قوعام • 08 ءساۋىر، 2020

Call-ورتالىقتاردىڭ جۇمىسى قىزۋ

9 رەتكورسەتىلدى

كەشە ەلورداداعى ورتالىق كوممۋنيكاتسيالار قىزمەتىندە توتەنشە جاعداي كەزىندەگى ينتەرنەت جەلىسى مەن ەلەكتروندى ۇكىمەت پورتالىنىڭ جۇمىس بارىسى تۋرالى ءباسپاسوز ءماسليحاتى ءوتتى.

تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترىنىڭ ورىنباسارى ابىلايحان وسپانوۆتىڭ ايتۋىنشا، حالىققا قىزمەت كور­سەتۋ ورتالىقتارى جابىل­عان­نان كەيىن ازاماتتارعا بار­لىق ماسەلە بويىنشا ۇزدىكسىز كە­ڭەس بەرىپ وتىرۋ ءۇشىن call-ورتالىقتارداعى قىز­مەتكەر­لەردىڭ قاتارى 200-دەن 2 مىڭعا كو­بەي­تىلىپتى. توتەنشە جاعداي جاريا­لانعانعا دەيىن 1414 نومەرى تاۋلىگىنە 25-30 مىڭ قوڭى­راۋ قابىلداسا، قا­زىر كۇن سايىن 600 مىڭنان اس­تام قوڭى­راۋ­عا جاۋاپ بەرەدى. ءسوي­تىپ بار­لى­عى 4 ملن-نان استام كەڭەس بە­رىلگەن.

– وسىعان دەيىن قاشىقتان 85 461 ەتسق (ەلەكتروندى تسيفرلى قولتاڭبا) بەرىلدى. جاقىندا زاڭدى تۇلعالارعا دا بەرۋدى ىسكە قوسىپ، 1 337 زاڭدى تۇلعا ەتسق-نى قاشىقتان الدى. مەملەكەت باس­شىسىنىڭ تاپسىرماسى شەڭ­بەرىندە مەملەكەتتىك قىز­مەت­كەرلەردىڭ 70 پايىزى قاشىق­تان جۇمىس ىستەي باستادى. 21 مەملەكەتتىك ورگان «بۇلتتى» قۇ­جات اينالىمىنا كوشتى. قازىر وسى جاڭا جۇيە بويىنشا 5،5 مىڭ مەملەكەتتىك قىزمەت­كەر جۇمىس ىستەپ جاتىر. ءبىز مەم­لە­كەتتىك ورگانداردىڭ قۇجات اينالىمىن جانە مەملەكەتتىك قىزمەت كورسەتۋ ءىسىن قاعازدان تولىق ارىلتۋ پروتسەسىن جال­عاس­تىرامىز، – دەدى ۆيتسە-مينيستر.

ا.وسپانوۆ 42 500 تەڭگە الەۋمەتتىك كومەك eGov.kz پورتالى، 42500.enbek.kz سايتى ارقىلى جانە 1414 نومىرىنەن SMS جىبەرۋمەن بەرىلەتىنىن، سونداي-اق اۆتوماتتى تۇردە تاعايىندالاتىنىن ايتتى.
@Help42500Bot تەلەگرام-بوت تا الەۋمەتتىك كومەككە ءوتىنىش بەرۋدى بارىنشا وڭايلاتۋ ءۇشىن اشىلدى.

– وتە ماڭىزدى ءبىر ماسەلەگە توقتالعىم كەلەدى. «تسيفرلى قازاقستان» باعدارلاماسىن جۇزەگە اسىرۋعا جۇزدەگەن ملرد تەڭگە ءبولىندى دەگەن الەۋمەتتىك جەلىلەردەگى اقپارات شىندىققا جاناسپايدى. شىن مانىسىندە بۇل باعدارلاماعا 2 جىلدا رەس­پۋبليكالىق بيۋدجەتتەن 41 ملرد تەڭگە ءبولىندى. ونىڭ تەك 11،1 پايىزى، ياعني 4،6 ملرد تەڭ­گەسى، تسيفرلىق دامۋ، يننوۆاتسيا­لار جانە اەروعارىش ونەركاسىبى مينيسترلىگى جۇزەگە اسىرىپ جاتقان باعدارلامالارعا جۇم­سالدى. مينيسترلىك بيۋدجەتىندە «تسيفرلى قازاقستان» باعدار­لاماسىنان بولەك، بارلىق مەم­لەكەتتىك ورگانداردىڭ اعىم­داعى ينفراقۇرىلىمىن قول­داۋعا باعىتتالعان قارجى قاراس­تىرىلعان. مىسالى، مەملە­كەتتىك ورگانداردىڭ بارلىق اقپاراتتىق جۇيەلەرىنە كانال ۇسىنۋعا 28،3 ملرد تەڭگە جۇم­سا­لادى. حقو-لاردى ۇستاپ تۇرۋعا جانە قىزمەتىن ۇيىمداستىرۋعا 19،5 ملرد تەڭگە بولىنەدى، – دەدى ۆيتسە-مينيستر.

