جيىندا اۋدان باسشىسى قانات كارىموۆ وتكەن جىلى اتقارىلعان جۇمىستاردى بايانداپ, الداعى جوسپارلارىمەن ءبولىستى.
وبلىس اكىمىنىڭ ءباسپاسوز قىزمەتىنىڭ مالىمدەۋىنشە, وتكەن جىلى اۋداننىڭ بەس اۋىلىندا ورتالىقتاندىرىلعان سۋ قۇبىرىنىڭ قۇرىلىسى باستالعان.
قازىر اۋدان ورتالىعى باياناۋىل اۋىلى, اقساڭ اۋىلدارىنا سۋ كەلگەن.
بيىل بىرلىك, جاڭاتىلەك, قۇندىكول اۋىلدارىنا سۋ قۇبىرلارىن تارتۋ جۇمىستارى بيىل اياقتالماق.
ال, تورايعىر اۋىلىنىڭ شاقىرىمدىق كىرەبەرىس جولىن جوندەۋ جالعاسۋدا.
سونىمەن قاتار بىلتىر الەكسەەۆكا-جاڭاجول باعىتىنداعى جولدىڭ 18,5 شاقىرىمى اباتتاندىرىلدى. بيىلعى جوسپاردا وسى تاس جولدىڭ تاعى 18,5 شاقىرىمىن جوندەۋ جوسپارلانىپ وتىر.
- ەڭ باستىسى – ءبىلىم بەرۋ, دەنساۋلىق ساقتاۋ, الەۋمەتتىك قورعاۋ, جۇمىسپەن قامتۋ جانە الەۋمەتتىك ماڭىزى بار ازىق-ت ۇلىك تۇرلەرى باعاسىن تۇراقتاندىرۋ ماسەلەلەرى اۋدان اكىمدىگىنىڭ كۇندەلىكتى باقىلاۋىندا بولۋى ءتيىس, - دەدى وبلىس اكىمى ابىلقايىر سقاقوۆ.
سونىمەن بىرگە اۋدانعا بيىل 1,2 ملرد جەكە ينۆەستيتسيا قۇيىلماق.
ابىلقايىر سقاقوۆ باياناۋىل اۋدانى باسشىلىعىنان ينۆەستيتسيانىڭ تومەندەۋىنە جول بەرمەۋدى تالاپ ەتتى.
ياعني, بۇرىنعى اكىم بولات باقاۋوۆ باستاپ سوڭىنا دەيىن بىتىرمەگەن «مىرزاشوقى» تاۋ شاڭعىسى كەشەنىنە ينفراقۇرىلىمدى دامىتۋ قاجەتتىگىن اتاپ ءوتتى.
جىلىتىلاتىن دەمالىس ۇيلەرىن سالۋ جانە تاۋ ەتەگىنە مەيمانداردى جەتكىزۋ جۇمىستارىن ۇيىمداستىرۋدى, تۋريستەردىڭ قاۋىپسىزدىگىن قامتاماسىز ەتۋ قاجەت ەكەن.
ايتسە دە, باسىنا مۇلدە قار تۇسپەيتىن مىرزاشوقىنىڭ بۇل جوباسىنىڭ جۇزەگە اسۋى ءالى ەكى تالاي.
بولات باقاۋوۆ قىمبات شەتەلدىك قوندىرعى الىپ, جاساندى قار جاسايمىن دەپ عاجايىپقا سەنگەن ەدى.
وبلىس اكىمى اۋدان ورتالىعى باياناۋىلدى, اۋىلداردى دامىتۋدىڭ بارلىق ماسەلەلەرى الداعى ۋاقىتتا اۋدان تۇرعىندارىمەن بىرلەسكەن جيىندا تالقىلاي ايتتى.
پاۆلودار وبلىسى
