كەشە تۇندە اقتوبەدە ەۋروپا ليگاسىنىڭ ءتورتىنشى راۋندىنىڭ ءبىرىنشى ماتچىندا جەرگىلىكتى «اقتوبە» مەن كيەۆتىڭ «ديناموسى» كەزدەستى. باستان-اياق تارتىسقا تولى بولىپ وتكەن كەزدەسۋدىڭ قورىتىندىسىندا قوناقتار 3:2 ەسەبىمەن جەڭىسكە جەتتى.ماتچتىڭ دەبيۋتتىك بولىگى تاجىريبەسى كوپ كيەۆتىكتەردىڭ باسىمدىلىعىمەن ءوتتى.ولار ءتىپتى ەسەپ تە اشىپ كەتە جازدادى. الايدا, سودان كەيىن ءوز-وزدەرىنە كەلگەن اقتوبەلىكتەر بىرتىندەپ العا شولعىنداي باستادى. سونىڭ بىرىندە, 10-مينۋتتا ولار مەيماندار قاقپاسى الدىندا العاشقى قاۋىپتى ءساتتى تۋىنداتتى. دەگەنمەن, «بىرەر يت-كويلەكتى بۇرىن توزدىرعان» ديناموشىلار ويىننىڭ تىزگىنىن ءوز قولدارىنان شىعارا قويمادى. وسى ارتىقشىلىق اقىرى 16-مينۋتتا ولاردىڭ ەسەپ اشۋلارىنا اپارىپ جەتكىزدى. ونى ايىپ الاڭىندا ەكى بىردەي قورعاۋشىنىڭ ورتاسىندا تۇرعان يارمولەنكو ءتۇسىردى.
قاقپالارىنا دوپ وتكىزىپ العان اقتوبەلىكتەر سودان كەيىن تاعى العا ۇمتىلدى. ارادا 20 مينۋتتان كەيىن عانا ولار ەسەپتى تەڭەستىرۋگە قول جەتكىزدى. ءسويتىپ, ويىننىڭ 37-مينۋتىندا ايىپ دوبىن سوعۋ كەزىندە جەرلەستەرىمىز ەسە قايتاردى. مۇندا گەينريحتىڭ وڭ قاپتالدان كەلىپ, ۇرعان دوبىنا باسىن قويا سالعان ترەمۋلين ءوز قاقپاسىنا كىرگىزىپ الدى - 1:1.
كەزدەسۋدىڭ ەكىنشى تايمى قوناقتاردىڭ ءبىرشاما جىگەرلى شابۋىلدارىمەن ءوتتى. مۇنى ولار كوپ ۇزاماي ەكى گولعا اينالدىرا ءبىلدى. ءبىزدىڭ جىگىتتەر تەك ويىن سوڭىنا قاراي عانا شابۋىلشى مارات ءحايرۋليننىڭ شەبەرلىگى ارقاسىندا ءبىر گولدىڭ قارىمتاسىن قايتاردى. ولاردىڭ بۇدان ارتىققا شامالارى جەتپەدى. وسىلايشا, ازۋلى قارسىلاس ءوزىنىڭ الىمدىلىعىن تانىتىپ, جەڭىستى تارتىپ اكەتتى.
بۇل ۇتىس «ديناموعا» كەلەسى كەزەڭگە وتۋگە ۇلكەن ارتىقشىلىق اپەرىپ وتىر.
دامير قوجامقۇل.
