وبلىستىق كىتاپحانانىڭ ءبولىم مەڭگەرۋشىسى مارال تاجەنوۆانىڭ ايتۋىنشا, كىتاپحانا سايتىنداعى «ۆيرتۋالدى مۋزەي» جوباسى بەس بولىمنەن تۇرادى. ءبىرىنشى بولىمدە سوعىس تاقىرىبىنا ارنالعان كىتاپتار. وعان عالىمبەك جۇماتوۆ, بەكبولات حازىروۆ, سەرگەي گوربۋنوۆ, ەركىن مۇڭدىنوۆ سەكىلدى جەرگىلىكتى اقىن-جازۋشىلاردىڭ 40-قا جۋىق شىعارماسى سكانەرلى تۇردە كوشىرمەسىمەن ورنالاستىرىلعان. ەكىنشى بولىمگە سوعىس جىلدارىندا وڭىرىمىزدە تارالعان گازەتتەردىڭ ەلەكتروندى نۇسقالارى سالىنعان. ءۇشىنشى بولىمدە سوعىس تاريحى تۋرالى شەتەلدىك سايتتار مەن ينتەرنەت جۇيەسىندەگى ارحيۆتەردىڭ سىلتەمەلەرى كورسەتىلگەن. ءتورتىنشى بولىمنەن مايداننان كەلگەن حاتتاردى وقۋعا بولادى. سونداي-اق جەرگىلىكتى باتىرلار مەن سوعىس ارداگەرلەرىنىڭ ماراپات قاعازدارى, باسقا دا قۇجاتتارى بار. ال سوڭعى بولىمدە سوعىس جىلدارىندا تۇسىرىلگەن فوتولار توپتاستىرىلعان.
بىلتىر ومبى وبلىسىنداعى (رەسەي) ۆولونتەرلەردەن وڭىرىمىزدەگى شاقا اۋىلىندا تۋعان جاۋىنگەر بورانباي يسابەكوۆتىڭ «ەرلىگى ءۇشىن», «لەنينگرادتى قورعاعانى ءۇشىن» مەدالدارى ەستونيانىڭ تاللين قالاسىنان تابىلعاندىعى تۋرالى حابار كەلگەن. ۆولونتەرلەر بورانباي اتامىزدىڭ تالليندەگى باۋىرلاستار زيراتىنا جەرلەنگەنىن ايتقان. ەندى مىنە, ۇرپاقتارى مايدانگەر اكەلەرىنىڭ جەرلەنگەن جەرىنە بارىپ, تاعزىم ەتە الادى.
رەسەيلىك «مەموريال» سايتى جيناقتاعان دەرەكقورىنىڭ مالىمەتىنشە, جاۋىنگەر بورانباي يسابەكوۆ 1914 جىلى شوقتال اۋىلىندا تۋعان. اسكەر قاتارىنا لەبياجى اۋدانىنان شاقىرىلعان. 1078-ءىنشى اتقىشتار پولكى جاۋىنگەرلىك قۇرامىندا بولعان.
– مەن اكەم سوعىسقا كەتكەن سوڭ, 1942 جىلى دۇنيەگە كەلىپپىن. اكەمنىڭ سوڭىنان 1945 جىلى «قارا قاعاز» كەلدى. اتام-اجەم تىم بولماعاندا قاي جەردە جەرلەنگەنىن بىلسەك دەپ وتىراتىن. ء«بىر حابار بولىپ قالا ما؟» دەپ ءومىر بويى ۇزىلمەگەن ءۇمىتىمىز الدامادى, – دەيدى مايدانگەردىڭ قىزى بالشەكەر بورانبايقىزى.
ال شاقا اۋىلىنداعى ەسكەرتكىش تاقتادا بورانباي يسابەكوۆپەن بىرگە وسى وڭىردەن 300-دەي ازامات مايدانعا اتتانعانى جازىلعان.
ەندى كىتاپحانا ۇجىمى وبلىس ورتالىعىنداعى اسكەري داڭق مۋزەيىمەن جانە مەملەكەتتىك وبلىستىق ارحيۆپەن بىرگە جۇمىس جۇرگىزبەك. تسيفرلى جۇيەگە تۇسپەگەن حاتتار مەن قۇجاتتاردىڭ كوپشىلىگى سول مەكەمەلەردە ساقتاۋلى.
– ماقسات – ينتەرنەت كەڭىستىگىن پايدالاناتىن تۇرعىندارعا سوعىس جىلدارىنا قاتىستى ولكەتانۋ قۇجاتتارىن قولجەتىمدى ەتۋ. بۇل جوبانىڭ جالعاسۋىنا جەرگىلىكتى تۇرعىندار دا ۇلەستەرىن قوسا الادى. سوعىسقا قاتىسقان, حابارسىز كەتكەن اتالارىنىڭ جانە باسقا دا تۋىستارىنىڭ سۋرەتتەرى, باسقا دا قۇجاتتار ساقتالعان بولسا كىتاپحاناعا الىپ كەلۋگە بولادى. دەرەك كوزدەرىن تسيفرلى فورماتقا اينالدىرىپ, ينتەرنەت كەڭىستىگىندە ساقتاي الادى, – دەيدى مارال تاجەنوۆا.
سونىمەن قاتار اۋداندىق جانە اۋىلدىق كىتاپحانا قىزمەتكەرلەرىنە دە وسىنداي ۇسىنىس جولدانعان. ولار ءوز وڭىرلەرىنەن سوعىسقا قاتىستى تاريحي دۇنيەلەردى ىزدەيدى.
كىتاپحانا سايتىنداعى «ۆيرتۋالدى مۋزەي» جوباسى 9 مامىر كۇنى ارنايى تۇردە اشىلادى.
پاۆلودار وبلىسى
