ايماقتار • 09 ءساۋىر، 2020

باستى باسىمدىق – دەنساۋلىق ساقتاۋ سالاسىن دامىتۋ

11 رەتكورسەتىلدى

شىمكەنت ينۆەستورلار تۇستەنىپ، ينۆەستيتسيالىق جوبالار تالقىلايتىن قالاعا اينالدى. قۇتپان جىلىنىڭ قورىتىندىسى بويىنشا شۋاقتى شاھارعا 194،5 ملرد تەڭگە ينۆەستيتسيا تارتىلىپ، الەمنىڭ جەتەكشى كاسىپورىندارى ەلدىڭ تۇستىگىندەگى قوناقجاي قالاعا اعىلا ءتۇستى. ناتيجەسىندە، قالا اۋماعىندا شەتەلدىك ينۆەستورلاردىڭ قاتىسۋىمەن 2،5 ملرد اقش دوللارىن قۇرايتىن 15 ينۆەستيتسيالىق جوبا جۇزەگە اسىرىلدى.

ينۆەستيتسيا كوپتەپ سالىنسا...

بۇل ءبىرىنشى كەزەكتە وڭىردەگى بۇرىننان كەلە جاتقان الپاۋىت كاسىپورىنداردى ۇيقىسىنان وياتىپ، ءادىل باسەكەگە ىنتالاندىردى. وزعان ەلدەردىڭ وزىق تەحنولوگياسىن ەنگىزىپ، ەكونوميكانى ەسەلەي تۇسۋگە جىگەرلەندىردى.

ينۆەستيتسيا ءبىرىنشى كەزەكتە بيزنەسكە قولايلى ورتانى تاڭدايدى. كاسىپكەرلىككە ىڭعايلى ورتا ىزدەگەندەر اۋەلى بەيبىتشىلىك پەن كەلىسىم ۇيالاعان ەلدەردىڭ ەسىگىن قاعاتىنى تاعى بار. سەبەبى قوعامى تۇراقتى ەلدىڭ ەكونوميكاسىندا ءوسىم كوپ بولماق.

بىلتىر «Kazakh Invest» قولداۋىمەن ەلىمىزگە جالپى كولەمى 55 ميلليارد دوللارعا جۋىق 228 ينۆەستيتسيالىق جوبا تارتىلعان. شەتەلدىك الپاۋىتتار اگروونەركاسىپ، ماشيناجاساۋ، تاۋ-كەن مەتاللۋرگياسى، مۇناي-گاز حيميا­سى، كولىك-لوگيستيكا، جاڭعىرمالى ەنەرگەتيكا جانە قۇرىلىس يندۋستريا­سى سالا­لارىنا قارجى قۇيا باستاعان. توپ-ينۆەستور ەلدەردىڭ قاتارىندا ەلى­مىزگە ەۋروپالىق وداق مەملەكەتتەرى، اقش، رەسەي، تۇركيا، سينگاپۋر مەن قىتاي كوپتەپ ينۆەستيتسيا سالۋدا.

ال شەتەلدىكتەر قىزىعۋشىلىق تا­نىتقان سالالاردىڭ ىشىندە سوڭعى كەزدەرى اگروونەركاسىپ، مۇناي-گاز حيمياسى، قۇ­رىلىس يندۋسترياسى ءۇشىنشى مەگاپوليستە جاندانىپ كەلەدى.

جىل باسىندا شىمكەنت قالاسىنا ەۋروپالىق وداققا مۇشە مەملەكەتتەردىڭ قازاقستانداعى توتەنشە جانە وكىلەتتى ەلشىلەرى جۇمىس ساپارىمەن كەلگەن ەدى. جۇرگەن ورتاسىندا جاڭا مۇمكىندىكتەر ىزدەيتىن ەۋروپالىقتار وسى ساپاردا شاھاردىڭ ەكونوميكالىق جۇماق مەكەن، كاسىپكەرلىككە كەلىستى كەنت ەكەنىنە كوز جەتكىزىپ قايتتى.

ەۋرووداققا كىرەتىن 12 مەملەكەتتىڭ ەلشىلەرى اۋەلى قالاداعى ءدارى-دارمەك شىعاراتىن «حيمفارم» اق زاۋىتىنىڭ جۇمىسىمەن تانىستى. ادام كاپيتالىن باستى قۇندىلىق سانايتىن ەۋروپا ءۇشىن دەنساۋلىق ساقتاۋ سالاسىنىڭ الار ورنى وزگەشە. ەلشىلەر دە وسىنى ەسكەرىپ، قازاقستاندىق مەديتسينانىڭ دامۋ ەرەكشەلىگىن كوزبەن كورىپ، فارماتسەۆتيكا ءوندىرىسىنىڭ پەرسپەكتيۆالارى جايلى وي ءبولىستى.

