بىرلەسىپ اتقارار جۇمىس كوپ

ماسكەۋدە تمد ەلدەرى سىرتقى ىستەر مينيسترلەرى كەڭەسىنىڭ كەزەكتى ءماجىلىسى بولىپ ءوتتى جاپونياعا ساپارىن ءساتتى اياقتاعان ەقىۇ-نىڭ ءىس باسىنداعى توراعاسى, قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ تاۋەلسىز مەملەكەتتەر دوستاستىعىنا مۇشە ەلدەر سىرتقى ىستەر مينيسترلەرى كەڭەسىنىڭ كەزەكتى ماجىلىسىنە قاتىسۋ ءۇشىن تىكەلەي ماسكەۋگە كەلدى. رەسەي استاناسىندا وتكەن باسقوسۋعا قانات ساۋداباەۆپەن قاتار, ءازىربايجان رەسپۋبليكاسىنىڭ سىرتقى ىستەر ءمينيسترى ەلمار مامەدياروۆ, ارمەنيا رەسپۋبليكاسىنىڭ سىرتقى ىستەر ءمينيسترى ەدۆارد نالبانديان, بەلارۋس رەسپۋبليكاسىنىڭ سىرتقى ىستەر ءمينيسترى سەرگەي مارتىنوۆ, قىرعىز رەسپۋبليكاسىنىڭ مەملەكەتتىك سىرتقى ىستەر ءمينيسترى قادىربەك سارباەۆ, مولدوۆا رەسپۋبليكاسى سىرتقى ىستەر جانە ەۋروپالىق ينتەگراتسيا ءمينيسترىنىڭ ورىنباسارى اندرەي پوپوۆ, رەسەي فەدەراتسياسىنىڭ سىرتقى ىستەر ءمينيسترى سەرگەي لاۆروۆ, تاجىكستان رەسپۋبليكاسى سىرتقى ىستەر ءمينيسترىنىڭ ورىنباسارى ماحمۋدجون سوبيروۆ, تۇركىمەنستان سىرتقى ىستەر ءمينيسترىنىڭ ءبىرىنشى ورىنباسارى ۆەپا حادجيەۆ, وزبەكستان رەسپۋبليكاسى سىرتقى ىستەر ءمينيسترىنىڭ ورىنباسارى باحتي¿ر يسلاموۆ, ۋكراينا سىرتقى ىستەر ءمينيسترى كونستانتين گريششەنكو جانە تمد اتقارۋ كوميتەتىنىڭ توراعاسى – اتقارۋشى حاتشىسى سەرگەي لەبەدەۆ قاتىستى. تمد-عا مۇشە ەلدەر سىرتقى ىستەر مينيسترلەرىنىڭ وسى جولعى وتىرىسىندا جيىرمادان استام ماسەلە قارالدى. ولار مەم­لەكەت­ارا­لىق ىنتىماقتاستىقتى گۋماني­تار­لىق سالادا, قاۋىپسىزدىكتى قامتا­ما­سىز ەتۋدە جانە حالىقارالىق قاتىناستاردا دامىتىپ, تەرەڭدەتۋگە ارنالدى. باسقوسۋدا ەقىۇ-نىڭ ءىس باسىنداعى توراعاسى, قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر مي­نيسترى قانات ساۋداباەۆ ءسوز ءسوي­لەدى. بۇل قازاقستاننىڭ ەقىۇ-عا توراعالىعى لاۋازىمىندا 100 كۇن بولۋىنىڭ وزىندىك ءبىر قورى­تىندىسىن شىعارعان ءسوز ىسپەتتەس بولدى. ق.