ەلورداداعى «قازمەديا ورتالىعىندا» قازاقستان رەسپۋبليكاسى پرەزيدەنتى جانىنداعى ورتالىق كوممۋنيكاتسيالىق قىزمەتىنىڭ ۇيىمداستىرۋىمەن 26-27 تامىز كۇندەرى شىعىس قازاقستان وبلىسىندا وتەتىن «التاي – تۇركى الەمىنىڭ التىن بەسىگى» اتتى ءىى حالىقارالىق فورۋمىنا دايىندىق بارىسىنا ارنالعان بريفينگ بولىپ ءوتتى.
ەلورداداعى «قازمەديا ورتالىعىندا» قازاقستان رەسپۋبليكاسى پرەزيدەنتى جانىنداعى ورتالىق كوممۋنيكاتسيالىق قىزمەتىنىڭ ۇيىمداستىرۋىمەن 26-27 تامىز كۇندەرى شىعىس قازاقستان وبلىسىندا وتەتىن «التاي – تۇركى الەمىنىڭ التىن بەسىگى» اتتى ءىى حالىقارالىق فورۋمىنا دايىندىق بارىسىنا ارنالعان بريفينگ بولىپ ءوتتى.
ءتۇبى ءبىر تۇركى جۇرتىنىڭ باسىن بىرىكتىرەتىن رۋحاني قۇندىلىقتاردى تۇگەل زەرتتەپ-زەردەلەۋدىڭ ماڭىزى زور. ماسەلەن, «قورقىت اتا كىتابى», «ماناس», «الپامىس», «كورۇعلى», «قوزى كورپەش-بايان سۇلۋ», «ەدىگە باتىر», ت.ب. حالىق اۋىز ادەبيەتى ەسكەرتكىشتەرىنىڭ قازاق, قىرعىز, وزبەك, تۇركىمەن, تاتار, ازەربايجان, تۇرىك, باشقۇرت پەن ۇيعىر تىلدەرىندەگى سيۋجەتتىك ۇقساستىقتارى ولاردىڭ ءاۋ باستاعى تاريحي تامىرىنىڭ ورتاق ەكەنىن بىلدىرەدى, سونداي-اق تۇركىلەردىڭ ءداستۇرلى مۋزىكاسىنداعى سارقىلماس سارىننان ءبىر-بىرىنەن ءبولەك الىپ قاراۋعا بولمايتىن تۇتاستىقتى, كەي جاعدايدا ەگىز قوزىداي ۇقساس بولىپ ورىلەتىن جاراسىمدى جالعاستىقتى بايقاۋ قيىن ەمەس.
«حالىق تاريح تولقىنىندا» باعدارلاماسى اياسىندا الدا وتەتىن «التاي – تۇركى الەمىنىڭ التىن بەسىگى» اتتى ءىى حالىقارالىق فورۋمى – ەلباسىمىز نۇرسۇلتان نازارباەۆتىڭ باستاماسىمەن قولعا الىنعان «مادەني مۇرا» ستراتەگيالىق جوباسى اياسىندا بايىرعى مۋزىكالىق مۇرانى بايىپتاۋ, ونى كوپشىلىك قاۋىمنىڭ نازارىنا ۇسىنۋ, تۇركىتىلدەس حالىقتىڭ اتا-ءداستۇر, سالت-سانا, ادەت-عۇرىپتارى ارقىلى مادەنيەتىمىزدىڭ ەجەلدەن وركەندەپ, دامىعاندىعىن ماقتان ەتۋ, ءداستۇرلى مۋزىكا ونەرى وكىلدەرىن ىنتالاندىرۋ, تۇركى حالىقتارىنىڭ ءانى مەن جىرىن, كۇيى مەن سازىن, ەپوستىق ۇلگىلەرىن جان-جاقتى ناسيحاتتاۋ ماقساتىندا وتكىزىلگەلى وتىر.
ءبىرىنشى فورۋم 2011 جىلى وسكەمەن قالاسى جانە كاتونقاراعاي اۋدانىندا وتكىزىلىپ, ونى الداعى ۋاقىتتا ءداستۇرلى تۇردە ەكى جىلدا ءبىر رەت وتكىزىپ تۇرۋ تۋرالى شەشىم قابىلدانعان بولاتىن. بيىلعى فورۋم مەملەكەتتىك حاتشىنىڭ ۇلتتىق تاريحتى مودەرنيزاتسيالاۋ جانە تاريحي زەرتتەۋلەرگە جاڭا تاسىلدەردى پايدالانۋ تۋرالى قويعان مىندەتتەرىنىڭ اياسىندا ەرەكشە ماڭىزعا يە بولىپ وتىر.
ءىس-شاراعا 20 ەلدىڭ وكىلدەرى قاتىسادى دەپ كۇتىلۋدە. التايعا رەسەي, جاپونيا, تىۆا, تاتارستان, قىرعىزستان, تۇركيا, حاكاسيا, باشقۇرتستان, التاي ءولكەسى, وار, تۇركىمەنستان, ازەربايجان, كورەيا, ت.ب. ەلدەردىڭ عالىمدارى, ەلشىلەرى جانە قوعام قايراتكەرلەرى كەلەدى.
العاشقى كۇنى كەڭ كولەمدە عىلىمي-پراكتيكالىق كونفەرەنتسيا وتكىزىلمەك. كەلەسى كۇنى كاتونقاراعاي اۋدانىنداعى بەرەل اۋىلىنىڭ «پاتشالار القابىندا» وتەتىن مۋزىكالىق فەستيۆالعا قازاقستان, ءتۇركيا, ياكۋتيا, قىرعىزستان, رەسەي, وزبەكستان, باشقۇرتستان, ازەربايجان جانە وزگە مەملەكەت وكىلدەرى قاتىسادى. تەاترلاندىرىلعان كورىنىستە قازاقى سالت-ءداستۇرلەرى كورسەتىلىپ, فولكلورلىق كونتسەرتتەر ۇيىمداستىرىلادى.
باسقوسۋ بارىسىندا شىعىس قازاقستان وبلىسى اكىمىنىڭ ورىنباسارى جاقسىلىق ومار, س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ ءبىرىنشى پرورەكتورى باۋىرجان ەردەمبەكوۆ, وسى وقۋ ورنىنىڭ قازاقستان تاريحى كافەدراسىنىڭ پروفەسسورى سوۆەتحان يگىباەۆ پەن تاريح عىلىمدارىنىڭ كانديداتى ەرلان سايلاۋباەۆتار فورۋمعا دايىندىق بارىسى تۋرالى ايتا كەلىپ, جۋرناليستەر تاراپىنان قويىلعان سۇراقتارعا جان-جاقتى جاۋاپ بەردى.
بەرىك سادىر,
«ەگەمەن قازاقستان».
