وڭتۇستىك قازاقستان وبلىسىنىڭ ءار اۋىلىندا اجەلەر القاسىن قۇرۋ جوسپارلانىپ وتىر. وبلىستىق ارداگەرلەر كەڭەسىنىڭ كەنتاۋ قالاسىندا وتكىزىلگەن سەمينارىندا وسىنداي ۇيعارىم جاسالدى. بۇل تۋرالى El.kz حابارلادى.
جالپى, بۇل ءوڭىردىڭ اۋداندارىندا اجەلەر القاسى بار. ەندى بارلىق اۋىلداردا وسى ۇيىمدى قۇرۋ ماقساتى تۇر. «ءبىزدىڭ نەگىزگى مىندەتىمىز – قوعامدى اۋىزبىرلىككە, ىنتىماققا ۇندەۋ. ۇل مەن قىزعا تاربيە بەرۋدى دە نازاردان قاعىس قالدىرمايمىز. وسى تۇرعىدان كەلگەندە, اجەلەر القاسىن اۋىلداردا قۇرۋدى ۋاقىت وزدىرماي قولعا الۋىمىز كەرەك», - دەيدى وبلىستىق ارداگەرلەر كەڭەسىنىڭ توراعاسى جەڭىسبەك ماۋلەنقۇلوۆ.
بيىل قۇرىلعان شاردارا اۋداندىق اجەلەر القاسى ءتورايىمىنىڭ ورىنباسارى جاڭىلاي زياشقىزى بىرقاتار ىستەردى جۇزەگە اسىراتىندىقتارىن ءمالىم ەتتى. سونىڭ ىشىندە جاستارعا «قۇرساقشاشار», «توقىمقاعار» جانە وزگە دە ۇلتتىق قۇندىلىقتارىمىزدى دارىپتەيدى. كەلىن مەن ەنە اراسىنداعى سىيلاستىق ماسەلەسى دە اڭگىمەگە ارقاۋ ەتىلمەك.
دانيار تۇيمەباي.