ساۋداباەۆ اۋەلى ءوزىنىڭ ارىپتەستەرىنە, تۇتاستاي العاندا, دوستاستىق ەلدەرىنە قازاقستان توراعالىعىنا دايەكتى قولداۋ كورسەتكەنى ءۇشىن ريزاشىلىعىن ءبىلدىرىپ, وتانىمىزدىڭ ەقىۇ-نىڭ نەگىز قالاۋشى قاعيداتتارى مەن قۇندىلىقتارىنا ادالدىق تانىتىپ كەلە جاتقانىن, سونداي-اق ۇيىمدى ودان ءارى نىعايتا ءتۇسۋ ماقساتىندا تمد-داعى پراگماتيكالىق جانە ءوزارا ءتيىمدى بايلانىستاردى دامىتۋعا اركەز دايىن ەكەنىن اتاپ كورسەتتى. قازاقستان سىرتقى ساياسات ۆە­دوم­ستۆوسىنىڭ باسشىسى ءۇستىمىز­دەگى جىلدىڭ 14 قاڭتارىندا ۆەنادا وتكەن ەقىۇ تۇراقتى كەڭەسىنىڭ ماجىلىسىندە قازاقستان پرەزيدەنتى نۇرسۇلتان نازارباەۆ بەينەۇندەۋ جاريالاپ, وندا توراعالىقتىڭ قاعيداتتارى مەن باسىمدىقتارىن جاريا ەتكەنىن, سولاردىڭ نەگىزىندە وزىندىك ءبىر “جول كارتاسى” جاسالعانىن ەسكە سالدى. قانات بەكمىرزا ۇلىنىڭ پىكىرىنشە, قازاقستاندىق توراعالىق­تىڭ ءبىر ەرەكشەلىگى – ۆەناداعى تۇراقتى كونسۋلتاتسيالار ارقىلى ۇيىم اياسىنداعى ۇدەرىستەرگە ءمۇم­كىن­دىگىنشە بارلىق قاتىسۋشى مەم­لە­كەتتەردى تارتۋ بولىپ تابىلادى. ال بۇل ءوز كەزەگىندە شەشىم قابىل­داۋدىڭ كونسەنسۋستىق قاعيدالارىن ەسەپكە الا وتىرىپ باسىمدىقتاردى ىلگەرىلەتۋگە ايتارلىقتاي جاردەم جاسايدى. – بىزگە ۇيىمدى “سىلكىلەپ” الۋدىڭ ءساتى ءتۇسىپ, سونىڭ ناتيجە­سىندە ماسەلەلەردىڭ كەڭ اۋقىمى بويىنشا, ونىڭ ىشىندە تمد-داعى ارىپتەستەرىمىزدىڭ ۇستانىمدارىنا جاۋاپ بەرەتىن ماسەلەلەر بويىنشا دا تاقىرىپتىق پىكىرتالاستار قانات جايدى. وسىعان بايلانىستى دوس­تاس­تىق فورماتىنداعى كونسۋلتا­تسيا­لاردىڭ تىعىز رەجىمىن جالعاس­تى­رۋدىڭ ماڭىزى زور دەپ ساناي­مىز, – دەدى ءوزىنىڭ سوزىندە ق.ساۋداباەۆ. قازىرگى تاڭدا ەقىۇ الدىندا جاڭا قىر كورسەتۋلەر مەن قاۋىپ-قا­تەرلەرگە بايلانىستى ستراتەگيالىق باعدارلار جاساۋ سياقتى ماڭىزدى مىندەتتەر تۇر. قازاقستان باسشىسى نۇرسۇلتان نازارباەۆتىڭ ءۇستىمىز­دەگى جىلى ەقىۇ-نىڭ ءسامميتىن وتكىزۋ تۋرالى باستاماسى ءبىرىنشى كەزەكتە وسىنداي قاجەتتىلىكتەردەن تۋىن­داپ وتىر. قانات بەكمىر­زا­ ۇلى­نىڭ سوزىنە قاراعاندا, جوعارى دەڭگەيدەگى كەزدەسۋدىڭ باستى تاقى­رىپ­تارى تۋرالى قازىردىڭ وزىندە ءاڭ­گىمە قوزعاۋعا بولادى. بىرىنشىدەن, ولار رەسەي پرەزيدەنتى دميتري مەد­ۆەدەۆتىڭ ۇسىنىسىن قوسا العان­دا, ەۋروپا قاۋىپسىزدىگىنىڭ جاڭا ار­حي­تەكتۋراسىنىڭ ماسەلەلەرى بولۋى ىقتيمال. ەكىنشىدەن, 1999 جىلعى ۆەنا قۇجاتىن جاڭعىرتۋ جونىندەگى