ءباسپاسوز ءماسليحاتىندا «ۇلتتىق اقپاراتتىق تەحنولو­گيالار» اق باسقارما تور­اعاسى اسەت تۇرىسوۆ eGov پورتالىنىڭ الەۋمەتتىك كو­مەك­تى تاعايىنداۋداعى ماڭىزىنا توقتالدى.

– بىزگە 18 ساعات ىشىندە، ياعني 27 ناۋرىزدىڭ تۇنىنەن 28  ناۋرىزعا دەيىنگى ارالىقتا 42500 تەڭگە الەۋمەتتىك كومەكتى eGov پورتالى ارقىلى بەرۋگە مۇمكىندىك جاساۋ مىندەتتەلدى. پورتال ارقىلى جارتى ميلليوننان استام ازامات ءوتىنىش بەردى. وتىنىشتەردىڭ 101144-ءى ەلەكتروندى تۇردە تۇسسە، 402 621 ادام جاڭا سەرۆيستى قولداندى. ەكى تاۋلىك ىشىندە ىسكە قوسىلعان تەلەگرام-بوتتى قولدانۋشىلار تىم كوپ بولعاندىقتان، بەلگىلى ءبىر شەكتەۋ قويۋعا تۋرا كەلدى. وسىعان بايلانىستى 3 ساعات ىشىندە «ۇلتتىق عىلىمي تەحنولوگيالار» اق ايماقتار ءۇشىن بارلىعى 18 تەلەگرام-بوتتى ىسكە قوستى. بۇگىنگە دەيىن وسى بوتتار ارقىلى 515 مىڭ ءوتىنىش قابىلداندى، – دەدى ول.

تسيفرلىق دامۋ، يننوۆاتسيا­لار جانە اەروعارىش ونەركاسىبى ءمينيسترىنىڭ ورىنباسارى دا­رىن تۇياقوۆ رەس­پۋبليكا بويىن­شا ينتەرنەت جە­لىلەرىنە تۇسكەن سالماق جاڭا جىل تۇنىن­دەگى جۇكتەن دە اسىپ كەتكەنىن ايتتى. 

– سۋسىن مەن اس سياقتى، ينتەرنەت تە باستى قاجەتتىلىككە اي­نالدى. دۇنيە ءجۇزى بويىنشا ينتەر­نەتكە ارتىق جۇك ءتۇسىپ جاتىر. مىسالى، ەۋروپادا ول 50 پا­يىزعا جۋىقتادى، قازاق­ستاندا جاڭا جىل تۇنىندەگى كور­سەت­كىشتەن دە 2 ەسە اسىپ كەتتى، – دەدى ول.

د.تۇياقوۆتىڭ ايتۋىنشا، ينتەرنەت بايلانىسىن ساقتاۋعا رەزەرۆ قورىنىڭ 25 پايىزى جۇ­م­سالعان. مينيسترلىك ينتەر­نەتتىڭ جۇمىسىن كۇشەيتۋ ءۇشىن جەرگىلىكتى اكىمدىكتەرمەن بىرلەسىپ ءىرى قالالاردا دىڭگەكتى انتەننا ورناتىپ جاتىر.

 

سوڭعى جاڭالىقتار

ەرتەڭ قىزىلوردادا كۇن كۇرت ىسيدى

ايماقتار • بۇگىن، 17:22

اقمولادا 3 ادام سۋعا كەتتى

ايماقتار • بۇگىن، 13:42

ۇقساس جاڭالىقتار