دەنساۋلىق ساقتاۋ سالاسىندا 2019 جىلى 4 جوبا ىسكە اسىرىلدى. «بالالارعا ءومىر سىيلا» ناۋقانى اياسىندا اۋىر دياگنوزدارمەن اۋىراتىن 258 بالا شەتەلدىك كلينيكالاردا ەم الدى. بمس دياگنوزى بار 1 560 بالا «قاسيەتتى جول» وڭالتۋ ورتالىقتارىندا تەگىن وڭالتۋدان ءوتتى. ەمدەۋ ناتيجەسىندە بارلىق بالالاردا دەنساۋلىقتارىنىڭ جاقسارۋى بايقالادى. سونىمەن قاتار 67 000-نان استام ادام مەديتسينالىق پويىزداردا تەكسەرۋدەن ءوتتى.
ءبىلىم بەرۋ جانە كاسىپتىك باعدار بەرۋ سالاسىندا - 13 جوبا جۇزەگە اسىرىلدى. اتاپ ايتقاندا, ينكليۋزيانى دامىتۋ ءۇشىن نۇر-سۇلتان قالاسىندا رەسۋرستىق كابينەت پەن ورتالىق اشىلدى. بۇل «ەرەكشە» بالالارعا ءبىلىم بەرۋدە تەڭ مۇمكىندىكتەر الۋعا, قوعامدىق ومىرگە قوسىلۋعا, الەۋمەتتەنۋگە كومەكتەسەدى. سونداي-اق 2 قوسىمشا وتباسىلىق اۋلا كلۋبى اشىلدى, جاڭاوزەن قالاسىنىڭ مەكتەپتەرىنە 3 اۆتوبۋس ساتىپ الىندى جانە وزگە دە جوبالار جۇزەگە استى.
سونداي-اق 600 ءجاسوسپىرىم «تۋعان ەلگە ساياحات» ەكسكۋرسيالىق جوباسىنا قاتىسىپ, ەلىمىزدىڭ ەڭ قىزىقتى تۋريستىك نىساندارىن ارالادى. ونىڭ ىشىندەگى 500 قاتىسۋشى - ەلىمىزدىڭ شالعاي اۋداندارىندا تۇراتىن «سامۇرىق-قازىنا» اق كومپانيالار توبى قىزمەتكەرلەرىنىڭ كوپ بالالى, تولىق ەمەس وتباسىلارىنىڭ بالالارى. تاعى 100 قاتىسۋشى - شەتەلدە تۇراتىن ەتنيكالىق قازاقتاردىڭ بالالارى جانە شىعارماشىلىق بايقاۋدىڭ جەڭىمپازدارى.
7 جوبا حالىقتىڭ الەۋمەتتىك وسال توپتارىن قولداۋ باعىتىندا ىسكە اسىرىلدى. ماسەلەن, 1 470 ۇوس ارداگەرى مەن تىل ەڭبەككەرى الەۋمەتتىك-تۇرمىستىق كومەك الدى, جاڭاوزەن قالاسىنداعى «العا» مۇگەدەكتەر كلۋبى سپورتتىق ترەناجەرلارمەن جابدىقتالدى.
سونىمەن قاتار 2019 جىلى «ارەكەت» الەۋمەتتىك كاسىپكەرلىكتى دامىتۋ جوباسىن ىسكە اسىرۋ جالعاستىرىلدى. 2019 جىلى وعان قازاقستاننىڭ 290 كوممەرتسيالىق ەمەس ۇيىمى ءوتىنىم بەردى. ىرىكتەۋدىڭ بىرنەشە كەزەڭدەرىنەن ءوتىپ, 51 كەۇ-نىڭ 100-دەن استام ادامى الەۋمەتتىك كاسىپكەرلىككە وقىتۋدان ءوتتى, ونىڭ ىشىندە 25 كەۇ جەڭىمپاز اتاندى. ولارعا 3 ملن تەڭگەگە دەيىنگى كولەمدە گرانتتار بەرىلدى.
«Samruk-Kazyna Trust» قورى ءتۇرلى باعىتتاردا, سونىڭ ىشىندە دەنساۋلىق ساقتاۋ, ءبىلىم بەرۋ, الەۋمەتتىك كاسىپكەرلىك, بۇقارالىق سپورت جانە تاعى باسقا جوبالاردى جۇزەگە اسىرادى. 2020 جىلى «تاريحي» جوبالاردى – «مەديتسينالىق پويىز», «جاس دارىندار», «جەڭىس» ىسكە اسىرۋدى جالعاستىرۋ, سونداي-اق بىرقاتار جاڭا جوبالاردى ىسكە اسىرۋ جوسپارلانۋدا», - دەپ اتاپ ءوتتى «Samruk-Kazyna Trust» قورىنىڭ باس ديرەكتورى دياس ازبەرگەنوۆ.
ايتا كەتەيىك, «Samruk-Kazyna Trust» قورى سوڭعى 5 جىلدا قايىرىمدىلىققا 60 ميلليارد تەڭگەدەن استام قارجى ءبولىپ, 1 ميلليوننان استام ادامعا كومەك قولىن سوزدى.
سونداي-اق اتالعان قور ۇكىمەتتىك ەمەس ۇيىمدارمەن, سونىڭ ىشىندە «دارا» جق, «مەيىرىمدىلىك» ەرىكتى قوعامى» قق, «زامانداس 21» قق, «قاسيەتتى جول» ققق جانە تاعى دا باسقا ۇيىمدارمەن بىرلەسىپ قايىرىمدىلىق جوبالاردى جۇزەگە اسىرادى.
ەسكە سالا كەتەيىك, «سامۇرىق-قازىنا» اق كومپانيالار توبىنىڭ اتىنان قايىرىمدىلىق قىزمەتىنىڭ بىرىڭعاي وپەراتورى «Samruk-Kazyna Trust» الەۋمەتتىك جوبالاردى دامىتۋ قورى بولىپ تابىلادى. «Samruk-Kazyna Trust» قورى حالىق ءۇشىن الەۋمەتتىك ماڭىزدى ماسەلەلەردى شەشۋگە باعىتتالعان قايىرىمدىلىق جوبالار مەن باعدارلامالاردى جۇزەگە اسىرادى.
