بەلگيا ەلشىسىمەن اڭگىمە

كەشە پارلامەنت ءماجىلىسىنىڭ توراعاسى ورال مۇحامەدجانوۆ بەلگيا كورولدىگىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى دانيەل بەرتراندى ونىڭ ءوتىنىشى بويىنشا قابىلدادى, دەپ حابارلادى وسى پالاتانىڭ ءباسپاسوز قىزمەتى. ءماجىلىس توراعاسى ءوز سوزىندە قازاقستان بەلگيانى سەنىمدى ارىپتەسى دەپ سانايتىنىن جەتكىزدى.  “قازاقستاننىڭ ەقىۇ-عا توراعالىق ەتۋىن قولداعان ەلدىڭ ءبىرى – بەلگيا. مەملەكەتىمىزدىڭ بەدەلدى ۇيىمعا جەتەكشىلىك ەتۋدەگى كۇن تارتىبىنە ۇسىنعان ماسەلەلەردى دە بەلگيا قولدايدى دەپ سەنەمىز. بۇل ميسسيا ەلىمىز ءۇشىن ءارى مارتەبەلى, ءارى ۇلكەن جاۋاپكەرشىلىك جۇكتەيدى. سوندىقتان, ءبىزدىڭ الدىمىزدا ۇلكەن مىندەتتەر تۇر. پرەزيدەنت نۇرسۇلتان نازارباەۆ ۇسىنعان قازاقستاننىڭ ماڭىزدى ءبىر باستاماسىنىڭ ءبىرى – ەلىمىزدە ەقىۇ ءسامميتىن وتكىزۋ”, دەدى ورال مۇحامەدجانوۆ. قوس مەملەكەتتىڭ پارلامەنتتەرى اراسىندا دوستىق بايلانىس ورناعان. 2006 جىلى بەلگيا وكىلدەر پالاتاسىنىڭ دەلەگاتسياسى قازاقستانعا كەلدى. سودان سوڭ جارتى جىلدان كەيىن ءماجىلىس دەپۋتاتتارى جۇمىس ساپارىمەن بريۋسسەلگە باردى. تاجىريبە الماسۋ باعىتىندا كەزدەسۋلەر ءوتتى. ءوز كەزەگىندە دانيەل بەرتران “قازاقستان بەلگيامەن مىقتى ديپلوماتيالىق بايلانىس ورناتقان ەل ەكەنىن مەملەكەتىمىز بەن ءوز اتىمنان ايتا الامىن. الداعى ۋاقىتتا جاڭا بەلەستەرگە قول جەتكىزەمىز دەپ ويلايمىن. ەكى ەل اراسىنداعى جانە پارلامەنتارالىق قارىم-قاتىناستى دامىتۋ ءۇشىن بار كۇش-جىگەرىمدى ايامايمىن”, دەدى. تاراپتار ىنتىماقتاستىق كەلىسىمدەردىڭ ناتيجەسىندە سوڭعى جىلدارى ەكى ەل اراسىنداعى بايلانىستى جاڭا دەڭگەيگە كوتەرۋ قاجەتتىگىنە توق­تالدى. قازىر بارلىق مۇمكىندىكتەر جۇزەگە اسىپ وتىرماعانى ايتىلدى. ەلىمىز “ەۋروپاعا جول” باعدارلاماسىن ىسكە اسىرۋ ۇستىندە. سونى­مەن قاتار, قازاقستاننىڭ يندۋستريالىق-ين­نو­ۆا­تسيالىق دامۋ جولى ايقىندالىپ وتىر. ەۋ­رو­پالىق وداققا ەنگەن ەلدەرمەن ىنتىماقتاستىقتى نىعايتۋ ماقساتى كوزدەلۋدە. سونىڭ ىشىندە بەلگيامەن اراداعى بايلانىستى جانداندىرۋ ەلىمىز ءۇشىن ماڭىزدى. سوندىقتان ساۋدا-ەكو­نو­مي­كالىق اينالىمدى جاقسارتۋ قاجەتتىگى ءسوز بولدى.