شەشىم. ۇيىمعا مۇشە مەملەكەتتەر ورتاق كوزقاراس تانىتا العان جاع­داي­دا بۇل ماسەلەنى دە وڭ شەشۋگە ءمۇم­كىندىك بار. ۇشىنشىدەن, سىن­دار­لى سيپاتقا يە بولىپ وتىرعان اۋعان پروبلەماتيكاسى جانە تورتىنشىدەن, تولەرانتتىلىق پەن مادەنيەتارا­لىق ۇنقاتىسۋ اسپەكتىلەرى. قازاقستاندىق توراعالىق ەقىۇ تۇعىرناماسىندا ەۋروپا قاۋىپسىز­دى­گىنىڭ بولاشاعى تۋرالى ۇنقاتىسۋدى دامىتۋعا شەشۋشى ءرول بەرەدى. “كورفۋ پروتسەسىنىڭ” قۇندىلىعى سوندا, ول بارلىق مۇددەلى جاقتار­دىڭ يدەيالارىن جاڭا قاۋىپسىزدىك جۇيەسىنىڭ ءومىر شىندىعىنا جاۋاپ بەرەتىن پارامەترلەرى كەيپىندە ءبىر­تۇتاس سۋرەتتەپ قانا قويماي, جال­پى­لاندىرۋعا دا مۇمكىندىك تۋعىزا­دى. وسى ورايدا ق.ساۋداباەۆ “كور­فۋ پروتسەسىنىڭ” ارالىق ناتيجەسىن سىرتقى ىستەر مينيسترلەرىنىڭ ال­ما­تىدا ۇيىمداستىرىلاتىن بەيرەسمي كەزدەسۋىندە تالقىلاۋ جوسپارلانىپ وتىرعانىن ايتتى. قازاقستان, سونىمەن قاتار, سو­زىل­مالى جانجالداردى رەتتەۋ ۇدە­رىس­تەرىنە وزىندىك ۇلەس قوسۋعا ۇمتى­لىس تانىتىپ وتىر. ماسەلەن, اتال­عان ماقساتتا ءىس باسىنداعى توراعا اق­پان ايىنىڭ ورتا شەنىندە ءوڭتۇس­تىك كاۆكاز رەسپۋبليكالارىن ارالاپ قايتتى. ونىڭ بارىسىندا جەرگىلىك­تى جەرلەردەگى, ياعني جانجال ايماق­تارىنداعى جاعدايلارمەن جاقىن تانىسىپ, تاراپتاردىڭ ۇستانىم­دارىن ايقىنداۋعا قول جەتكىزىلدى. – تاۋلى قاراباق جانجالىن “مادريد قاعيداتتارى” نەگىزىندە بەيبىت رەتتەۋ اياسىندا ءبىز ەقىۇ-نىڭ مينسك توبى جۇمىسىنا با­رىن­شا ىقپال ەتەتىن بولامىز جانە 2010 جىلدىڭ بارىسىندا استانادا ءازىر­باي­جان مەن ارمەنيا باسشى­لا­رىنىڭ كەزدەسۋىن وتكىزۋگە دايىن­بىز, – دەدى ءسوز رەتىندە قانات بەكمىرزا ۇلى. ەقىۇ-نىڭ ءىس باسىنداعى ءتور­اعاسى, قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى توراعالىقتىڭ كەلەسى ءبىر باسىمدىعى – اۋعانستاندى تۇراقتاندىرۋ مەن قايتا قۇرۋعا قا­تىس­تى ايتا كەلىپ, تمد – ەو جانە رەسەي – اقش/ناتو فورماتىن­دا­عى ىنتىماقتاستىقتىڭ وڭ ءۇردىس­تەرىنە قاناعات سەزىمىن ءبىلدىردى. اتاپ ايتقاندا, اۋعانستانعا قازاقستان, بەلارۋس, رەسەي جانە وزبەكستان اۋماقتارى ارقىلى, ياعني “سول­تۇستىك باعىت” بويىنشا جۇك جەتكىزۋ ۇدەرىسى تولىق كۇشىندە جۇمىس ىستەي