وتىرىستى اشقان ءماجىلىس توراعاسىنىڭ ورىنباسارى گ. يسيمباەۆا پارلامەنت ءماجىلىسى ماقۇلدايتىن زاڭ جوبالارىنىڭ ىشىندەگى ەڭ ماڭىزدى دا كۇردەلىسى رەسپۋبليكالىق بيۋدجەت تۋرالى زاڭ ەكەنىنە نازار اۋداردى. بيۋدجەت قاراجاتىن اشىق ءارى ءتيىمدى جوسپارلاپ, جۇمساۋ بارشا مەملەكەتتىك ورگانداردىڭ ەڭ وزەكتى مىندەتى ەكەنىنە نازار اۋدارعان ۆيتسە-سپيكەر مەملەكەتتىك ءاۋديتتى ەنگىزۋ مەملەكەت قاراجاتىن باقىلاۋدى جەتىلدىرۋدىڭ ماڭىزدى باعىتتارىنىڭ ءبىرى ەكەنىن اتاپ ءوتتى.
بەس ينستيتۋتسيونالدىق رەفورمانى ىسكە اسىرۋ جونىندەگى «100 ناقتى قادام» ۇلت جوسپارىندا اۋديت پەن مەملەكەتتىك اپپارات جۇمىستارىن باعالاۋدىڭ جاڭا جۇيەسىن ەنگىزۋ كوزدەلگەن. قازىر وسى مىندەتتەردى ورىنداۋ بويىنشا بىرقاتار ناقتى شارالار قابىلدانۋدا. سونىڭ ىشىندە ءتيىستى زاڭناما جەتىلدىرىلىپ, ادىسنامالىق بازا ازىرلەندى, مەملەكەتتىك اۋديتورلارعا سەرتيفيكاتتاۋ جۇرگىزىلگەن. قارجىلىق بۇزۋشىلىقتاردى جويىپ, قىمقىرىلعان قاراجاتتى بيۋدجەتكە قايتارۋ بويىنشا دا وڭ ديناميكا بايقالۋدا. وتكەن جىلى بيۋدجەتكە 10,4 ملرد تەڭگە قايتارىلدى, ول الدىڭعى جىلدارمەن سالىستىرعاندا, 10 ەسەگە دەيىن ءوستى, - دەدى گ. يسيمباەۆا.
دەگەنمەن, بۇل سالادا ءالى دە بولسا شەشىمىن تاپپاعان پروبلەمالار بار. مىسالى, مەملەكەتتىك ورگاندار بولىنگەن قاراجاتتى ەسەپتى جىلدىڭ سوڭىنا دەيىن فورمالدى تۇردە يگەرىپ قالۋعا ۇمتىلۋىن توقتاتار ەمەس. بۇل بيۋدجەتتى اتقارۋدان ساپالى ناتيجە الۋعا ايتارلىقتاي كەدەرگى كەلتىرۋدە. وتىرىستا قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى - قارجى ءمينيسترى ءاليحان سمايىلوۆ «بيۋدجەت قاراجاتىن پايدالانۋدىڭ تيىمدىلىگىن ارتتىرۋ ماقساتىندا مەملەكەتتىك ءاۋديتتى ودان ءارى دامىتۋ» تاقىرىبىندا بايانداما جاسادى. جاۋاپتى ورگان باسشىسىنىڭ ايتۋىنشا مەملەكەتتىك ءاۋديتتى ەنگىزۋ جانە ونىڭ ناتيجەلەرى بويىنشا 4 جىل ىشىندە ۇلتتىق كوميسسيا 1,5 مىڭنان استام مەملەكەتتىك اۋديتوردى سەرتيفيكاتسيادان وتكىزگەن. سونىمەن قاتار بارلىق مەملەكەتتىك جانە اتقارۋشى ورگانداردا 54 ىشكى اۋديت قىزمەتتەرى قۇرىلىپ, مەملەكەتتىك اۋديت جانە تاۋەكەلدەر جونىندەگى كەڭەستەردىڭ 79 وتىرىسى وتكەن.
ال, قاشىقتان تەكسەرۋ ادىستەرىن ەنگىزۋ جانە دامىتۋ اۋديت وبەكتىلەرىنىڭ قۇقىقتىق ساۋاتتىلىعىن ارتتىرىپ, سىبايلاس جەمقورلىق تاۋەكەلدەرىن بارىنشا ازايتقان. وسى تاقىرىپ بويىنشا ءماجىلىستىڭ قارجى جانە بيۋدجەت كوميتەتىنىڭ ءتورايىمى گۇلجان قاراقۇسوۆا قوسىمشا بايانداما جاساپ, دەپۋتاتتار ا. جامالوۆ, ج. دۇيسەباەۆ, م. ايسينا, پ. شاراپاەۆ, ب. دۇيسەنبينوۆ, س. احمەتوۆ, ي. ۋنجاكوۆا, ف. قاراتاەۆ, ش. وتەمىسوۆ, س.سيمونوۆ, ي. سميرنوۆا, ب. ىزمۇحامبەتوۆ. ماحامبەتوۆ بيۋدجەت قاراجاتىن پايدالانۋ تيىمدىلىگىن ودان ءارى ارتتىرۋ ءۇشىن مەملەكەتتىك ءاۋديتتى جەتىلدىرۋ جانە دامىتۋ شارالارى, مەملەكەتتىك ءاۋديتتى جاڭعىرتۋ پروتسەستەرىنىڭ پروبلەمالارى مەن پەرسپەكتيۆالارى بويىنشا بىرقاتار سۇراقتار قويىپ, پىكىرلەرىن ءبىلدىردى. ۇكىمەت ساعاتىندا تالقىلانعان ماسەلەلەر بويىنشا دەپۋتاتتار ءتيىستى ۇسىنىمدار قابىلدادى.
