ستۋدەنتتەر ەندى كەڭسە تاۋارلارى مەن وقۋعا قاجەتتى قۇرالداردى ساتۋشىنىڭ كومەگىنسىز وزدەرى ساتىپ الا الادى. اتالعان دۇكەندە ءاربىر تاۋاردىڭ باعاسى جازىلعاندىقتان تۇتىنۋشى وزىنە قاجەتتى دۇنيەنى العان سوڭ قارجىسىن كاسسا اپپاراتتارىن الماستىرعان ارنايى جاشىككە سالادى.
«مۇنداي دۇكەندەردى اشۋ جاستاردى پاراساتتىلىق پەن ادالدىققا تاربيەلەيدى. بۇل ۋنيۆەرسيتەت جاستارىنا ءاربىر ءىس-ارەكەتىن ويلانىپ, باعامداپ بارىپ جاساۋعا جول كورسەتەدى», دەيدى ۋنيۆەرسيتەت رەكتورى داريا قوجامجاروۆا.
سونداي-اق وسى كۇنى جوعارى وقۋ ورنىندا «پاراسات» مەكتەبى دە جۇمىس ىستەي باستادى. اتالعان جوبا ەل ەرتەڭى جاستارعا «سانالى ۇرپاق», «ىزگىلىك ەلشىسى» باعىتى بويىنشا تاربيە بەرمەك. وسى باعىت بويىنشا جاستار وڭىردەگى ساۋلەلى عۇمىر كەشكەن, ادالدىقتى تۋ ەتكەن تۇلعالارمەن كەزدەسىپ, پىكىر الماسادى. تاربيە مەكتەبىندە جەمقورلىقتان ادا قوعام قۇرۋ ءۇشىن اۋقىمدى جۇمىس قولعا الىنباق.
ءىس-شاراعا سىبايلاس جەمقورلىققا قارسى ءىس-قيمىل اگەنتتىگىنىڭ شىمكەنت قالاسى بويىنشا دەپارتامەنتىنىڭ وكىلدەرى, «شىمكەنت – ادالدىق الاڭى» جوبالىق كەڭسەسىنىڭ جەتەكشىسى ەراسىل تولەباەۆ, ۋنيۆەرسيتەت وقىتۋشىلارى مەن ءبىلىم الۋشى ستۋدەنتتەر قاتىستى.
بۇگىنگى تاڭدا جەڭ ۇشىنان جالعاسقان سىبايلاس جەمقورلىقتىڭ الدىن الۋ ماقساتىندا جوعارى وقۋ ورنىنىڭ اۋماعىنا 16 ۇلكەن LED ەكران ورناتىلعان. وقۋ ماۋسىمىنىڭ سوڭىنداعى ءاربىر سىناقتى كەز كەلگەن ستۋدەنت وسى قۇرىلعى ارقىلى باقىلاي الادى.
«ستۋدەنتتەردىڭ قاتىسۋىمەن وقۋ پروتسەسىنىڭ تازالىعىنا مونيتورينگ جاسادىق. الەۋمەتتىك زەرتتەۋلەردىڭ ناتيجەسىندە ەمتيحاننىڭ تازالىعى 86 پايىزدى كورسەتىپ وتىر», دەيدى م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ رەكتورى داريا قوجامجاروۆا.
شىمكەنت
