ارينە, ەلدىڭ شەتى مەن جەلدىڭ وتىندە تۇراتىن تۇرعىندار اراسىندا ءبىردى ەكى ەتۋگە ۇمتىلىپ, ااك-ءتى ءتيىمدى تۇردە جۇمساۋدىڭ تەتىكتەرىن تابا بىلگەن تۇرمىسى تومەن وتباسىلار دا جەتكىلىكتى. اتاپ ايتقاندا, قوبدا اۋدانىندا وتكەن جىلدىڭ قورىتىندىسى بويىنشا 286 وتباسىنا 154 ميلليون تەڭگە كولەمىندە ااك تولەنگەن. مىنە, سونىڭ ىشىندە 196 وتباسى العان قارجىلاي كومەكتەرىنىڭ بىردە-ءبىر تەڭگەسىن شاشاۋ شىعارماي, ءوز كاسىپتەرىن اشۋعا جۇمساعان.
بۇل تۇرعىدا اۋىل اكىمدەرى تۇرعىنداردىڭ وزدەرىنە تيەسىلى ااك-ءتى ءتيىمدى تۇردە جۇمساي بىلۋىنە ۇيىتقى بولدى. ءسويتىپ جۇزدەگەن شاڭىراق شاعىن وتباسىلىق شارۋاشىلىقتىڭ نەگىزى قالانعان. تۇرمىسى كەدەيشىلىك شەگىنەن تومەن وتباسىلار ءىرى قارا مەن قوي-ەشكى سەكىلدى ۇساق مال جانە قاز, ۇيرەك, كۇركەتاۋىق قۇستارىن ساتىپ العان.
ايتالىق, از قامتىلعان كوپ بالالى وتباسى يەلەرى, ەرلى-زايىپتى مۇزداقباي جەتەگەنوۆ پەن دينارا شىنداۋىلوۆا 620 مىڭ تەڭگە كولەمىندەگى ااك قاراجاتىنا 1 باس ءىرى قارا جانە 10 باس ۇساق مال ساتىپ الىپ, جەكە قوسالقى شارۋاشىلىعىن قۇردى. بۇعان دەيىن دينارا نەگىزىنەن بەس بالانىڭ تاربيە كۇتىمىمەن اينالىسىپ كەلگەن ەكەن.
«الداعى ۋاقىتتا قوسالقى شارۋاشىلىعىمىزعا قارايلاسۋ ماعان قيىندىق كەلتىرمەيدى. ويتكەنى ۇل-قىزدارىمىز ءبىر-بىرىنە سۇيەنىش, تايانىش بولاتىنداي جاسقا جاقىنداپ, ءوسىپ كەلەدى», دەيدى د.شىنداۋىلوۆا. ال وتاعاسى اۋداندىق ءبىلىم بولىمىندە گاز قازاندىعىنىڭ وپەراتورى بولىپ جۇمىس ىستەيدى. جالاقىسىنىڭ مولشەرى بەس بالانى اسىراۋعا مۇمكىندىك بەرمەيدى. وسى ورايدا ولار وزدەرىنە مەملەكەت تاراپىنان اتاۋلى الەۋمەتتىك كومەك تاعايىندالعانىنا ءدان ريزا.
تاعى ءبىر تۇرمىسى تومەن وتباسى قايرات قايروش ۇلى مەن اينار سابىرقىزى تۋرالى ايتايىق. وتاعاسى «ەرسىن» جەكە كاسىپ يەلىگىندە قاراپايىم جۇمىسشى ەكەن. زايىبى اينار بالا كۇتىمىندە كورىنەدى. ولار ااك-ءتىڭ 750 مىڭ تەڭگە كولەمىندەگى قاراجاتىنا ءۇش سيىر ساتىپ الىپ, جەكە قوسالقى شارۋاشىلىعىن قۇرىپتى. قوبدا اۋدانىندا ەڭبەكقور, تاباندى, جۇمىس دەسە جانىن بەرەتىن جاندار قاتارى تەك مۇنىمەن شەكتەلمەيدى.
گرانت الىپ, جەكە كاسىپتەرىن اشقاندار ولاردىڭ قاتارىن تولىقتىرا تۇسۋدە. بۇل تىگىن, اياقكيىم جوندەۋ جانە جيھاز جيناۋ تسەحتارى, سونداي-اق ازىق-ت ۇلىك دۇكەندەرى. ءناسىبىن ادال ەڭبەك, ماڭداي تەرمەن ايىرىپ وتىرعان, ءوز وتباسىلارىن جەتكىلىكتى تابىسپەن قامتۋعا جول اشا بىلگەن تۇرمىسى تومەن وتباسىلار قۇرمەتكە لايىقتى. مەملەكەت تاراپىنان تاعايىندالعان ااك پەن گرانتتار تەك وسىنداي جاعدايدا تەككە كەتپەي, قايتارىم كوەففيتسيەنتىن كوتەرە الارى انىق.
–مۇنداي ساناتتاعى اتا-انالار ءوز كىندىگىنەن تاراعان پەرزەنتتەرىنە قۇرعاق ءسوز كۇيىندە ەمەس, ناقتى ءىس جۇزىندە ۇلگى-ونەگە كورسەتەدى. سونىمەن بىرگە وتباسى بيۋدجەتىن تولتىرۋ ءىسى دە شەشىمىن تابادى. ءبىزدىڭ باستى پارىزىمىزدىڭ ءبىرى – ءدال وسى ساناتتاعى شاڭىراق يەلەرىنە ۇدايى قولداۋ كورسەتۋ. كوڭىلگە ءبىر مەدەۋ تۇتارلىق جايت, اۋدانىمىزدا جاعدايىن جاقسارتۋعا ۇمتىلعان وتباسىلاردىڭ قاتارى جىل سايىن كوبەيىپ كەلەدى, – دەدى قوبدا اۋدانىنىڭ اكىمى مەيرامبەك شەرماعانبەت.
اقتوبە وبلىسى,
قوبدا اۋدانى