باستادى. مۇنىڭ اۋعانستانداعى قاۋىپسىزدىككە ىقپال ەتىپ جاتقان حالىقارالىق بىتىمگەرشىلىك كۇشتەرى ءۇشىن ماڭىزى زور. سونداي-اق اۋعانستاننان جەتكىزىلەتىن ەسىرتكىگە قارسى كۇرەس پەن تۇتاستاي العاندا, اياقتالمايتىن سوعىستان زارەزاپ بولعان وسى ەلدى وڭالتۋ بويىنشا كۇش-جىگەر جۇمساپ كەلە جاتقان حالىقارالىق كۇشتەردىڭ ۇقشۇ مەن ناتو شەڭبەرىندە ناقتى ىنتىماقتاستىعى قاجەت ەكەندىگىنە ەكپىن ءتۇسىرىلدى. ق.ساۋداباەۆ ەقىۇ اياسىنداعى وسى جىلدىڭ شەشۋشى شارالارى قاتارىندا ۇستىمىزدەگى جىلدىڭ قا­زان ايىندا استانادا وتەتىن تەر­روريزمنىڭ الدىن الۋ جونىندەگى كونفەرەنتسيا مەن شىلدە ايىندا ۆەنادا ۇيىمداستىرىلاتىن ەسىرت­كى­گە قارسى كونفەرەنتسيانى اتادى. بۇعان قوسا, اۋعان پروبلەماتيكاسى مامىر ايىندا الماتىدا وتەتىن “ەقىۇ-نىڭ ەۋرازيالىق ولشەمى” ترانسازيالىق پارلامەنتشىلەر فورۋمىنىڭ كۇن تارتىبىنە ەنگىزىلگەن. قازاقستان سىرتقى ساياسات ۆە­دومستۆوسىنىڭ باسشىسى تمد اتقارۋ كوميتەتى جەتەكشىلەرىن جو­عارىدا اتالعان شارالارعا قاتىسۋعا شاقىردى. ويتكەنى, مۇنىڭ ءوزى مۇددەلى حالىقارالىق ۇيىمداردىڭ, سونىڭ ىشىندە ەقىۇ مەن تمد-نىڭ دا, اراسىنداعى كۇش-جىگەردى ۇيلەستىرۋگە جاسالعان سونى قادام بولىپ تابىلار ەدى. قانات بەكمىرزا ۇلىنىڭ ءسوزىن دوستاستىقتاعى ارىپتەستەرى ۇلكەن قىزىعۋشىلىقپەن تىڭدادى. ال تمد ەلدەرى سىرتقى ىستەر مينيسترلەرى كەڭەسىنىڭ ماجىلىسىندە, جوعارىدا اتاپ كورسەتكەنىمىزدەي, جيىرمادان استام ماسەلە قارالدى. ءسوز رەتىندە كەڭەسكە بيىل رەسەي فەدەراتسياسى توراعالىق ەتىپ وتىرعانىن دا ايتا كەتەيىك. بيىل 1941-1945 جىلدارداعى ۇلى وتان سوعىسىنداعى جەڭىسكە 65 جىل تولادى. 2010 جىل تمد اۋما­عىندا ارداگەرلەر جىلى دەپ جا­ريا­لانعانى بەلگىلى. وسىعان وراي سىرتقى ىستەر مينيسترلەرى دوستاس­تىق ەلدەرى مەملەكەت باسشىلارى­نىڭ سوعىس ارداگەرلەرىنە, تىل ەڭ­بەك­كەرلەرىنە ۇندەۋىن ءبىرىنشى كە­زەكتە تالقىلادى. بۇل قۇجاتقا پرە­زي­دەنتتەر 8 مامىردا ماسكەۋدە وتە­تىن بەيرەسمي كەزدەسۋدە قول قويا­دى دەپ كۇتىلۋدە. وسى ءجايت اردا­گەر­لەرگە دەگەن قۇرمەتتىڭ ءبىر كورىنىسى بولاتىنى دا ءسوزسىز. سونداي-اق تمد ەلدەرىنىڭ ارداگەرلەر ۇيىمى الدىندا تۇرعان قوعامدىق ماڭىزى زور الەۋمەتتىك