ايماقتار • 09 ءساۋىر، 2020

قورعاۋشىلارعا دا قولداۋ قاجەت

11 رەتكورسەتىلدى

كوروناۆيرۋس ىندەتىنە قارسى كۇش بىرىك­تىرمەسە ىرىق بەرمەيتىن ءتۇرى بار. اسىرەسە، قازىرگى ۋاقىتتا ومىرلەرىن قاۋىپ-قاتەرگە تىگىپ، اجداھا ىندەتپەن الىسىپ جۇرگەن دارى­گەر­لەرگە، سونان سوڭ كۇن-ءتۇن دەمەي قىزمەت ەتىپ ساپتا تۇرعان ءتارتىپ ساقشى­لارىنا قولداۋ اۋاداي قاجەت.

قاراعاندىدا وبلىستىڭ باس يمامى ومىرزاق بەكقوجانىڭ قولداۋىمەن «مانسۇر» تقكو جانە «اسپاپ» جك كاسىپورىندارى باستاما كوتەرىپ، سانيتارلىق بلوك-بەكەتتەردە قىزمەت ەتىپ جۇرگەن ەرلەرگە ىستىق تاماق جەتكىزدى.

وبلىستىڭ باس مولداسى بۇل شاراپاتتى مول شارۋانىڭ ماقتان، بولماسا جالعان بەدەل جيناۋ ءۇشىن جاسالماعانىنا باسا ءمان بەردى.

– ءبىر-ءبىرىمىزدى قولداپ، ءسوز كومەگىنەن دە، قول كومەگىنەن دە ايانىپ قالمايىق. قيىندىقتى بىرىك­كەندە عانا ەڭسەرە الامىز. وزدەرىڭىزدى ساقتا­ڭىزدار، كارانتين تالاپتارىن ورىنداڭىزدار! – دەدى ومىرزاق بەكقوجا.

قايىرىمدى كاسىپكەردىڭ ءبىرى قۋاندىق عاب­دۋاليەۆ دەگەن ازامات ەكەن. كەزىندە ءوزى دە ءتارتىپ ساقشىسى بولىپ قىزمەت ەتىپتى.

– بۇرىنعى ارىپتەستەرىمە قانداي جۋاپكەرشىلىك ارتىلعانىن جاقسى تۇسىنەمىن. وسى قيىن ساتتە ولارعا مورالدىق قولداۋ كورسەتىپ، قايسار مىنەز كورسەتىپ جۇرگەندەرى ءۇشىن العىس ايتقىمىز كەلەدى. كوروناۆيرۋستى دا جەڭەرمىز،  توتەنشە جاعداي مەن كارانتين دە اياقتالار. ۋاقىتپەن ساناسپاي جۇمىس ىستەپ جۇرگەن جەرلەستەرىم تەزىرەك شاڭىراقتارىنا ورالسىن دەپ تىلەيمىن! – دەيدى كاسىپكەر.

وكىنىشكە قاراي، قاراعاندى وبلىسىندا تاعى دا جەتى ادامنىڭ COVID-19 جۇقتىرعانى انىقتالدى. بۇلار بۇعان دەيىن كوروناۆيرۋسپەن اۋىرعان  جانە كارانتينگە جاتقىزىلعان ناۋقاستەرمەن ارالاس-قۇرالاس بولعان ادامدار. قازىرگى ۋاقىتتا ولاردىڭ بارلىعى ينفەكتسيالىق بوكستارعا وقشاۋلاندى  جانە ءتيىستى ەم-دوم الىپ جاتىر.

قاراعاندى وبلىسىندا كوروناۆيرۋس ينفەكتسياسىن جۇقتىرعانداردىڭ سانى 55-كە جەتتى. ءبىر ناۋقاس وسى دەرتتەن قايتىس بولدى.

 جالپى، قاراعاندى وبلىسىندا 1 440 ادام ءۇي كارانتينىندە وتىر. تاۋلىك بويى باقىلاۋعا الىنعان 908 تۇرعىن بار، ونىڭ ىشىندە 54-ءى ينفەكتسيالىق  بوكسقا جاتقىزىلعان. بۇلاردىڭ ءبارى 1ا جانە 1ب ساناتىنداعى ەلدەردەن ورالعان نەمەسە كوروناۆيرۋس جۇقتىرعان ادامدارمەن شارتتى تۇردە بايلانىستا بولعان ازاماتتار.

 

قاراعاندى وبلىسى

 

سوڭعى جاڭالىقتار

Covid-19: تاعى 3 ادام كوز جۇمدى

كوروناۆيرۋس • كەشە

Covid-19: 184 ادام جازىلىپ شىقتى

كوروناۆيرۋس • كەشە

نۇكتە فيلوسوفياسى

رۋحانيات • كەشە

ۇقساس جاڭالىقتار