مىسالعا, سارقان اۋدانىنىڭ ەكىاشا اۋىلىنداعى ورتا مەكتەپتىڭ جاعدايى سىن كوتەرمەيدى. بۇل تۋرالى جاقىندا پارلامەنت سەناتىنىڭ جالپى وتىرىسىندا دەپۋتات ءلاززات سۇلەيمەن مالىمدەدى. ەلىمىزدىڭ ءبىلىم جانە عىلىم ءمينيسترى اسحات ايماعامبەتوۆ پەن دەنساۋلىق ساقتاۋ ءمينيسترى ەلجان ءبىرتانوۆتىڭ اتىنا دەپۋتاتتىق ساۋال جولداعان سەناتور «ەكىاشا ورتا مەكتەبى» كوممۋنالدىق مەملەكەتتىك مەكەمەسىنىڭ عيماراتى 1969 جىلى قولدانىسقا بەرىلگەنىن ايتىپ, ءالى كۇنگە دەيىن جوندەۋ كورمەگەنىنە توقتالدى.
– ءبىزدىڭ ەلىمىزدە 50 جىل بويىنا ەشقانداي كۇردەلى جوندەۋ جاسالماعان مەكتەپ عيماراتتارى بار. وكىنىشكە قاراي, سونىڭ ءبىرىن سايلاۋشىلارمەن كەزدەسۋ كەزىندە كوزىمىزبەن كوردىك. ەكىاشا اۋىلىنداعى مەكتەپ 1969 جىلى سالىنعان. قازىر مۇندا 433 وقۋشى نەگىزگى ءبىلىم السا, 34 بالا مەكتەپكە دەيىنگى تاربيەمەن قامتىلعان. مەكتەپتىڭ ءوزى 960 وقۋشىعا ارنالعان ەكەن. وسى ۋاقىت ىشىندە, ياعني, جارتى عاسىردا مەكتەپكە بىردە-ءبىر كۇردەلى جوندەۋ جۇمىستارى جۇرگىزىلمەگەن. ونىڭ ۇستىنە, مەكتەپ تاۋلى ايماقتا ورنالاسقان. كونە عيمارات ورنالاسقان اۋىل سەيسميكالىق قاۋىپتى ايماققا كىرەدى. اتا-انالار كەز كەلگەن تابيعي اپات جاعدايىندا بالا ومىرىنە قاتەر تونەتىنىنە الاڭداۋلى. مەكتەپتىڭ جاعدايىن 2018 جىلى كوميسسيا تەكسەرگەن. ساراپتاما قورىتىندىسىن جاساعان. كۇردەلى جوندەۋ جۇرگىزۋ تۋرالى سمەتالىق قۇجات تا دايىندالىپتى. بىراق جەرگىلىكتى اكىمدىك بۇل قۇجاتتى توقتاتىپ قويعان. جاقىن ارادا مەملەكەتتىك ساراپتامانىڭ ۋاقىتى بىتەدى, دەمەك ەكىاشا اۋىلىنداعى مەكتەپتى جوندەۋ جۇمىسى دا قايتىپ كوتەرىلمەۋى مۇمكىن, – دەيدى سەنات دەپۋتاتى ءلاززات سۇلەيمەن.
جالپى, وبلىستا مەكتەپ سالۋ ءىسى توقتاۋسىز ءجۇرىپ جاتىر. بىلتىر ءبىلىم سالاسى بويىنشا باستالعان 23 نىسان قۇرىلىسىنىڭ ون جەتىسى مەكتەپ عيماراتى ەكەن. نازارداعى نىساننىڭ ۇشەۋى پايدالانۋعا بەرىلگەن. قالعان مەكتەپ عيماراتىنىڭ قۇرىلىسى بيىل تولىق اياقتالۋى ءتيىس, ىسكە قوسىلاتىن نىساننىڭ سانى – 20. وسى ماقساتقا 7,9 ملرد تەڭگە جۇمسالىپ وتىر.
– ءۇش اۋىسىمدى مەكتەپتەردىڭ سانىن ازايتۋ ءبىزدىڭ باستى مىندەتىمىزگە اينالدى. بيىل جوباعا ەنگىزىلەتىن مەكتەپ قۇرىلىسىنىڭ سانىن كوبەيتەمىز. جەكە ينۆەستيتسيا ەسەبىنەن دە مەكتەپ سالۋدى ىنتالاندىرامىز. قازىر 13 مەكتەپتىڭ قۇرىلىسى ءجۇرىپ جاتىر. ونىڭ التاۋىن اياقتاپ, پايدالانۋعا بەرەمىز. وكىنىشكە قاراي, 3 اۋىسىمدى مەكتەپ سانىن بيىل وتىز سەگىزدەن وتىز ەكىگە دەيىن عانا تومەندەتە الامىز, – دەيدى وبلىس اكىمى اماندىق باتالوۆ.
ىرگەتاسى قۇيىلاتىن ءبىلىم وشاقتارىنىڭ ءبىرى تالدىقورعان قالاسىنىڭ 8-شاعىن اۋدانىندا ورنالاسپاق. عيمارات 1200 ورىنعا لايىقتالىپ جوبالانىپتى. ال قالا ماڭىنداعى كوتتەدج قالاشىعىنا 900 وقۋشى ءبىلىم الاتىن مەكتەپ سالىنباقشى. بىراق 2 مەكتەپ تە الداعى جاڭا وقۋ جىلى باستالعانشا سالىنىپ ۇلگەرمەيدى ەكەن. ويتكەنى قۇرىلىسقا جاۋاپتى تالدىقورعان قالاسىنىڭ اكىمدىگى ءالى جوبالاۋ جۇمىستارىن دا جۇرگىزبەگەن.
الماتى وبلىسى
