قوعام • 07 اقپان، 2020

الماتى: باقىتجان ساعىنتاەۆ قالا تۇرعىندارىنىڭ سۇراقتارىنا جاۋاپ بەردى

36 رەتكورسەتىلدى

الماتى اكىمى باقىتجان ساعىنتاەۆ الاتاۋ اۋدانى اكىمىنىڭ ەسەپتىك كەزدەسۋىنە قاتىستى. بۇل تۋرالى قالا اكىمدىگىنىڭ ءباسپاسوز قىزمەتى حابارلادى.

اۋدان تۇرعىندارىن الاڭداتاتىن باستى ماسەلەلەر – بۇرىنعىسىنشا جولدىڭ، كوممۋنالدىق جەلىلەردىڭ جوقتىعى، اباتتاندىرۋ مەن اۋماقتى جاسىلداندىرۋ. الاتاۋ اۋدانىنىڭ اكىمى ازامات قالدىبەكوۆ تۇرعىنداردى گازبەن قامتۋدىڭ 96%-دى قۇرايتىنىن ايتتى. وتكەن جىلى «مادەنيەت» ىقشاماۋدانى مەن «ەنەرگوسترويتەل»، «تەپلوەنەرگەتيك» ساياباقتارىنا 6،8 شاقىرىم گاز قۇبىرى تارتىلدى. 1407 ۇيدى گازداندىرۋ قاجەت، ولاردىڭ 976-ى جەكە ۇيلەر، 431-ءى ساياباقتار.

سۋمەن قامتۋ جانە كارىز جەلىلەرى 79 جانە 68 پايىزدى قۇرايدى. «اقبۇلاق»، «ازتم»، «العاباس» ىقشاماۋداندارىنا ۇزىندىعى 107 شاقىرىم بولاتىن جەلىلەر تارتىلۋدا.

اۋدان ەلەكتر جەلىسىمەن تولىق قامتىلعان. دەگەنمەن 157 شاقىرىم جەلى مەن ترانسفورماتورلى قوسالقى ستانتسيالار سوت ارقىلى يەسىز دەپ تانىلىپ، ونىڭ 143 شاقىرىمى «الاتاۋ جارىق» كومپانياسىنىڭ بالانسىنا بەرىلدى. ايتا كەتەرلىگى، اۋدان تۇرعىندارى كوممۋنالدىق قىزمەت تولەمىن جالپىقالالىق تاريف بويىنشا تولەي الادى.

ەسەپتىك كەزدەسۋ بارىسىندا تىلەكتەر دە ايتىلدى. ماسەلەن، ەكولوگ تيمۋر ەلەۋسىزوۆ سكۆەرلەردى اباتتاندىرۋ بويىنشا كومەگىن ۇسىندى، سونىمەن قاتار بۇزاقىلار جاسىل جەلەككە زاقىم كەلتىرەتىندىكتەن، ۆيدەوباقىلاۋ كامەرالارىن ورناتۋ قاجەت ەكەنىن اتاپ ءوتتى.

الماتى اكىمى باقىتجان ساعىنتاەۆ الاتاۋ اۋدانى تۇرعىندارىنىڭ سۇراقتارىنا جاۋاپ بەرە كەلىپ، بارلىق پروبلەمالىق ماسەلەلەردىڭ جۇيەلى تۇردە شەشىلەتىنىن حابارلادى. ول ءۇشىن تاياۋ ۋاقىتتا اۋداندار اكىمدەرى ءوز اۋماقتارىن دامىتۋدىڭ ءۇش جىلدىق شەبەرلىك-جوسپارلارىن ازىرلەيتىن بولادى.

«مۇنداي ينفراقۇرىلىمدى جاقسارتاتىن جانە اۋداننىڭ باسقا دا ماسەلەلەرىن شەشەتىن «جول كارتالارى» سىزدەردىڭ بەلسەندى قاتىسۋلارىڭىز ارقىلى ازىرلەنەدى. قالا بيۋدجەتى شەبەرلىك-جوسپارلارىنا سايكەس جاسالادى ءارى بولىنەتىن بولادى»، - دەدى ب. ساعىنتاەۆ. ول اكىمدىكتىڭ جۇمىسىندا تۇرعىندار پىكىرلەرىنىڭ باستى نازارعا الىناتىنىن اتاپ ءوتتى.

كەزدەسۋ اياقتالعان سوڭ اۋدان تۇرعىنى جۇماعازى ەسجانوۆتىڭ وتىنىشى بويىنشا الماتى اكىمى اسفالتى، سىرتقى جارىعى جوق، ارىق جۇيەسى بۇزىلعان دوسپانوۆ پەن سۇحامباەۆ كوشەلەرىنىڭ بۇرىشىنا باردى. مۇنداعى اعاشتاردى كەسۋ قاجەت، ويتكەنى ولاردىڭ بۇتاقتارى ەلەكتر جەلىسى مەن بايلانىسقا زيان كەلتىرۋى مۇمكىن. باقىتجان ساعىنتاەۆ ءتيىستى باسقارمالار باسشىلارىنا جۇمىس جوسپارلارىنا ساي كورسەتىلگەن كەمشىلىكتەردى جويۋدى تاپسىردى.

سوڭعى جاڭالىقتار

ۇقساس جاڭالىقتار