شىعىپ قالعان دەپۋتاتتار ورنى تولىقتى

“قازاقستان رەسپۋبليكاسىنداعى سايلاۋ تۋرالى” قازاقستان رەسپۋبليكاسى كونستيتۋتسيالىق زاڭىنىڭ 101-بابى 4-تارماعىنا سايكەس وسى جىلدىڭ 28 ناۋرىزىندا ەلىمىزدىڭ 13 وڭىرىندەگى 52 سايلاۋ وكرۋگىندە ءماسليحاتتاردىڭ شىعىپ قالعان دەپۋتاتتارىنىڭ ورنىنا سايلاۋ وتكىزىلدى. ناتيجەسىندە 11 وبلىستىق, 7 قالالىق جانە 34 اۋداندىق ءماسليحاتتار دەپۋتاتتارى سايلاندى.ءبىر دەپۋتاتتىق مانداتقا ورتاشا باسەكەلەستىك ەكى كانديداتتان ءسال جوعارى بولدى. كانديداتتاردىڭ نەعۇرلىم كوپ سانى وڭتۇستىك قازاقستان وبلىسى ءماسليحاتى دەپۋتاتىنىڭ مانداتىنا №1 سايلاۋ وكرۋگى بويىنشا جانە اقمولا وبلىسى كوكشەتاۋ قالالىق ءماسليحاتى  دەپۋتاتىنىڭ مانداتىنا №4 سايلاۋ وكرۋگى بويىنشا 4 ادامنان كەلدى. سايلاۋ ناۋقانى بارىسىندا 149 كانديدات ۇسىنىلدى. ولاردىڭ 54-ءىن ساياسي پارتيالار, 2-ءۋىن قوعامدىق بىرلەستىكتەر ۇسىندى جانە 93 ۇمىتكەر ءوزىن-ءوزى ۇسىندى. ال “نۇر وتان” حدپ بارلىق 52 سايلاۋ وكرۋگىندە ءوز كانديداتتارىن ۇسىنعان ەدى. سايلاۋ بيۋللەتەندەرىنە 120 كانديداتتىڭ اتى-جوندەرى ەنگىزىلدى. ولاردىڭ ىشىندە 54 كانديدات ساياسي پارتيالاردىڭ مۇشەلەرى بولىپ تابىلادى, 51-ءى پار­تيادا جوقتار, تاعى 15-ءى وزدەرىنىڭ پارتياعا مۇشەلىگىن كورسەتپەگەن. داۋىس بەرۋ 28 ناۋرىزدا 316 سايلاۋ ۋچاسكەسىندە جۇرگىزىلدى. الدىن الا دەرەكتەر بويىنشا, سايلاۋشىلاردىڭ كەلۋى 77,4 پايىزدى قۇراعان. داۋىس بەرۋ بارىسى مەن داۋىستاردى ساناۋ ءراسىمىن كانديداتتاردىڭ جالپى سانى 863 سەنىم بىلدىرىلگەن ادامدارى, ساياسي پارتيالاردىڭ, قوعامدىق بىرلەس­تىكتەردىڭ جانە باق وكىلدەرى باقىلادى. ال سايلانعان 52 ءماسليحاتتار دەپۋتاتتارىنىڭ بارلىعى “نۇر وتان” حدپ مۇشەلەرى بولىپ تابىلادى. سايلانعان ءماس­لي­حاتتار دەپۋتاتتارىنىڭ 45-ءى ەر ادامدار, 7-ءۋى ايەلدەر. جالپى, سايلاۋ ناۋقانى سايلاۋ زاڭناماسى نورما­لارىنا سايكەس وتكىزىلدى. ورتالىق سايلاۋ كوميسسيا­سىنا شاعىمدار مەن وتىنىشتەر تۇسكەن جوق. ءاليسۇلتان قۇلانباي.