«مەن وسى كورىنىستى ءوز كوزىممەن كوردىم. كەپتەلەكتە ۇزاق تۇرىپ قالامىن با دەپ الاڭداپ تۇرعانىمدا, جىلدام وتكىزىپ جىبەردى. كولىك جۇرگىزۋشىلەرى «جارايسىڭ!», دەپ ماقتاپ جاتتى», دەيدى كولىك جۇرگىزۋشىسى اسحات تاجىباەۆ.
وسىلايشا ءبىر ساتتە-اق شىمكەنتتىكتەردىڭ ىقىلاسىنا بولەنگەن وسكىننىڭ ەسىمى – داستان ومىرتاەۆ. ول سول كۇنى جاتتىعۋدان ۇيىنە قايتىپ كەلە جاتىپتى. كوشە قيىلىسىندا باعدارشام ءوشىپ, كەپتەلەك تۋعان ساتتە جاقىن ماڭدا پوليتسەيلەر جوق ەكەنىن ءتۇسىنىپ, بىردەن كومەككە ۇمتىلىپتى. كولىك جۇرگىزۋشىلەرىن ءوزىنىڭ قول قيمىلدارى ارقىلى باعىتتاپ, جاعدايدى ءوز باقىلاۋىنا العان. وسىلايشا كوشە قيىلىسىنداعى كولىك ىركىلىسسىزدىگىن قالپىنا كەلتىرگەن.
«قالادا پوليتسەيلەر كولىك كەپتەلەگىن قالاي رەتتەيتىنىن بىرنەشە رەت كورگەنمىن. ولاردىڭ ىستەگەنىن قايتالادىم. راس, تاياقشام مەن ىسقىرىعىم بولمادى. سول ءۇشىن باعىتتى تەك قولىممەن كورسەتىپ تۇردىم. كەپتەلەكتەن شىققان كولىك جۇرگىزۋشىلەرى ماعان باس بارماقتارىن كورسەتىپ, العىس ءبىلدىرىپ جاتتى», دەيدى شىمكەنت قالاسىنداعى №114 جالپى ورتا ءبىلىم بەرەتىن مەكتەپ وقۋشىسى.
ءاۋ باستا, مەكتەپ وقۋشىسىنىڭ اتا-اناسى جەلىدە تارالعان ۆيدەونى كورگەندە قاتتى ۋايىمداعان. بالاسىنان كەلەسى جولى مۇنداي ارەكەتتى قايتالاماۋدى سۇراپتى. سىنىپ جەتەكشىلەرى دە وقۋشىمەن ءوزارا اڭگىمەلەسكەن.
«داستاننىڭ كوشەدەگى ادامدارعا كومەكتەسكەنى جاقسى. ءبىز وعان العىس ايتتىق. دەگەنمەن, قاۋىپسىزدىك ماسەلەسىن نازاردا ۇستاۋدى ءتۇسىندىرىپ, اتا-اناسىمەن سويلەستىك. ەگەر دە اينالاسىندا قانداي دا ءبىر جاعداي بولا قالسا, شۇعىل قىزمەتتەرگە حابارلاسۋ كەرەكتىگىن جەتكىزدىك», دەيدى №114 جالپى ورتا مەكتەپتىڭ ديرەكتورى اسقار ومىراليەۆ.
ال مۇعالىمدەرى مەن سىنىپتاستارى 7-سىنىپ وقۋشىسىنىڭ ءاردايىم اينالاسىنا كومەكتەسۋگە دايىن تۇراتىندىعىن ايتادى. ازىرگە وقۋشىنىڭ بۇل ءىس-ارەكەتى قوعامنىڭ جاقسى باعالاۋىنا يە بولۋدا. پوليتسەيلەر بولسا, الداعى ۋاقىتتا ۆيدەونى زەرتتەپ, بالاقايعا ءوز باعالارىن بەرمەك.
شىمكەنت
