وسىعان وراي شىعىس قازاقستان وبلىستىق دەنساۋلىق ساقتاۋ باسقارماسىنىڭ باسشىسى ءىلياس مۇحامەدجانوۆ تىكەلەي ەفيردە مالىمدەمە جاسادى:
- ناۋقاستاردىڭ جاعدايىنىڭ اۋىرلىعى ورتاشا دەڭگەيدە. العاشقى شاعىمدارىندا دەنە قىزۋى مەن سيرەك جوتەل بولعان. 1959 جىلى تۋعان ازاماتقا ەكى وشاقتى پنەۆمونيا دياگنوزى, ال ايەل ادامعا برونحوپنەۆمونيا دياگنوزى قويىلعان. جەدەل مەديتسينالىق كومەك بريگاداسى شۇعىل ارەكەت ەتىپ, الگوريتمگە سايكەس ارنايى كاپسۋلالاردا ولاردى ستاتسيونارعا جەتكىزدى. جاعداي قاداعالاۋدا تۇر. جانە بارلىق جاۋاپتى قىزمەتتەردىڭ باقىلاۋىندا,- دەدى وبلىستىق دەنساۋلىق ساقتاۋ باسقارماسىنىڭ باسشىسى.
قازىرگى ۋاقىتتا بۇل ادامدار تۇراتىن ورىندارعا دەزينفەكتسيا جۇمىستارى جۇرگىزىلۋدە. اتاپ ايتقاندا, «شىعىس» وڭىرلىك قولباسشىلىعى رقب قورعانىس بولىمشەلەرى دەزينفەكتسيا جۇرگىزدى. «شىعىس» وڭىرلىك قولباسشىلىعى بولىمشەلەرىنىڭ جەكە قۇرامى, بيولوگيالىق قورعاۋ, قالالىق ءماسليحات قىزمەتى دە جۇمىلعان. دەزينفەكتسيالىق ەرىتىندىسى بار جەكە گازسىزداندىرۋ جيىنتىعىمەن جابدىقتالعان اسكەري قىزمەتشىلەر وسى ۇيلەردىڭ اۋدانىندا ورنالاسقان ءدارىحانالاردى, دۇكەندەر مەن بالالار الاڭدارىن قوسا العاندا, ينفەكتسيانى جۇقتىرۋ قاۋپى بار بىرنەشە تۇرعىن ۇيلەردى وڭدەدى. دەزينفەكتسيالاۋ جونىندەگى ءىس-شارالار كوروناۆيرۋستىق ينفەكتسيانىڭ تارالۋىن بولدىرماۋ جونىندەگى جەدەل شتابپەن ءوزارا ءىس-قيمىلدا ۇيىمداستىرىلۋدا.
- ىرگەلەس اۋماقتى وڭدەۋ ارنايى دەزينفەكتسيالىق ەرىتىندىمەن جۇرگىزىلەدى, ونىڭ ارەكەتى بەس ساعاتقا دەيىن سوزىلادى. ءۇي تۇرعىندارى مەن جەرگە اسەر ەتپەيدى. بۇگىنگى كۇنى فيزكۋلتۋرنايا كوشەسىندەگى ۇيلەردى وڭدەۋ ءۇشىن 400 ليتر جۋىق زات پايدالانىلدى, - دەدى «شىعىس» وڭىرلىك قولباسشىلىعىنىڭ رادياتسيالىق, حيميالىق جانە بيولوگيالىق قورعاۋ اسكەرلەرىنىڭ باستىعى پولكوۆنيك قايرات تۇرعانبەكوۆ.
