ەلباسى • 07 ءساۋىر، 2020

نۇرسۇلتان نازارباەۆ پرەمەر-مينيستر اسقار ماميندى قابىلدادى

73 رەتكورسەتىلدى

كەزدەسۋ بارىسىندا قازاقستاننىڭ تۇڭعىش پرەزيدەنتى قابىلدانعان ءىس-شارالاردىڭ ارقاسىندا كوروناۆيرۋس ينفەكتسياسىنىڭ تارالۋ قارقىنى تومەندەگەنىن ايتتى. بۇل تۋرالى تۇڭعىش پرەزيدەنتتىڭ ءباسپاسوز قىزمەتى حابارلادى.

– مەديتسينا قىزمەتكەرلەرىنىڭ ۇيلەسىمدى جۇمىسىن ەرەكشە اتاپ وتكىم كەلەدى. قيىن جاعدايدا قۇقىق قورعاۋ ورگاندارى دا تيىمدىلىگىن كورسەتىپ وتىر. ۇكىمەت پەن جەرگىلىكتى اتقارۋشى ورگاندار دا بەلسەندى جۇمىس ىستەۋدە، - دەدى نۇرسۇلتان نازارباەۆ.

ەلباسى مەملەكەت باسشىسىنىڭ تاپسىرمالارىن ساپالى جۇزەگە اسىرۋدىڭ ماڭىزدىلىعىنا توقتالدى.

– پرەزيدەنتتىڭ بارلىق باستامالارىن جەرگىلىكتى جەرلەردەگى حالىققا جەتكىزۋ ماڭىزدى. مەن بۇل ماسەلەگە اكىمدەرمەن تەلەفون ارقىلى بولعان اڭگىمە بارىسىندا دا توقتالعان ەدىم، - دەدى قازاقستاننىڭ تۇڭعىش پرەزيدەنتى.

سونداي-اق نۇرسۇلتان نازارباەۆ قازىرگى جاعدايدا ەكونوميكالىق قاۋىپسىزدىكتى قامتاماسىز ەتۋ قاجەتتىلىگىنە نازار اۋداردى.

– الەمدەگى ەكونوميكالىق احۋال كۇردەلى. بىراق ءبىرىنشى توقساننىڭ قورىتىندىسى بويىنشا ەلىمىزدىڭ كورسەتكىشتەرى جامان ەمەس. الايدا كارانتيننىڭ سالدارى ەكونوميكالىق كورسەتكىشتەرگە ءالى تولىق اسەر ەتە قويماعانىن ەسكەرۋىمىز كەرەك. وسى ورايدا شاعىن جانە ورتا بيزنەستى قولداۋ، حالىقتى ازىق-ت ۇلىكپەن قامتاماسىز ەتۋ ماسەلەسى ماڭىزدى. قازىر داعدارىستان كەيىنگى كەزەڭدە نە ىستەيتىنىمىزدى ويلاستىرعانىمىز ءجون. ەكونوميكا تومەندەپ، 2008 جىلعى داعدارىستىڭ سالدارىنان دا اۋىر بولۋى مۇمكىن، - دەدى ەلباسى.

نۇرسۇلتان نازارباەۆ وتاندىق ەكونوميكانى قولداۋ ءۇشىن ۇلتتىق قور مەن ۇكىمەت قورىنان 10 ميلليارد دوللاردىڭ ۋاقىتىندا ءبولىنىپ جاتقاندىعىن اتاپ ءوتتى.

ءوز كەزەگىندە پرەمەر-مينيستر قازاقستاننىڭ تۇڭعىش پرەزيدەنتىنە ەل اۋماعىندا كوروناۆيرۋس ينفەكتسياسىنىڭ تارالۋىنىڭ الدىن الۋ جانە الەۋمەتتىك-ەكونوميكالىق تۇراقتىلىقتى قامتاماسىز ەتۋ بويىنشا قابىلدانىپ جاتقان شارالار جونىندە اقپارات بەردى.

كەزدەسۋ سوڭىندا نۇرسۇلتان نازارباەۆ ەكونوميكانىڭ شيكىزاتتىق ەمەس سەكتورلارىن دامىتۋعا باعىتتالعان باعدارلامالاردى ىسكە اسىرۋدىڭ ماڭىزدىلىعىن اتاپ ءوتتى.

ء–بىز بۇدان دا زور سىناقتاردى وتكەرگەنبىز. بۇل اۋىرتپالىقتى دا ەڭسەرەمىز. ەڭ باستىسى – ەل بىرلىگى مەن سابىرلىعى. مەنىڭ ويىمشا ۇكىمەت ءتيىمدى جۇمىس اتقارىپ جاتىر. ەرتەڭ مەنىڭ قازاقستان حالقىنا ۇندەۋ جاساعان ماقالام جاريالانادى. قازىر بۇكىل الەم قيىن كۇي كەشۋدە. دەرتتىڭ تارالۋ قاۋپى ءالى سەيىلمەي تۇر. سوندىقتان بارشامىز ءبىر-بىرىمىزگە دەگەن سىيلاستىقتى ساقتاي وتىرىپ، تاباندىلىق پەن توزىمدىلىك تانىتۋىمىز كەرەك، - دەدى ەلباسى.

سوڭعى جاڭالىقتار

عاسىر زۇلماتى

قوعام • كەشە

قۇردىم (تورتتاعان)

ادەبيەت • كەشە

جاڭا فورماتتاعى جىر كەشى

رۋحانيات • كەشە

ۇقساس جاڭالىقتار