قازاقستان • 05 اقپان، 2020

ينۆەستيتسيالىق جوبالاردى ىلگەرىلەتۋ ماسەلەلەرى تالقىلاندى

71 رەتكورسەتىلدى

سەناتتا ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ مۇشەلەرى «Kazakh Invest» اكتسيونەرلىك قوعامىنىڭ، ۇلتتىق ەكونوميكا جانە اۋىل شارۋاشىلىعى مينيسترلىكتەرىنىڭ وكىلدەرىمەن كەزدەستى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.

جۇزدەسۋدە اگروونەركاسىپ كەشەنىنە ينۆەستيتسيالىق جوبالاردى تارتۋ جانە ونى ىلگەرىلەتۋ، اۋىل شارۋاشىلىعى ونىمدەرىن قايتا وڭدەۋ نارىعىنداعى ينۆەستورلارعا راقىمشىلىق جاساۋ، سونداي-اق اگروونەركاسىپ كەشەنىن مەملەكەتتىك قولداۋ ماسەلەلەرى تالقىلاندى.

«Kazakh Invest» اق-نىڭ توراعاسى باۋىرجان سارتباەۆ بوس جەر ۋچاسكەلەرىنىڭ جوقتىعى تۋرالى ماسەلەنى اتاپ ءوتتى. ۇلتتىق كومپانيا توراعاسىنىڭ ايتۋىنشا، جوباعا لايىقتى جەر ۋچاسكەلەرى جەكە مەنشىكتە نەمەسە وندا اگروتەحنيكالىق تالاپتار ساقتالماي وتىر. وسى پروبلەمانى كەشەندى شەشۋ ءۇشىن ول جەردى جاپپاي تسيفرلاندىرۋ جانە ونى پايدالانۋ مەن جاي-كۇيىنە مونيتورينگ جۇرگىزۋدى ۇسىندى.

سەناتور داۋرەن ادىلبەكوۆ اۋىل شارۋاشىلىعىنىڭ تەحنيكالىق جابدىقتالۋىنا نازار اۋدارىپ، ودان ءارى ۇلعايتۋ مەن دامىتۋ تۋرالى سۇراق قويدى.

جۇمىس بابىنداعى كەزدەسۋ بارىسىندا ۇلتتىق ەكونوميكا ءمينيسترىنىڭ ورىنباسارى جاسۇلان ماديەۆ اگروونەركاسىپ سالاسى بۇگىنگى كۇنى سالىق زاڭناماسىمەن ىنتالاندىرۋ قالاي ءجۇرىپ جاتقانى تۋرالى ايتتى. مەملەكەت اگروونەركاسىپ بيزنەس سۋبەكتىلەرى ءۇشىن ارنايى سالىق ءتارتىبى تۇرىندە سالىقتاردى تولەۋدىڭ وڭايلاتىلعان ءتارتىبىن كوزدەيتىن جەڭىلدەتىلگەن سالىق سالۋ جۇيەسىن ۇسىندى.

«بۇل شارا اۋىل شارۋاشىلىعى ونىمدەرىن قايتا وڭدەۋدى ىنتالاندىرۋعا، دايىن وتاندىق ءونىم ءوندىرىسىنىڭ كولەمىن ارتتىرۋعا مۇمكىندىك بەرەدى. الايدا تاجىريبە كورسەتكەندەي، قابىلدانعان شارالارعا قاراماستان، ەكونوميكا سالالارىندا وڭ ناتيجەگە قول جەتكىزۋ مۇمكىن بولمادى»، - دەدى ج.ماديەۆ.

ءمينيستردىڭ ورىنباسارى سالىققا راقىمشىلىق جاساۋ – ەكونوميكانى دامىتۋ ءۇشىن ءتيىمسىز اكت ەكەنىن جانە ونى ودان ءارى جۇرگىزۋدىڭ تيىمسىزدىگىن دە اتاپ ءوتتى.

اگروونەركاسىپ كەشەنىن دامىتۋ تاقىرىبىن جالعاستىرا وتىرىپ، اۋىل شارۋاشىلىعى ءمينيسترىنىڭ ورىنباسارى ايداربەك ساپاروۆ ەلىمىزدە اگروونەركاسىپ كەشەنى سۋبەكتىلەرىنە بىرقاتار مەملەكەتتىك قولداۋ كورسەتىلەتىنىن اتاپ ءوتتى: جەڭىلدىكتى نەسيەمەن جانە ليزينگپەن قامتاماسىز ەتۋ، باسىم باعىتتاردى سۋبسيديالاۋ، سونداي-اق اگروونەركاسىپ كەشەنى سۋبەكتىلەرى ءۇشىن ارنايى سالىق سالۋ ءتارتىبى ەنگىزىلەدى. الايدا بىرىڭعاي ەكونوميكالىق كەڭىستىكتەگى ارىپتەستەرمەن سالىستىرعاندا كورشىلەس ەلدەردەگى اۋىل شارۋاشىلىعىن سۋبسيديالاۋداعى ارتىقشىلىقتاردى كورۋگە بولادى. مينيستر ورىنباسارىنىڭ ايتۋىنشا، اۋىل شارۋاشىلىعى مەملەكەتتىك قولداۋ دەڭگەيى جالپى ىشكى ونىمگە شاققاندا بەلارۋستە 8،1%-ىن، رەسەيدە-6،3%-ىن، ال بىزدە قازاقستاندا 5%-ىن قۇرايدى. بۇل رەتتە اگروونەركاسىپ كەشەنىنىڭ مەملەكەتتىك باعدارلاماسىن تولىق قارجىلاندىرۋدا جىلىنا شامامەن 140 ملرد تەڭگە جەتىسپەي كەلەدى.

«بۇگىندە قازاقستاندىق تاۋارلارعا قاراعاندا رەسەيلىك جانە وزبەك تاۋارلارى مەملەكەتتىك قولداۋ ەسەبىنەن باسەكەگە قابىلەتتى»، - دەدى ا.ساپاروۆ.

سەناتورلار كەزدەسۋ قورىتىندىسى بويىنشا سۋبسيديالارعا بولىنگەن قارجىنىڭ قانشالىقتى ءتيىمدى پايدالانىلعانىنا باعا بەرۋگە نيەتتەنىپ وتىر. ول ءۇشىن اۋىل شارۋاشىلىعى مينيسترلىگى 28 اقپانعا دەيىن ەسەپتەۋ ادىستەمەسىن بەرۋى ءتيىس، ودان كەيىن مەملەكەتتىك قولداۋ كولەمىن ودان ءارى ۇلعايتۋ تۋرالى شەشىم قابىلداناتىن بولادى.

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ۇقساس جاڭالىقتار