مىندەتتەردى شەشۋگە باعىتتالعان شارالار جوسپارى قا­رال­دى. بۇل شارالار حالىقارالىق عىلىمي-تاجىريبەلىك كونفەرەن­تسيا­لار, ەرلىك ساباقتارى مەن تاقىرىپ­تىق كەشتەر وتكىزۋدى, جەڭىستىڭ 65 جىلدىعىنا وراي “بارشاعا ورتاق جەڭىس” جيناعىن شىعارۋدى, دوس­تاستىق ەلدەرىندەگى ارداگەرلەردىڭ الەۋمەتتىك قۇقىقتارى مەن مۇددە­لەرىن قورعاۋ بويىنشا جۇمىس تاجىريبەلەرىن تاراتۋدى كوزدەيدى. سىرتقى ىستەر مينيسترلەرىنىڭ كەڭەسىندە وتانىمىزدىڭ ەقىۇ-نىڭ تيىمدىلىگىن ارتتىرۋعا باعىت­تال­عان جانە ۇيىمنىڭ تمد-مەن ءوزارا ءىس-قيمىلىن ودان ءارى كەڭەي­تۋگە ارنالعان كۇش-جىگەرىن قولداۋ­دى قاراستىراتىن “قازاقستان رەس­پۋب­ليكاسىنىڭ ەۋروپاداعى قاۋىپ­سىز­دىك جانە ىنتىماقتاستىق ۇيى­مىن­داعى توراعالىعى تۋرالى” شە­شىم جوباسى جەكە ءبولىم رەتىندە قارالدى. رەسەي تارابى ەۋروپاداعى قاۋىپسىزدىك تۋرالى شارت جوباسىن ۇسىندى. ول ەۋروپاداعى قاۋىپسىزدىك جۇيەسىن بۇگىنگى ءومىر شىندىعىنا سايكەس جاڭاشا قالىپتاستىرۋدى ماقسات تۇتادى. مينيسترلەر رەسەي­دىڭ بۇل باستاماسىنا قولداۋ ءبىلدىردى. كەڭەسكە قاتىسۋشىلار تمد اتقارۋ كوميتەتىنىڭ 2007 جىلدىڭ 5 قازانىندا قابىلدانعان تمد-نى ودان ءارى دامىتۋ تۇجىرىمداماسىن جۇزەگە اسىرۋدىڭ بارىسى تۋرالى اقپاراتىن دا تىڭدادى. وتكەن كەزەڭدەرگە ارنالعان شارالاردىڭ كوپشىلىگى ورىندالعانى, بىرقاتارى جۇزەگە اسىرۋ ساتىسىندا تۇرعانى اتاپ كورسەتىلدى. قىرعىزستاننىڭ سۇراۋى بويىن­شا سىرتقى ىستەر مينيسترلەرى ءوز­دەرى­نىڭ ارنايى شەشىمدەرىمەن ءۇس­تىمىزدەگى جىلى ىستىقكولدە تاۋەل­سىز مەملەكەتتەر دوستاستىعىنىڭ حالىقارالىق سپورت ويىندارىن ءوت­كىزۋگە قولداۋ كورسەتۋ جونىندەگى ۇسىنىسىن بەكىتتى. الداعى 2011 جىلى تمد قۇرىل­عانىنا 20 جىل تولادى. وسىعان باي­لانىستى ماسكەۋ ماجىلىسىنە قاتىسۋشىلار دوستاستىقتىڭ مەرەي­تويىنا ارنالعان ءىس-شارالار جوسپارىنىڭ جوباسىن قارادى. وندا الداعى جىلى كوپتەگەن ءىس-شارالار, اتاپ ايتقاندا, عىلىمي-تاجىريبەلىك ءماسليحاتتار, ەكونومي­كا­لىق جانە بيزنەس-فورۋمدار, جاستار جانە سپورت كەزدەسۋلەرى مەن فەستيۆالدەر, عىلىمي جانە شى­عارماشىلىق ينتەلليگەنتسيانىڭ فورۋمىن, سونداي-اق باسقا دا ءبىر­قا­تار ءىس-شارالار وتكىزۋ جوسپار­لا­نىپتى. بۇلاردىڭ دا