مۇنداي كەلىسىمگە الماتى اكىمى باقىتجان ساعىنتاەۆتىڭ Valmont Industries كومپانياسىنىڭ جاھاندىق وپەراتسيالار بويىنشا ۆيتسە-پرەزيدەنتى روبەرت گيللەنمەن كەزدەسۋى بارىسىندا قولجەتتى. يرريگاتسيالىق جۇيەلەردى شىعارۋ جونىندەگى ينۆەستيتسيالىق جوبانىڭ قۇنى 50 ملن دوللار.
كەزدەسۋ بارىسىندا كومپانيانىڭ مەحانيكالاندىرىلعان يرريگاتسيالىق ماشينالاردى شىعاراتىن الەمدەگى ءىرى ءوندىرىس ورنى ءارى ديستريبيۋتور ەكەنى اتاپ ءوتىلدى.
الماتىنىڭ وندىرىستىك الاڭ رەتىندە تاڭدالۋى كەزدەيسوق ەمەس. لوگيستيكا جانە جوبانى ىسكە اسىرۋ ءۇشىن ۇسىنىلاتىن مۇمكىندىكتەر تۇرعىسىنان قاراعاندا قالا ينۆەستورلار ءۇشىن تارتىمدى.
«سىزدەردىڭ يندۋستريالدى ايماقتا بولۋلارىڭىز الماتىنىڭ جوعارى ينۆەستيتسيالىق تارتىمدىلىعىنىڭ تاعى ءبىر دالەلى جانە قالامىزداعى ينۆەستيتسيالىق وندىرىسكە قارجى سالۋ بويىنشا وزگە حالىقارالىق كومپانيالارعا ۇلگى بولىپ تابىلادى», - دەپ اتاپ ءوتتى باقىتجان ساعىنتاەۆ.
بۇگىنگى كۇنى الماتىنىڭ يندۋستريالدى ايماعىندا 43 كومپانيا جوبالاردى ىسكە اسىرۋعا كىرىسىپ كەتتى, ولاردىڭ 9-ى شەتەلدىك كومپانيانىڭ قاتىسۋىمەن جۇرۋدە. ينۆەستيتسيانىڭ جالپى سوماسى - 181 ملرد تەڭگە. مۇندا 6,7 مىڭنان استام جۇمىس ورنى قۇرىلاتىن بولادى.
8 كاسىپورىن پايدالانۋعا بەرىلدى, ينۆەستيتسيانىڭ جالپى سوماسى - 26,6 ملرد تەڭگە. 985 جۇمىس ورنى اشىلاتىن بولادى.
اعىمداعى جىلى قۇنى 24,1 ملرد تەڭگە بولاتىن 14 جوبانى ىسكە اسىرۋ, 1369 جۇمىس ورنىن قۇرۋ جوسپارلانعان.
