قاۋىپ كۇشەيە ءتۇستى

توتەنشە جاعدايلار ءمينيسترى ۆ.بوجكو مەن وبلىس اكىمى ب.ساپارباەۆ ەكى كۇندىك ساپاردان كەيىن وسكەمەندە وتكەن شتاب وتىرىسىندا وسىلاي دەدى ەلباسى ن.نازارباەۆتىڭ ارنايى تاپسىرماسىمەن توتەنشە جاعداي­لار ءمينيسترى ۆ.بوجكو باستاعان جەدەل توپتىڭ كەندى التايعا كەلىپ, توپان سۋ باسىپ جاتقان تارباعاتاي, زايسان, ءۇرجار, ۇلان اۋداندارىن ارالاپ, اپاتتى ءوز كوزدەرىمەن كورىپ, وسى ساتتە قينالعان تۇرعىندارمەن جۇزدەسۋى, ولارعا دەم بەرۋى كوپ­شى­لىكتى ءبىر سەرپىلتىپ تاستادى. اپات بولعان ايماقتارعا ۇكىمەت 849 ميل­ليون تەڭگە بولگەن, ول اۋداندار مەن قالالارعا كەلىپ تۇسە باستادى. ءما­سە­لەن, ريددەر – 160, كۇرشىم – 154, زايسان – 114, ءۇرجار – 53, وسكەمەن – 40, سەمەي 31 ميلليون تەڭگەگە يە بولعان. ازىرشە قار ءمول­شە­رىنىڭ 20 پايىزى عانا ەرىپتى. العاشقى ءبىر اپتادا كۇن قاتتى جىلىپ, كەيبىر سۋ قويمالارىن ءمول­شەردەن تىس جينالعان سۋ بۇزىپ, ەلدى مەكەندەردى باسىپ قالسا, بيىكتىگى بەس-التى مەتر مول قار كۇرت ەرىپ, اپاتتى جاعداي تۋدىرعانىن بىلەمىز. ارتىنشا كۇن سۋىپ, تۇر­عىنداردىڭ ەس جيىپ الۋلارىنا جاعداي جاسادى. مىنە, بىرەر كۇننەن بەرى كۇن قايتادان جىلىپ, حالىقتى ابىگەرگە سالۋدا. شتاب وتىرىسىن باستاعان وبلىس اكىمى بەردىبەك ساپارباەۆ ءۇرجاردان ورالعانىن, وندا ەگىنسۋ سۋ قوي­ما­سىمەن تانىسقاندارىن, وسكەمەندە دە سۋ باسۋ قاۋپى بار جەرلەردى كور­گە­نىن, قاردىڭ ەرۋىنەن قاۋىپتى جاع­دايدىڭ ورىن الىپ وتىرعانىن تىلگە تيەك ەتتى. ءۇرجاردا تۇرعىنداردىڭ اپاتپەن كۇرەسى اتاپ وتۋگە تۇرارلىق, ءاربىر ادام ءار كوشە, اۋلالاردى قا­تاڭ كۇزەتكە العان. سۋدىڭ كوزىن اشىپ, اۋلالاردى شايىپ كەتپەۋىن قاداعالاۋدا. الايدا, جاعداي بارلىق جەردە بىردەي ەمەس. بۇگىنگى كۇنى 33 مىڭ قوي-ەشكى, 7 مىڭ ءىرى قارا, مىڭداعان جىلقى ولگەن. جەتى مىڭ­نان استام ادام باسقا جەرلەرگە كوشى­رىلگەن. تارباعاتايدا تۇرعىندار مەكتەپتەر مەن كلۋبتاردا تۇرىپ جاتىر. ىستىق تاماق جەتكىزىلۋدە. بىراق حالىق الاڭداۋلى. 2 ساۋىردەن بالالاردىڭ ساباقتارىن جالعاستى­را­تىنىن, شامامىز كەلگەنشە بار­لىق جاعدايدى جاسايتىنىمىزدى ايتتىق, دەيدى ءوڭىر باسشىسى. ەلدى­گىمىز مەن ەرلىگىمىز تانىلاتىن سىن ساتتە رەسپۋبليكادان, ءار وبلىس تۇر­عىندارىنان كومەك الساق, العىستان باسقا ايتارىمىز جوق. سەبەبى, ءجۇز­دەگەن ادام ءۇي-كۇيسىز قالدى, تەك تاس­باستاۋ اۋىلىندا بىرنەشە ءۇي قي­راپ قالدى. قازىر ەلىمىزدىڭ بارلىق وبلىستارىنان تەحنيكا, ادامدار كومەككە كەلۋدە. تجم قاجەتتى تىك­ۇشاق, اۋىر تەحنيكالاردى جىبەردى. ءبىز بارا الماعان جەرگە ولار دەر كەزىندە جەتىپ, تالاي ادامدى سۋ تاسقىنىنان الىپ شىققانىنا كۋا بولدىق, دەيدى ايماق باسشىسى. ءتو­تەنشە جاعدايلار ءمينيسترى ۆ.بوجكو مينيسترلىكتىڭ 17 بولىمدەرىنىڭ وسىندا شوعىرلانعانىن, 544 ادام, 122 تەحنيكانىڭ جەتكىزىلگەنىن حابارلادى. كۇرشىم اۋدانىندا دا بىرنەشە اۋىلداردى سۋ الا باستادى. ابايداعى جاعداي بەلگىلى, اۋدان ورتالىعى قاراۋىلدى سۋ باسىپ, دەر كەزىندە جەتكەن كومەكتىڭ ارقاسىندا ادام ولىمىنە جول بەرىلمەدى. بىراق, قىرىلىپ جاتقان مال سانى كوبەيمەسە, ازايار ەمەس. وڭداسىن ەلۋباي, شىعىس قازاقستان وبلىسى.