بولجام بويىنشا, وبلىس ورتالىعىنداعى كاسىپورىنداردىڭ جۇمىسىن جانداندىرۋ ءۇشىن 2019-2023 جىل ارالىعىندا 28,7 ملرد تەڭگە ينۆەستيتسيا جۇمسالۋى ءتيىس ەكەن. وتكەن جىلى بۇل باعىتتا يگەرىلگەن قارجى 2 ملرد تەڭگەنى قۇراپتى. ناتيجەسىندە جاڭادان 3 ءوندىرىس ورنى ىسكە قوسىلىپ, 2 كاسىپورىننىڭ قۋاتى ارتقان. ال تۇراقتى جۇمىس ورىنىن اشۋ كورسەتكىشى قىرىق جەتىگە دەيىن جەتىپتى. بيىل دا ءوندىرىستى وركەندەتۋگە 6,6 ملرد تەڭگە جۇمسالماقشى.
ينۆەستيتسيالىق جوبالاردىڭ اراسىندا بىرنەشە ءىرى ءوندىرىس ورنى بار. ماسەلەن, «جەتىسۋ ماجيكو» اگروكەشەنىنە قاراستى قۇراما جەم دايىندايتىن زاۋىت قۇرىلىسىنىڭ ءبىرىنشى كەزەڭى اياقتالدى. جوبانىڭ قۇنى 5,8 ملرد تەڭگە شاماسىندا. العاشقى كەزەڭدە 45 ادامدى تۇراقتى جۇمىسپەن قامتيتىن كاسىپورىن تولىق ىسكە قوسىلعاننان كەيىن 355 جۇمىس ورىنىن اشادى. ال كەراميكالىق گرانيت تاقتالارىن شىعاراتىن «الماز كەراميكس» زاۋىتىنىڭ جۇمىسى ءساۋىر ايىندا باستالماق. ينۆەستيتسيالىق جارعىلىق قورى 13,9 ملرد تەڭگەنى قۇرايتىن جوبا 2023 جىلى تولىقتاي اياقتالماق. العاشقى كەزەڭنىڭ وزىندە 100 ادامدى جۇمىسقا قابىلدايتىن كاسىپورىننان تۇبىندە 338 جۇمىسشى ناپاقاسىن تاپپاق.
سونداي-اق «تالدىقورعان» يندۋستريالدى اۋماعىندا ىسكە قوسىلاتىن «لۋنيۋان جەتىسۋ» ەت وڭدەۋ زاۋىتى مەن «Green Technology Partners» سەرىكتەستىگىنىڭ قۇرعاق جەم زاۋىتىنا دا جالپى قۇنى 9 ملرد تەڭگە ينۆەستيتسيا جۇمسالعان. بيىل «JLC ءسۇت» زاۋىتىنىڭ قوسالقى تسەحىنىڭ قۇرىلىس باستالادى, ول ءۇشىن قالا اۋماعىنان 6 گەكتار جەر تەلىمى بولىنگەن. ءوندىرىس ىسكە قوسىلعاندا جاڭادان 290 جۇمىس ورىنى تاعى اشىلۋى ءتيىس.
