ساياسات • 09 ءساۋىر، 2020

ەل بولىپ ەڭسەرەمىز

33 رەتكورسەتىلدى

قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ «بىرلەسە بىلگەن ەل ءبارىن جەڭەدى» اتتى ماقالاسى وسىناۋ قيىن كەزەڭدە حالقىمىزعا قولداۋ بولدى دەپ بىلەمىن. ەلباسى وتانداستارىمىزدى بىرلىككە، سابىرعا شاقىرا وتىرىپ، ۇرەيگە بوي الدىرماۋعا، قايعىعا سالىنباۋعا ۇندەدى.

«ارينە قالىپتاسىپ وتىرعان جاعداي وڭاي ەمەس. بۇل – بۇكىل الەم مەملەكەتتەرىنە تۇسكەن زور اۋىرتپاشىلىق. ءبىز ونى وسىنداي سىن ساعاتتا سەپتىگىن تيگىزەتىن حالقىمىزدىڭ توزىمدىلىگى، ەرىك-جىگەرى جانە وزىنە دەگەن زور سەنىمى ارقاسىندا مىندەتتى تۇردە جەڭىپ شىعامىز. ول ءۇشىن بىزگە قاجەتتى نارسە – قارجى-قاراجات، ماتەريالدىق رەسۋرس، تەحنيكا، ازىق-ت ۇلىك – ءبارى بار. الاڭدايتىن، ابىرجيتىن ەش نەگىز جوق»، دەدى ن.نازارباەۆ.

مەن دە ۇرەيگە بەرىلۋگە ەش نەگىز جوق دەپ بىلەمىن. سەبەبى ەلىمىز ەگەمەندىك العالى بەرى جيناعان الەۋەتىمىز وسى سىننان وتۋگە تولىق مۇمكىندىك بەرەدى. ەڭ الدىمەن ۇلتتىق قورىمىزدى اتاپ ءوتۋ قاجەت. ولاي دەيتىنىم، COVID-19 ۆيرۋسىمەن كۇرەسۋگە جانە ەكونوميكالىق داعدارىستىڭ الدىن الۋعا ارنالعان شارالاردىڭ بارلىعى ەڭ الدىمەن قارجى ماسەلەسىنە كەلىپ تىرەلەدى. وسى شارالاردى ىسكە اسىرۋ كەزىندە دە ۇلتتىق قوردىڭ ۇلەسى مول بولماق. ەلباسى دا بۇل تۋرالى «بىزدە وسىنداي قيىندىق تۋعاندا ەشكىمگە الاقان جايماۋ ءۇشىن ۇرپاق قامى، ەل بولاشاعى ءۇشىن جيناقتالعان ۇلتتىق قور مەن التىن-ۆاليۋتا قورىندا 90 ميلليارد اقش دوللارى بار. رەتىمەن، ۇنەمدى پايدالانار بولساق، ول بۇگىن باسىمىزعا تۇسكەن تاعدىر مەن تاريح سىنىنان ەڭسەمىزدى تىك ۇستاپ وتۋىمىزگە مول مۇمكىندىك بەرەدى» دەپ ايرىقشا اتاپ ءوتتى. ەندەشە، الاڭداۋدىڭ، ۋايىمعا بەرىلۋدىڭ ءجونى جوق. ونىڭ ۇستىنە، ىندەتتىڭ الدىن الۋ ماقساتىندا ەلىمىزدە 10 ملرد اقش دوللارى ءبولىندى.

تاعى ءبىر ايتا كەتەرلىگى، جىل باسىندا 2020 جىلعا ارنالعان بيۋدجەتتى بەكىتكەن ەدىك. الايدا ورناعان قيىن جاعدايلارعا بايلانىستى وبلىستىق بيۋدجەتتەرگە تاعى دا قوسىمشا قاراجات ءبولىنىپ وتىر. وتكەن 90-جىلدارى وسىنداي قيىندىقتار ورناعان بولسا، كەرىسىنشە، بەكىتىلگەن بيۋدجەت كولەمى قىسقارتىلاتىن ەدى. الايدا بۇل جولى ءبارى كەرىسىنشە بولىپ وتىر. ياعني الەۋمەتتىك سالا سانالاتىن مەكتەپ، اۋرۋحانا، ەمحانا سىندى بىرقاتار نىساندار جوندەلىپ، كەيبىرى قايتادان سالىنادى. اۋىلدارعا سۋ قۇبىرى، ەلدى مەكەندەرگە گاز جەتكىزىلەدى. وسى شارالاردىڭ بارلىعى قيىن كەزەڭدى ەڭسەرۋگە جاقسى كومەك بولادى دەپ سەنەمىن.

دۇنيە ءجۇزىن شارلاعان ەپيدەميا مەن داعدارىستىڭ كەسىرى ەلىمىزدى اينالىپ وتپەسى بەلگىلى. دەسە دە، ەلباسى وسى قيىندىقتارمەن حالىق بولىپ كۇرەسۋىمىز قاجەت ەكەنىن العا تارتىپ وتىر. ەلىمىزدەگى اعا ۇرپاق پەن زيالى قاۋىم وكىلدەرىنە، جاس ۇرپاققا، كاسىپكەرلەرگە ءسوزىن ارناپ، ىزگى امالدار جاساۋعا ۇندەدى. سوعان قۇلاق ءتۇرۋىمىز قاجەت. «جۇمىلا كوتەرگەن جۇك جەڭىل» دەيدى حالقىمىز. بۇل زاۋالدى دا ەل بولىپ ەڭسەرەمىز دەپ سەنەمىن!

 

شاۆحات وتەمىسوۆ،

ءماجىلىس دەپۋتاتى

 

سوڭعى جاڭالىقتار

Covid-19: تاعى 3 ادام كوز جۇمدى

كوروناۆيرۋس • كەشە

Covid-19: 184 ادام جازىلىپ شىقتى

كوروناۆيرۋس • كەشە

نۇكتە فيلوسوفياسى

رۋحانيات • كەشە

ۇقساس جاڭالىقتار