ءيا، 7،5 مىڭ شارشى مەتر اۋماقتا ورنالاسقان «حيمفارم» اتى ايتىپ تۇر­عانداي، وتاندىق فارماتسەۆتيكانىڭ باسىندا تۇرعان جەتەكشى كاسىپورىن. وندا پەرورالدى، پارەنتەرالدى، ستەريلدى جانە ستەريلدى ەمەس دارىلىك پرەپاراتتار شىعارىلادى. ءدارى-دارمەكتەر ءتورت وندىرىستىك جەلىدە وندىرىلەدى. زاۋىتتا 251 ادام اۋىسىممەن اپتاسىنا 40 ساعات، ال زيان­دى ايماقتا ىستەيتىندەرى 36 ساعات ەڭبەك ەتەدى. وسىلايشا ءوندىرىستىڭ ءۇزىلىسسىز ءجۇرۋىن قامتاماسىز ەتۋدە.

«حيمفارم» تەك تمد اۋماعىندا عانا ەمەس، ەۋروپالىق جاڭا تەحنولوگيانى دا وندىرىستە كادەگە جاراتا ءبىلدى. ماسەلەن، ءدارى-دارمەكتەردى زالالسىزداندىرۋ ءۇشىن تازا بۋ جانە سۋدى تازالايتىن ەۋروپالىق زاماناۋي قوندىرعىلار قويىلعان.

ورتاشا ەسەپپەن ءار ەكى قوندىرعى ساعاتىنا ءتورت مىڭ ليتر سۋ تازالاپ، سونىمەن بىرگە ساعاتىنا 2،5 مىڭ كيلو تازا بۋ وندىرە الادى. تازا سۋ مەن بۋ وندىرىستىك جەلىلەردى، ارنايى كيىمدەردى، دايىن ونىمدەردى ستەريليزاتسيالاۋ ءۇشىن پايدالانىلادى. شەتەلدىك قوندىرعىلاردىڭ تەتىگىن تاۋىپ، كادەگە جاراتۋ ءۇشىن 30 ماماندى ارنايى وقىتىپتى. ءتىپتى جاب­دىقتاردىڭ ساپاسىن التى اي سايىن تەكسەرۋدەن وتكىزىپ تۇرادى ەكەن.

جۇمىس بار جەردە قاتاڭ ءتارتىپ بولۋى كەرەك دەپ ەسەپتەيدى وندىرىستىك مەكە­مەنىڭ جاۋاپتى وكىلدەرى. سوندىقتان تسەحتا وندىرىلگەن بارلىق ءدارى-دارمەكتىڭ جانە ونىڭ ىشىندەگى جارامسىز بولىپ شىققاندارىنىڭ تۇگەلىنىڭ ەسەبى قاتاڭ جۇرگىزىلەدى. ويتكەنى زاۋىتتا قۇرامىندا ەسىرتكىلىك زات بار مورفين، پروميدول، فەنتانيل سىندى انالگەتيكتەر دە شىعارىلادى. دارىلىك پرەپاراتتار قوراپقا سالىنىپ، قويماعا جىبەرىلمەس بۇرىن مامانداردىڭ ءجىتى باقىلاۋىنان وتەدى. قىزمەتكەرلەر ارنايى بولمەدە ساعاتتاپ وتىرىپ ءاربىر ءدارىنى كوزبەن تەكسەرەدى. وسىلايشا پرەپاراتتاردىڭ زاۋىتتان كەم-كەتىكسىز شىعۋىنا كوپ رەتتە وسى ءبولىمنىڭ ماماندارى جاۋاپتى بولادى.

