ايماقتار • 29 ناۋرىز، 2020

شىعىس قازاقستان: توتەنشە جاعداي رەجيمىن بۇزعاندار جازالاندى

471 رەتكورسەتىلدى

15 ادام جاۋاپكەرشىلىككە تارتىلىپ، 5 ادامعا ايىپپۇل سالىنىپ، 10 ادام قاماۋعا الىندى.

قۇقىق قورعاۋ جانە جەرگىلىكتى اتقارۋشى ورگاندار جۇرگىزىپ جاتقان قۇقىقتىق ءتۇسىندىرۋ جۇمىستارىنا قاراماستان، جەكەلەگەن ازاماتتار توتەنشە جاعداي جانە كارانتين رەجيمىندەگى تىيىمدار مەن شەكتەۋلەر تالاپتارىن بۇزۋىن جالعاستىرۋدا. بۇل تۋرالى شىعىس قازاقستان وبلىسىنىڭ پروكۋراتۋراسىنىڭ ءباسپاسوز قىزمەتى حابارلادى.

«وسكەمەن قالاسىندا كەزەكتى قۇقىق بۇزۋشىلار ۇستالىندى. ولار مەيرامحانا مەن لوتەرەيا كلۋبىنىڭ يەلەرى. اتالمىش اكىمشىلىك ىستەردىڭ دەرەكتەرى بويىنشا ولار توتەنشە جاعداي رەجيمىنە قاراماستان ساعات 22:00-دەن كەيىن جۇمىس ىستەگەن. مامانداندىرىلعان اكىمشىلىك سوتتىڭ قاۋلىسىمەن مەيرامحانا يەسى 26510 تەڭگە ايىپپۇل تۇرىندە اكىمشىلىك جاۋاپكەرشىلىككە تارتىلدى. كلۋبتىڭ يەسى 7 تاۋلىككە قاماۋعا الىندى» دەلىنگەن ءباسپاسوز قىزمەتى تاراتقان مالىمەتتە.

سونىمەن قاتار سوت «كوروناۆيرۋس بەلگىلەرى بار ازاماتتار اۋرۋحاناعا جاتقىزىلدى» دەگەن جالعان اقپارات تاراتقانى ءۇشىن اياگوز اۋدانىنىڭ تۇرعىنىن 5 تاۋلىككە قاماۋعا الىپتى. جالپى، وسى ۋاقىتقا دەيىن وبلىستا 26 اكىمشىلىك ءىس قوزعالىپ، 15 ادام جاۋاپكەرشىلىككە تارتىلىپ، 5 ادامعا ايىپپۇل سالىنىپ، 10 ادام قاماۋعا الىنعان كورىنەدى.

«توتەنشە جاعداي جاريالانۋىنا بايلانىستى رەجيمدى بۇزۋ نەمەسە تالاپتاردى ورىنداماۋ 10 اەك مولشەرىندە ايىپپۇل سالۋعا نەمەسە 15 تاۋلىككە دەيىنگى مەرزىمگە اكىمشىلىك قاماۋعا الىنۋىنا اكەپ سوعاتىنىن ەسكەرتەمىز» دەيدى پروكۋراتۋرا قىزمەتكەرلەرى.

شىعىس قازاقستان وبلىسى

سوڭعى جاڭالىقتار

ۇقساس جاڭالىقتار