دوستاستىق ەلدەرى حالىقتارىن جاقىنداستىرا تۇسۋگە قىزمەت ەتەتىنى كۇمان تۋعىز­باسا كەرەك. تمد ەلدەرى سىرتقى ىستەر مي­نيسترلەرى كەڭەسىنىڭ كەزەكتى ءماجىلىسى الدىندا قانات ساۋداباەۆ ەكىجاقتى كەزدەسۋ وتكىزدى. ونىڭ ءبىرىنشىسى قىرعىزستاندىق ارىپتەسى قادىربەك سارباەۆپەن بولدى. كەز كەلگەن مۇمكىندىكتى ءمۇلت جىبەرمەي, كەزدە­سىپ جۇرەمىز. جالپى, ءبىز قىرعىز­ستانداعى وقيعالاردى مۇقيات قاراپ, باقىلاپ وتىرامىز, دەپ ءسوز باستاعان قازاقستان سىرتقى ساياسات ۆەدومستۆوسىنىڭ باسشىسى كەلەسى كەزەكتە كورشى ەل باسشىلىعىنا قا­زاقستاننىڭ ەقىۇ-عا توراعالى­عى­نا قولداۋ كورسەتكەنى ءۇشىن ريزا­شىلىعىن ءبىلدىردى. جانە سۇحبات­تاسىن الماتىدا وتەتىن سىرتقى ىستەر مينيسترلەرىنىڭ بەيرەسمي كەزدەسۋىنە شاقىردى. سونىمەن قاتار, ق.ساۋداباەۆ قىرعىزستاندىق ارىپتەسىنە ىنتى­ماق­تاستىقتىڭ پەرسپەكتيۆالى با­عىتتارىنىڭ ءبىرى رەتىندە قىرعىز­ستاننىڭ “ورتالىق ازيا – جاپو­نيا” ۇنقاتىسۋىنا قاتىسۋشى ەكە­نىن ەرەكشە ءبولىپ كورسەتتى. قازاق­ستان­دىق سىرتقى ساياسات ۆەدوم­ستۆوسى باسشى­سىنىڭ پىكىرىنشە, ءوڭىر ەلدەرىنىڭ ينتەگراتسيالانۋى جولىنداعى كەز كەلگەن قادام ونى مە­كەندەيتىن حالىقتاردىڭ يگىلىگى ءۇشىن قاجەت. ءبىزدىڭ ماقسات ەكىجاقتى ۋاعدا­لاس­تىقتاردىڭ جۇزەگە اسىرىلۋىنا كۇش جۇمساۋ بولىپ تابىلادى. قازاقستان باسشىسىنىڭ ەقىۇ ءسامميتىن شاقىرۋ تۋرالى باستاما­سىن قولدايمىز, دەدى جاۋاپ سوزىندە ق.سارباەۆ. كەزدەسۋدە قازاقستان – قىرعىزستان قارىم-قاتىناسىنىڭ ءتۇرلى باعىتتارى بويىنشا پىكىر الماسىلدى. ۋكراينا سىرتقى ىستەر ءمينيسترى كونستانتين گريششەنكومەن اڭگىمەدە قانات ساۋداباەۆ ارىپتەسىن وسى قىز­مەتكە تاعايىندالۋىمەن قۇت­تىق­تادى. جاقىندا قازاقستان پرە­زيدەنتى نۇرسۇلتان نازارباەۆ پەن ۋكراينا پرەزيدەنتى ۆيكتور يانۋ­كوۆيچتىڭ تەلەفون ارقىلى سويلەس­كەنىن ەسكە سالا كەلىپ, تاريحي تامى­رى تەرەڭدە جاتقان مەملەكەتارالىق ىنتىماقتاستىق كۇش الا تۇسەدى دەگەن سەنىمىن ءبىلدىردى. قازاقستان سىرتقى ساياسات ۆەدوم­ستۆوسىنىڭ باسشىسى جاقىن كۇندەر­دە ۋكرايناعا باراتىنىن, ساپار ماقساتىنا وراي مەملەكەت باسشىسى­نان ءتيىستى تاپسىرما العا­نىن ايتا كەلىپ, سوڭعى جىلدارى سايابىرسىعان ءداستۇرلى بايلانىس­تاردى قالپىنا كەلتىرۋ ەكىجاقتى قارىم-قاتى­ناستاردىڭ باسىم باعىتى بولۋى ءتيىس دەگەن پىكىرىن ورتاعا سالدى. ك.