«شىمكەنت قالاسىنداعى ءبىز كورگەن كاسىپورىن بارىمىزگە دە ۇلكەن اسەر قال­دىردى. قازاقستاندا وسىنداي زاماناۋي ءوندىرىس ورىندارىنىڭ بولۋى ەكونوميكانى ءارتاراپتاندىرۋ باعىتىندا اتقارىلعان ساياسي وزگەرىستەردىڭ ناتيجەسى دەپ بىلەمىز. ءيا، قازاق ەلى تابيعي قاز­با بايلىقتارعا وتە باي مەملەكەت. سون­دىقتان بولار، قازاقستان ءوندىرىس سالاسىندا ۇلكەن جەتىستىكتەرگە جەتۋدە. ەكونوميكالىق ءوسىم مەن تۇراقتىلىق شەتەلدىك ينۆەستورلاردى دا وسى ەلگە ينۆەستيتسيا سالۋعا قىزىقتىرىپ وتىر. اسىرەسە قازاقستاندا بالاما قۋات كوز­دەرىنىڭ وندىرىسىندە ءبىراز تابىستار بار. ءبىزدىڭ ويىمىزشا، ينۆەستورلارعا بۇل سالادا دا مۇمكىندىكتەر وتە كوپ»، دەيدى ەۋرووداقتىڭ قازاقستانداعى وكىلدىگىنىڭ باسشىسى سۆەن-ولوۆ كارلسسون.

 جاڭا ورتالىقتار اشىلۋدا

شىمكەنتتە سوڭعى جىلدارى مەديتسينا ينستيتۋتتارى كوپتەپ اشىلۋدا. قالادا ورنالاسقان ءىرى مەديتسينالىق جوعارى وقۋ ورىندارىنىڭ سۇرانىسى وسى قاجەتتىلىكتى تۋعىزعانداي. ناۋرىزدىڭ باسىندا ەلىمىزگە تانىمال رەپرودۋكتيۆتىك مەديتسينا ينستيتۋتى قالادا فيليالىن اشىپ، جۇمىسىن باستادى.

بۇگىندە شىر ەتكەن ءسابيدىڭ ۇنىنە زار قانشاما وتباسى بەدەۋلىك دەرتىنىڭ زاردابىن تارتىپ كەلەدى. مەگاپوليستە اشىلعان جوعارى رەپرودۋكتيۆتىك تەحنو­لوگيالار سالاسىنداعى سوڭعى جەتىس­تىكتەردىڭ كومەگىمەن بەدەۋلىكتى ەمدەۋگە ارنالعان جاڭا الەۋمەتتىك ماڭىزى بار نىسان قامكوڭىل جاندارعا كومەكتەسەرى انىق. بۇل وتاندىق دەنساۋلىق ساقتاۋ سالاسىنىڭ جەتىستىگى دەسەك ارتىق بولماس. كلينيكادا تيىمدىلىكتى بارىنشا ارتتىرۋ ماقساتىندا ايەلدەر مەن ەرلەر بەدەۋلىگىن ەمدەۋ قىزمەتىنىڭ تولىق اۋقىمى ۇسىنىلعان. مۇندا ەكو ءبولىمى، ادام گەنومىن تولىق زەرتتەۋگە ارنالعان گەنەتيكالىق زەرتحانا، ايەلدەر كەڭەسى، جەدەل گينەكولوگيا-لاپاروسكوپيالىق ورتالىق، جەدەل ەمدەۋمەن قوسا ەرلەر بەلسىزدىگىن ەمدەيتىن اندرولوگيا جا­نە ۋرولوگيا ءبولىمى بار. سونداي-اق وڭ­تۇستىك قازاقستان مەديتسينالىق اكادە­مياسىنىڭ ستۋدەنتتەرى مەن كۋرسانتتارىنا ارنالعان وقۋ بازاسى دا وسىندا ورنالاسقان. كلينيكا ءبىر اۋىسىمدا 250 ادامدى قابىلداي الادى. جىلىنا 3 مىڭ ەكو باعدارلاماسىن، 2 مىڭ لا­پاروسكوپيالىق وتا جاساۋعا مۇمكىندىگى بار. اتالعان ورتالىقتىڭ اشىلۋىنا رەپرودۋكتيۆتىك مەديتسينا ينستيتۋتى 1 ملرد 25 ملن تەڭگە ينۆەستيتسيا قۇيعان. الداعى ۋاقىتتا 150 ادامدى تۇراقتى جۇمىسپەن قامتۋ كوزدەلۋدە.

3

 

سوڭعى جاڭالىقتار

عاسىر زۇلماتى

قوعام • كەشە

قۇردىم (تورتتاعان)

ادەبيەت • كەشە

جاڭا فورماتتاعى جىر كەشى

رۋحانيات • كەشە

ۇقساس جاڭالىقتار