وسىنداي سىن-قاتەرلى كەزەڭدە قوعامنىڭ اۋىزبىرشىلىگى مەن ىنتىماعى, سونداي-اق جوعارى ءتارتىبى داعدارىستان جەدەل ءارى ءتيىمدى شىعۋدىڭ باستى فاكتورىنا اينالدى. الەمدىك تاجىريبەگە ۇڭىلەتىن بولساق, قاتەرلى ىندەتتىڭ كەڭ ەتەك جايىپ تارالۋىنا جول بەرمەگەن كوپتەگەن شىعىس ازيا مەملەكەتتەرى, ەڭ بىرىنشىدەن, قوعامنىڭ جوعارى ازاماتتىق جاۋاپكەرشىلىگى مەن بەلسەندى قولداۋىنا ارقا سۇيەپ, ءتيىستى ءىس-شارالاردى ۇلتتىق دەڭگەيدە دەر كەزىندە جۇزەگە اسىرعان بولاتىن. مىنە, وسى تۇرعىدا ەلباسى ءوزىنىڭ ماقالاسىندا قازاقستان حالقىن سابىرعا, بايسالدىلىققا جانە ىنتىماققا ۇندەگەن بولاتىن. ويتكەنى مەملەكەت دەڭگەيىندەگى قابىلدانعان شارالاردىڭ ءتيىمدى ورىندالۋى قوعامنىڭ بەلسەندى قولداۋى مەن تىكەلەي قاتىسۋىنا بايلا-
نىستى.
سونداي-اق ەلباسى اتاپ وتكەندەي, وسى داعدارىسقا ەلىمىز تاۋەلسىزدىك جىلدارىندا ىسكە اسىرىلعان مەملەكەتتىك باعدارلامالار مەن باستامالارى ارقاسىندا مەيلىنشە دايىندالىپ, ءوزىنىڭ ەكونوميكالىق, ساياسي جانە الەۋمەتتىك تۇراقتىلىعىن ءتيىمدى قالىپاستىرعان بولاتىن.
«قازاقستان-2050» ستراتەگياسى, «ۇدەمەلى يندۋستريالىق-يننوۆاتسيالىق دامۋ» باعدارلاماسى, «بولاشاق» باعدارلاماسى سياقتى ستراتەگيالىق باستامالار وسىنىڭ دالەلى. وسىعان قوسا, ەلىمىزدە ۇزاق مەرزىمدى قارجىلىق تۇراقتىلىقتى قامتاماسىز ەتەتىن, مولشەرى 90 ملرد اقش دوللارىنا جەتەتىن ۇلتتىق قور مەن التىن-ۆاليۋتا رەزەرۆتەرى بار. وسىنىڭ بارلىعى ەلىمىزدىڭ قيىن-قىستاۋ كەزەڭنەن سۇرىنبەي ءوتۋدىڭ ماڭىزدى العىشارتتارى مەن كەپىلى بولىپ تابىلادى.
سوندىقتان قازىرگى تاڭدا ەڭ باستىسى, ەلىمىزدىڭ تۇتاستىعىن ساقتاپ, ءتۇرلى ارانداتۋشى اقپاراتقا الدانباي, مەملەكەت جۇزەگە اسىرىپ وتىرعان باعىت اياسىندا جۇمىلۋ.
ەرلان ماديەۆ,
تۇڭعىش پرەزيدەنت قورى جانىندىعى اەسي ساراپشىسى
