قوعام • 06 اقپان، 2020

مەملەكەتكە 32 ملرد تەڭگە قايتارىلدى

32 رەت كورسەتىلدى

باس پروكۋراتۋرادا وتكەن بريفينگ-2019 جىلعى جۇمىس قورىتىندىلارى مەن پروكۋراتۋرا ورگاندارىنىڭ نەگىزگى فۋنكتسيالارىنا، جوعارى قاداعالاۋدىڭ ماڭىزدىلىعىنا ارنالدى.

رەسمي وكىل وكسانا پەتەرس ءمالىم ەتكەندەي، وتكەن جىلى انىقتالعان قۇقىق بۇزۋشىلىق بويىن­شا جاۋاپكەرشىلىككە 19 مىڭ ادام تارتىلدى.  مەملەكەتكە 32 ملرد تەڭگە قايتا­رىل­عان. پروكۋرورلاردىڭ قولداۋحاتتارى مەن نارا­زى­لىقتارى بويىنشا ازاماتتىق جانە اكىم­شىلىك ىستەر بويىنشا 1025 سوت اكتىلەرىنىڭ كۇشى جويىلدى جانە وزگەرتىلدى.

بريفينگتە مۇگەدەكتەردىڭ، ونىڭ ىشىندە مۇم­كىندىگى شەكتەۋلى بالالاردىڭ قۇقىقتارى قالاي ساقتالاتىنى ايتىلدى.

«7 مىڭ مۇگەدەكتەن 90 ملن تەڭگەگە زاڭسىز سالىق ۇستاپ قالۋ فاكتىلەرى ورىن العان. ۇزاق ۋاقىتتان بەرى مۇگەدەك بالالاردى وقىتاتىن مەكتەپتەردىڭ 30 مىڭنان استام مۇعالىمىنە – زاڭ بويىنشا تيەسىلى 40 پايىز مولشەرىندە ۇستەماقى تولەنبەي كەلگەن. ءبىزدىڭ ارالاسۋىمىزدان كەيىن قازىر بۇل تولەمدەر ىسكە اسىرىلۋدا»، دەدى وكسانا پەتەرس.

باس پروكۋروردىڭ نۇسقاۋى بويىنشا بالا­لارعا قارسى قىلمىستار مەن زورلاۋ قىلمىستارىن تەرگەپ-تەكسەرۋگە جانە اشۋعا ماماندانعان 96 جە­دەل تەرگەۋ توبى قۇرىلدى. ولاردىڭ قۇرا­مىندا تاجىريبەلى تەرگەۋشى جانە پروكۋرور ايەل­دەر بار. مۇنداي ىستەردى تەرگەپ-تەكسەرۋ ادىس­تەمەسى  ازىرلەنگەن. ناتيجەسىندە جىنىستىق قىلمىستاردى تەرگەپ-تەكسەرۋ تيىمدىلىگى 42% ءوستى.

قازاقستاندىق جانە شەتەلدىك جۇمىسكەرلەر اراسىندا ەڭبەكاقى تولەۋدەگى تەپە-تەڭسىزدىكتىڭ 500-گە جۋىق فاكتىسى انىقتالعان. بارلىق زاڭ بۇزۋ­شىلىقتار بويىنشا ءتيىستى شارالار قابىل­دانعان.  

وتكەن جىلى پروكۋرورلار قىزمەتتىك ءۇي-جاي­لاردان 752 ادامدى بوساتتى. 295 ادامدى نەگىزسىز قۋدالاۋدى توقتاتقان.  تەرگەپ-تەكسەرۋدى توقتاتۋ جانە مەرزىمدەرىن ءۇزۋ تۋرالى 16 مىڭنان استام قاۋلى­نىڭ كۇشى جويىلعان.

پروكۋرورلاردىڭ شارالارى بويىنشا ءبىر جارىم مىڭداي ازاماتقا قاتىستى ۇكىمدەر قايتا قا­رال­دى.

بۇل رەتتە 572 سوتتالعان ادامنىڭ جاعدايى جاقساردى، ياعني ولاردىڭ جازاسى مەن ايىپتاۋ كولە­مى تومەندەتىلدى. باس پروكۋراتۋرانىڭ باستاماسىمەن 41 ادام اقتالعان.

 

 

 

سوڭعى جاڭالىقتار

ۇقساس جاڭالىقتار