ۇلى اقىننىڭ مەرەيتويىنا ارنالعان كەشكە كەلۋشىلەر اۋەلى «اباي – بەينەلەۋ ونەرىندە» اتتى كورمەنى تاماشالادى. بۇدان كەيىن «ابايدىڭ دۇنيەگە كەلۋى» اتتى تەاترلاندىرىلعان قويىلىم ساحنالاندى. قويىلىم بارىسىندا قازاق ۇلت-اسپاپتار وركەسترىنىڭ ورىنداۋىندا «تورى جورعا» كۇيى قويىلسا, «شولپى» بي ءانسامبلىنىڭ ارۋلارى مىڭ بۇرالا بي بيلەدى. اتالعان ساحنالىق قويىلىم ۇلجان انانىڭ ۇلى ابايدى ومىرگە اكەلگەن ءساتى مەن اكەسى قۇنانبايدان حالىقتىڭ ءسۇيىنشى سۇراعانى, اكە قۇنانبايدىڭ ۇلىنا يبراھيم دەپ ەسىم بەرگەنىن سۇيىنشىلەي جەتكىزۋى ماعىناسىندا ءوربىدى.
بۇدان كەيىن «مەن ىشپەگەن ۋ بار ما؟» اتتى اباي ولەڭدەرىنەن كومپوزيتسيا قويىلدى. ال, بەلگىلى اكتەر مۇرات قۇسايىنوۆتىڭ ورىنداۋىنداعى اباي قاراسوزدەرىنەن قۇرىلعان كومپوزيتسيا كوپشىلىكتىڭ كوڭىلىنەن شىقتى. حاكىمنىڭ ءتورتىنشى قاراسوزىندە ايتىلاتىن «قۋلىق ساۋماق, كوز ءسۇزىپ, تىلەنىپ, ادام ساۋماق – ونەرسىز ءيتتىڭ ءىسى. اۋەلى قۇدايعا سىيىنىپ, ەكىنشى ءوز قايراتىڭا سۇيەنىپ, ەڭبەگىڭدى ساۋ, ەڭبەك قىلساڭ, قارا جەر دە بەرەدى, قۇر تاستامايدى», دەگەن وسيەت سوزدەرى بۇگىنىگى ۇرپاققا دا ايتىلعان امانات سەكىلدى اسەر ەتتى.
سونىمەن قاتار مۇحتار اۋەزوۆتىڭ «اباي» سپەكتاكلىنەن ساحنالانعان ءۇزىندى ءوزىنىڭ كوركەمدىك كوكجيەگىمەن دە كورەرمەنگە ەرەكشە كۇي سىيلادى. اۋىلدىڭ جاستارى اقىن ايدار مەن ارۋ اجار اراسىنداعى ماحاببات سەزىمى, وسى ماسەلە توڭىرەگىندە اباي مەن جيرەنشە اراسىنداعى تارتىس سياقتى كورىنىستەر كورەرمەندى بەي-جاي قالدىرمادى. جالپى كەش بارىسىندا اباي قۇنانباي ۇلىنىڭ «كوزىمنىڭ قاراسى», «ايتتىم سالەم» اتتى اندەرى ورىندالدى. سونداي-اق تانىمال اكتەر ۇلان ابزاليەۆ ابايدىڭ وسيەت سوزدەرىن وقىپ, كەشتى قورىتىندىلادى.
جامبىل وبلىسى
