۇتتىقتايمىز. قويىلىمدارىمىزدى اسىعا كۇتكەن پاتشا كوڭىل كورەرمەندەرىمىزدى الەمدى الەككە سالعان كوروناۆيرۋس ىندەتىنەن قۇتىلعان شۋاقتى كۇندەردە كورۋگە اسىعامىز.
ارمان ءاليحان,
«شىمكەنت-تسيرك» مەملەكەتتىك كوممۋنالدىق قازىنالىق كاسىپورنىنىڭ ديرەكتورى
