قوعام • 02 ناۋرىز، 2020

ەلوردالىق «رۋحاني جاڭعىرۋ» ءبىلىم ورتالىعىندا ەكى كۇندىك سەمينار-ترەنينگ جۇمىسى باستالدى

18 رەتكورسەتىلدى

2020 جىلعا ارنالعان جوسپار بويىنشا «رۋحاني جاڭعىرۋ» ءبىلىم ورتالىعى «رۋحاني جاڭعىرۋ» باعدارلاماسىنىڭ باعىتتارىن ءتۇسىندىرۋ ماقساتىندا 600 ادامعا كۋرس ۇيىمداستىرىپ، كوشپەلى دارىسپەن 5000 ادامدى قامتۋدى جوسپارلاپ وتىر. بۇل تۋرالى قالا اكىمدىگىنىڭ ءباسپاسوز قىزمەتى حابارلادى.

كوكتەمنىڭ العاشقى كۇنىندە «رۋحاني جاڭعىرۋ» ءبىلىم ورتالىعى ەكىكۇندىك سەمينار-ترەنينگ جۇمىسىن وتكىزدى. سپيكەر رەتىندە ل.ن.گۋميلەۆ اتىنداعى ەۇۋ-ءنىڭ فيلوسوفيا عىلىمدارىنىڭ كانديداتى كەڭشىلىك تىشحان شاقىرىلىپ، «العىس ايتۋ كۇنى – ۇرپاقتى دوستىق پەن تولەرانتتىلىققا تاربيەلەۋ مەرەكەسى» تاقىرىبىندا ءدارىس وقىلدى. ءدارىستىڭ ءمانى – ۇرپاق تاربيەسىندەگى العىس ايتۋ مەرەكەسىنىڭ ءتۇپ ماعىناسىنا ءۇڭىلۋ، ىزگى قوعامدى قۇرۋدا رۋحاني قۇندىلىقتاردىڭ ماڭىزى مەن ادامنىڭ جان دۇنيەسىندەگى تازالىق پەن كەمەلدىكتى ادامدار اراسىنداعى رياسىز قارىم-قاتىناستىڭ نەگىزى رەتىندە قاراستىرۋ.

سونداي-اق شارا بارىسىندا ل.ن.گۋميلەۆ اتىنداعى ەۇۋ-ءنىڭ پەداگوگيكا عىلىمدارىنىڭ كانديداتى، دوتسەنت ايكۇمىس وماربەكوۆا «رۋحاني-ادامگەرىشىلىك ءبىلىم بەرۋدىڭ پسيحولوگيالىق-پەداگوگيكالىق نەگىزدەرى» تاقىرىبىندا سەمينار-ترەنينگ وتكىزدى. سەمينار اياسىندا زاماناۋي ءبىلىم كەڭىستىگىن ىزگىلەندىرۋدىڭ جاڭا تاسىلدەرى، پسيحولوگيالىق جانە پەداگوگيكالىق قاعيداتتارى مەن شارتتارى قاراستىرىلدى.

ءدارىستىڭ ەكىنشى كۇنى كاسىبي كوۋچ اسەل مۇراتوۆا «ەموتسيونالدى ينتەللەكتىنى تاربيە قۇرالى رەتىندە پايدالانۋ» تاقىرىبىندا ترەنينگ وتكىزسە، فيلوسوف، مادەنيەتتانۋشى سالتانات الىمقۇلوۆا «جاھاندانۋ پروتسەسى جانە ۇلتتىق بىرەگەيلىكتى ساقتاۋ» تاقىرىبىندا ءدارىس وقىدى. ەسكە سالساق، بىلتىر وتكەن 10 سەمينار-ترەنينگكە قالانىڭ 32 كوللەدجىنىڭ، 87 جالپى ءبىلىم بەرۋ مەكەمەلەرىنىڭ، 11 قوسىمشا ءبىلىم بەرۋ، 95 بالاباقشا جانە 17 مادەني نىساندارىنىڭ 250 قىزمەتكەرى قاتىستى. شارا اياسىندا 357 ادامعا ەلوردانىڭ ساكرالدى نىساندارى بويىنشا ەكسكۋرسيا جۇرگىزىلدى.

سونىمەن قاتار قالانىڭ ورتا جانە ءبىلىم بەرۋ مەكەمەلەرىندە 51 كوشپەلى-ءدارىس ۇيىمداستىرىلىپ، وعان 4 050 ادام قامتىلدى. سونداي-اق ورتالىق كىتاپ وقۋ مادەنيەتىن قالىپتاستىرۋ ءۇشىن قالا تۇرعىندارىنا ارنالعان  «پاراسات» وقىرمان كلۋبى مەن «امانات» ۇيىرمەسىنىڭ كەزدەسۋلەرىن اپتا سايىن ۇيىمداستىرادى. كلۋب جۇمىسى بارىسىندا زيالى قاۋىم وكىلدەرىمەن كەزدەسۋ ۇيىمداستىرىلىپ، شەبەرلىك ساباقتارى وتكىزىلەدى. ودان بولەك، ورتالىق مەملەكەتتىڭ دامۋىنا ۇلەس قوسىپ، «100 جاڭا ەسىمگە» ەنگەن تۇلعالاردىڭ جەتىستىككە جەتۋ جولىن ناسيحاتتاۋ ءۇشىن كەزدەسۋلەر ۇيىمداستىرادى.

سوڭعى جاڭالىقتار

ۇقساس جاڭالىقتار