سايت قۇرۋ يدەياسى ەكى جىل بۇرىن پايدا بولعان ەكەن. قازاق تىلىندەگى ماتەريالداردىڭ جەتىسپەۋشىلىگىن بايقاعان مۇحتار ماتەماتيكا بويىنشا وقۋلىقتاردىڭ ەلەكتروندى نۇسقالارىن ءبىر ۆەب-پاراققا جيناقتاۋدى قولعا الدى. الدىمەن 600-دەن استام كىتاپ, ۆيدەو-وقۋلىقتار, عىلىمي ماقالالار جانە تاقىرىپتىق تەوريالىق ماتەريالدار جۇكتەدى. كەيىن ارىپتەستەرىنىڭ كەڭەسى بويىنشا ونلاين-پلاتفورمانى ءتۇرلى رەسۋرستارمەن جانە قۇرالدارمەن تولىقتىردى. سايتتا ادىستەمەلىك نۇسقاۋلىقتان باسقا, قورىتىندى ەمتيحانعا دايىندالۋعا ارنالعان ءارتۇرلى تەست تاپسىرمالارى بار. سونىمەن قاتار ءپان بويىنشا ءبىلىمدى تەكسەرۋگە ارنالعان وليمپيادالىق ءبولىم اشىلعان.
– مەن سايتتى 2018 جىلى باستاعان بولاتىنمىن. ونى «NISmath» دەپ اتادىم. وتكەن جىلعى تۇلەك ارمان الىشەر سايت لوگوتيپىن جاساۋعا كومەكتەستى. تاعى ءبىر وقۋشى نۇربول بيجىگىت ونىڭ ءموبيلدى نۇسقاسىن ازىرلەدى», – دەدى مۇحتار بەگايداروۆ.
ونىڭ ايتۋىنشا, وقىرماندار مەن سايت پايدالانۋشىلار گەوگرافياسى كۇن سايىن ارتىپ كەلەدى. العاشقى جىلدارى پلاتفورمانى 1000-عا جۋىق ادام قولدانسا, بيىل ءبىر عانا ايدىڭ ىشىندە جۇيە 23000 بەلسەندى قولدانۋشى تىركەلگەن.
– سايت وتە قولجەتىمدى جانە زاماناۋي ءبىلىم بەرۋ باعدارلاماسىنا بەيىمدەلگەن. بارلىق رەسۋرستار تەگىن, بۇل پايدالانۋشىلار ءۇشىن وتە ماڭىزدى. مەن ءوز تاجىريبەمدە وقۋلىقتاردى, تاپسىرمالاردى ءجيى قولدانامىن. ساباقتاردا سايتتىڭ قوسالقى قوسىمشالارىن پايدالانامىن», – دەدى جازيرا بالابي, تۇركىستان وبلىسىنداعى اۋىل مەكتەبىنىڭ مۇعالىمى.
بۇگىندە «NISmath» كومەگىنە ەلىمىزدىڭ پەداگوگتارى مەن وقۋشىلارى جۇگىنەدى ەكەن. مۇحتاردىڭ بۇل اۆتورلىق جوباسىن پايدالانۋشىلار عانا ەمەس, سونىمەن قاتار مۇعالىمدەر اراسىندا وتكىزىلەتىن ءداستۇرلى رەسپۋبليكالىق ءبىلىم سايىسىنىڭ ساراپشىلارى دا جوعارى باعالادى. پەداگوگيكالىق يدەيالار فەستيۆالىنىڭ «شەبەرلىك پاليتراسى» بولىمىندە «nismath.org» ينتەرنەت-پلاتفورماسى ارىپتەستەردىڭ ۇلكەن قىزىعۋشىلىعىن تۋدىردى, ال جوبانى قورعاعان كەزدە قاتىسۋشىلاردىڭ 100 پايىزى پلاتفورمانىڭ بەلسەندى قولدانۋشىلارى بولىپ شىقتى. بايقاۋ ناتيجەسىندە م.بەگايداروۆتىڭ ماتەماتيكالىق سايتى تاراتۋعا جانە تاجىريبەدە قولدانۋعا لايىقتى ۇزدىك يدەيا دەپ تانىلدى.
ايتا كەتۋ كەرەك, 2019 جىلعى قورىتىندى اتتەستاتتاۋدىڭ ناتيجەلەرى بويىنشا مۇحتار بەگايداروۆ شاكىرتتەرى ماتەماتيكا ءپانى بويىنشا جوعارى بالل جيناپ, جيىرما زياتكەرلىك مەكتەپ اراسىندا ءبىرىنشى ورىننان كورىندى.
ءبىلىم بەرۋ جۇيەسىن دامىتۋعا قوسقان ۇلەسى مەن پەداگوگيكالىق قىزمەتتەگى شىعارماشىلىق جەتىستىكتەرى ءۇشىن مۇحتار ءبىلىم جانە عىلىم ءمينيسترىنىڭ العىس حاتىمەن ماراپاتتالدى.
مۇحتار بەگايداروۆ – بوس ۋاقىتىندا ءوز باستاماسى بويىنشا مەكتەپ وقۋشىلارى مەن مۇعالىمدەرگە جاڭا ءبىلىمدى مەڭگەرۋگە جانە ماتەماتيكانى باعىندىرۋعا كومەكتەسەتىن سىر وڭىرىندەگى ەڭ تانىمال ەرىكتىلەردىڭ ءبىرى.
