كەنشىلەر استاناسىندا ۇيىمداستىرىلعان «قانسونار-2020» بايقاۋى اياسىندا تازى تۇقىمداس يتتەر ارنايى تىركەۋدەن وتكىزىلىپ, ەلەكتروندى تولقۇجاتتار بەرىلدى. يگى شارا بارىسىندا قۇماي تازىلاردىڭ جىلدامدىعى سىنالعان جارىس ءوتىپ, دەمەۋشىلەر ەسەبىنەن جينالعان 300 مىڭ تەڭگەلىك جۇلدە قورى ساراپقا سالىندى.
جەلدەن جۇيرىك تازىلاردىڭ بۇل سايىسىنا وبلىستىڭ تۇكپىر-تۇكپىرىنەن اكەلىنگەن جۇزگە تارتا تازى قاتىستىرىلدى.
جارىستى ۇيىمداستىرۋشىلاردىڭ ءبىرى, سپورت سالاسىنىڭ مامانى بالعاباي نۇرلانوۆ اتالعان سايىستىڭ باستى ماقساتى رەسپۋبليكالىق بايقاۋدا وبلىس اتىنان سىنعا تۇسەتىن جۇيرىك تازىلاردى ىرىكتەۋ ەكەن. ء«بىزدىڭ وبلىسىمىزدا تازى تۇقىمىنىڭ ساقتالۋىنا, ونى اتادان قالعان مۇرا رەتىندە ءارى قاراتا دامىتۋعا ۇلكەن ءمان بەرىلىپ كەلەدى», دەيدى مامان.
جارىس قورىتىندىسى بويىنشا «ۇزدىك قۇماي تازى» سىنىندا نۇرا اۋدانىنان كەلگەن نۇرداۋلەت مىرزاحانوۆتىڭ «كوكسۇلۋى» باس جۇلدەنى جەڭىپ الدى. ارلان تازىلار اراسىنداعى سايىستا اباي اۋدانىنىڭ وكىلى امانتاي تولەگەن قوسقان «مايلاق» اتتى تازى توپ جاردى. ۇرعاشى تازىلاردىڭ جارىسىندا قاراعاندىنىڭ تۇرعىنى ماديار ماحاتوۆتىڭ «اق جەلكە» دەگەن ءيتى ۇزدىك شىقتى. سونداي-اق وسى تازى جالپى جارىستا دا وزىپ شىعىپ, يەسىن باس جۇلدەگە جەتكىزدى. ال ءبىر قار باسقان كۇشىك تازىلار اراسىنداعى جىلدامدىق سىنالعان دودادا نۇرالىق الىشەر دۇيسەنباەۆتىڭ «تۇيعىنى» باس جۇلدەنىڭ يەگەرى اتاندى.
جارىستىڭ جەڭىمپازدارى مەن جۇلدەگەرلەرى وبلىستىق دەنە شىنىقتىرۋ جانە سپورت باسقارماسىنىڭ العىس حاتتارىمەن جانە اقشالاي سەرتيفيكاتتارمەن ماراپاتتالدى.
قاراعاندى
