ونىڭ سوزىنە قاراعاندا, ءىس-شارا بالالاردىڭ بوس ۋاقىتىن دۇرىس ۇيىمداستىرىپ, وسكەلەڭ ۇرپاققا رۋحاني تاربيە بەرۋدى كوزدەيدى. - ماقساتىمىز - وتباسى مۇشەلەرىنىڭ بارلىعىن ەرتەگى وقۋعا باۋلۋ, وتاعالارىنا باستى ءرول بەرۋ ارقىلى وتباسىلىق قۇندىلىقتاردى ناسيحاتتاۋ, - دەيدى ايگۇل ءجۇسىپوۆا.
- ەرتەگى وقىپ شىققان وتباسى شاعىن بەينەروليك ءتۇسىرىپ, ونى مەسسەندجەرلەردەگى توپقا ورنالاستىرۋى شارت. توپتىڭ وزگە مۇشەلەرى روليكتى تاماشالاپ, باعا بەرەدى. تاربيەشىنىڭ ايتۋىنشا, وسى ارقىلى بالالار مەن وتباسىلار اراسىنداعى باسەكە سەزىمى پايدا بولاتىنى پايدالى. وعان قوسا مۇندا رۋحاني تاربيە توڭىرەگىندەگى بىرقاتار ماسەلەلەر وزدىگىمەن شەشىلەدى. - باستامامىز بالالاردىڭ ءماجبۇرلى تۇردە مادەني-ويىن ساۋىق ءىس-شارالارىنان ايىرىلعان كەزىندە ماڭىزدى. كوروناۆيرۋس پاندەمياسىنا بايلانىستى قازىر بالالاردىڭ دەمالىسىن ۇتىمدى ۇيىمداستىرۋ, وتباسىلىق تاربيەنى قولعا الۋدىڭ ناعىز كەزى, - دەيدى ايگۇل ءجۇسىپوۆا.
ايتا كەتەيىك, ەرتىس اۋدانىنىڭ پەداگوگتارى ويلاپ تاپقان اكتسياسى كورشىلەس رەسەي بالالار باقشالارى تاربيەشىلەرىن قىزىقتىرعان. وسىعان وراي, جەرلەستەرىمىز سولتۇستىك كورشىلەرگە ارناپ ارنايى سەمينار وتكىزىپ ۇلگەرگەن.