گريششەنكو دا قازاقستان مەن ۋكراينا قارىم-قاتىناسى ءداستۇر­لەرگە باي ەكەنىن اتاپ كورسەتىپ, رەسمي كيەۆتىڭ قازاقستاننىڭ بار­لىق باستامالارىن, ونىڭ ىشىندە ەقىۇ-عا توراعالىعى بارىسىنداعى ءىس-قيمىلدارىن دا اركەز قولدايتى­نىن جەتكىزدى. ونىڭ ايتۋىنشا, ۋكراينا قولداۋ كورسەتەدى دەپ ءۇمىت ارتىلىپ وتىرعان ەقىۇ ءسامميتى تەك استانادا ءوتۋى ءتيىس. بىزدەر ەكىجاقتى بايلانىستاردىڭ كەستەسىن جاساپ, قازاقستان – ۋكراينا قا­رىم-قاتىناسىن جانداندىرۋعا قۋاتتى سەرپىن بەرەتىن ماسەلەلەردى ىڭعايلاستىرۋىمىز كەرەك, دەدى ۋكراينا سىرتقى ساياسات ۆەدوم­ستۆوسىنىڭ باسشىسى. ال تمد-عا مۇشە ەلدەر سىرتقى ىستەر مينيسترلەرى كەڭەسىنىڭ كەزەكتى وتىرىسى اياقتالعاننان كەيىن رەسەي فەدەراتسياسىنىڭ سىرتقى ىستەر ءمينيسترى سەرگەي لاۆروۆ پەن تمد اتقارۋ كوميتەتىنىڭ توراعاسى – اتقارۋشى حاتشىسى سەرگەي لەبە­دەۆ جۋرناليستەرگە ارناپ قىسقاشا بريفينگ وتكىزدى. س.لاۆروۆ كەڭەستە قارالعان ماسەلەلەر تۋرالى ايتا كەلىپ, ۇلى وتان سوعىسىنداعى جەڭىستىڭ 65 جىلدىعىنا باسا نازار اۋدارىلعانىنا توقتالدى. سونداي-اق سىرتقى ساياسات ماسەلەسىنە قاتىستى ءىس-قيمىلداردى ۇيلەستىرۋ ىسىنە ءمان بەرىلگەنىن اتاپ ءوتتى. گۋمانيتارلىق باعىت, شەكارا, ميگراتسيالىق ساياسات, قۇقىق قورعاۋ سالالارىنداعى ءىس-قيمىلداردى رەتتەپ وتىرۋ جايىن جان-جاقتى تالقىلادىق. كەلەسى جىلى تمد-عا 20 جىل تولادى. وسىعان وراي دا ورتاق اتقارىلاتىن جۇمىستار ماسەلەسىن قاراستىردىق. ونىڭ ىشىندە تمد-نى ودان ءارى قاراي دامىتۋدىڭ تۇجىرىمداماسى دا بار, دەدى رەسەي سىرتقى ساياسات ۆەدوم­ستۆوسىنىڭ باسشىسى. قازاقستاننىڭ ەقىۇ-عا توراعالىعىنا قاتىستى قويىلعان سۇراققا جاۋابىندا س.لاۆروۆ بىلاي دەدى: “قازاقستاننىڭ ۇيىمداعى باستامالارىن دوستاستىق ەلدەرى تولىقتاي قولدايدى. ويتكەنى, ءبارى دە حالىقارالىق قوعامداستىق ءۇشىن ماڭىزدى ماسەلەلەر بولىپ تابى­لادى. وكىنىشكە قاراي, كەيبىر مەم­لەكەتتەر ەقىۇ-نى ءوز مۇددەلەرىنە قاراي بەيىمدەگىسى كەلەدى. بىراق, ۇيىم ەشقاشان ءوزىنىڭ قاعيدات­تا­رىنان اۋىتقىماۋى, ەشكىمنىڭ ىعىنا جىعىلماۋى ءتيىس”. سامات مۇسا.