ەلورداداعى ءماۋلىت كەشى

ناۋرىز مەيرامىنىڭ الدىندا “نۇر استانا” ورتالىق مەشىتىنىڭ ۇيىتقى بولۋىمەن ەلوردامىزداعى كونگرەسس-حولل سارايىندا ءماۋلىت ءراسىمى جوعارى دەڭگەيدە اتالىپ ءوتتى. كورەرمەندەر زالى حالىققا لىق تولىپ, ورىن جەتپەگەندەرى اياقتارىنان تىك تۇردى. ال زالعا سىيماعاندارى كەشتى فويەگە ورناتىلعان ەكران ارقىلى تاماشالادى. “استانا” مەدرەسەسىنىڭ ۇستازى سادۋاقاس قاري ولجاباەۆ قۇران وقىپ, ءىس-شارانىڭ شىمىلدىعىن اشقاننان كەيىن جۇرگىزۋشىلەر زەيىن الىپبەك پەن مەدەت شايكەلوۆ العاشقى قۇتتىقتاۋ ءسوزدى قازاقستان مۇ­سىلماندارى ءدىني باسقار­ماسىنىڭ نايب ءمۇفتيى, استانا قالاسىنىڭ باس يمامى قاليجان قاجى بايىربەك ۇلىنا بەردى. ول جينالعان جاماعاتقا ءماۋلىت جا­يىندا كەڭىنەن مالىمەت بەرىپ, پاي­عامبارىمىزدىڭ (س.ع.س.) ونەگەلى عۇمىر جولىنا, يسلام ءدىنىنىڭ ادامزاتتى يماندىلىققا باستايتىن قۇندىلىقتارىنا توقتالا كەلە, ەلوردا حالقىن الداعى ناۋرىز مەرەكەسىمەن قۇتتىقتادى. قازاقستان مۇسىلماندارى ءدىني باس­قارماسى پايعامبارىمىز مۇ­حاممەدتىڭ (س.ع.س.) ونەگەلى ءومىر جو­لىنا قاتىستى مەكتەپ وقۋشىلارى مەن ستۋدەنت جاستار اراسىندا شى­عارما بايگەسىن جاريالاعان بو­لاتىن. وسى ءماۋلىت كەشى بارىسىندا استانا قالاسى بويىنشا شىعارما بايگەسىنەن جۇلدەلى ورىندارعا ىلىككەن جاستارعا سىيلىقتار تا­بىستالدى. ءبىر قۋانىشتىسى, ستۋ­دەنتتەر اراسىنداعى باس جۇلدەنىڭ يەگەرى ساندۋعاش ورازباەۆا تەك استانا قالاسى بويىنشا ەمەس, رەسپۋبليكا كولەمىندە دە ءبىرىنشى ورىندى جەڭىپ الدى. ءماۋلىت كەشىنىڭ باستى ەرەك­شەلىگى – پايعامبارىمىزعا (س.ع.س.) سالاۋات ايتۋ. بۇل ءاربىر مۇسىل­ماننىڭ نەگىزگى مىندەتتەرىنىڭ ءبىرى بولىپ تابىلادى. ساحناداعى سالاۋاتتى “نۇر استانا” مەشىتىنىڭ قىزمەتكەرلەرىمەن بىرگە 63 مەدرەسە شاكىرتى دە وقىدى. ال بىرنەشە جىلدان بەرى وتكىزىلىپ كەلە جاتقان ەلوردالىق ءماۋلىتتىڭ رەسپۋب­لي­كا­مىزدىڭ وزگە وڭىرلەرىنە قارا­عان­داعى ءبىر ەرەكشەلىگى – تەاتر­لان­دىرىلعان كورىنىستىڭ قويىلۋى. ق.قۋانىشباەۆ اتىنداعى قازاق مۋزىكالىق دراما تەاترىنىڭ ارتىستەرى “ريم بيلەۋشىسى ھيراقل­دىڭ يسلامدى مويىنداۋى” اتتى ماعىنالى دا ءماندى كورىنىس قويىپ, جينالعان كوپشىلىكتى ءبىر تەبىرەنتتى. ايتىس ونەرى – ادامنىڭ كوڭىلىن كوتەرىپ قانا قويماي, ساناعا سا­لي­قالى وي سالاتىن ۇلتتىق قۇن­دى­لىق­تارىمىزدىڭ ءبىرى. وسىنى ەسكەرگەن استانالىق يمامدار بىل­تىردان بەرى ايتىس ونەرىن ءماۋلىت باعدار­لا­ما­سىنا ەنگىزىپ كەلەدى. بيىل جاس اقىن­دار جاق­سىلىق ور­ىن­باسار مەن ەربول جانات ءوزارا اي­تىستى. سو­­نىمەن بىرگە, كەش با­رىسىندا ەلى­مىزگە تانىمال بولىپ ءۇل­گەرگەن زاعيپ بالالاردان تۇراتىن ء“سات” تريوسى ەكى ءان شىرقاپ, قا­زاق­تىڭ ءداس­تۇرلى جىر-تەرمەلەرى ورىن­دا­لىپ, جاس اقىندار ولەڭدەرىن وقىدى. “نۇر استانا” مەشىتىنىڭ تاپ­سىرماسىمەن ءماۋلىت كەشىنىڭ ءان­ۇرانىنىڭ جازىلۋى – بۇل جىلعى ءماۋلىتتىڭ باستى جاڭالىعى بولعانى انىق. “اقيقات نۇرى” دەپ اتالاتىن ءماۋلىت ءانۇرانىنىڭ ءسوزىن اقىن سە­رىكزات دۇيسەنعازين, اۋەنىن بەلگىلى سازگەر ەرمۇرات ۇسەنوۆ جازعان. كەشتىڭ سوڭىندا انشىلەر مارات وماروۆ, جانقالدىبەك تولەنباەۆ, مەدەت شايكەلوۆ, ارمان عاب­دۋل­لين ءماۋلىت ءانۇرانىن شىر­قادى. ەندى الداعى جىلدارى دا ءماۋلىت كەشىندە وسى ءانۇراندى ورىنداۋ داستۇرگە ەنگىزىلمەك. كەش سوڭىندا ءسوز العان باس يمام قاليجان قاجى بايىربەك ۇلى زاڭقوەۆ بۇل ءماۋلىتتىڭ وتە جوعارى دەڭ­گەيدە ۇيىمداستىرىلعانىن اي­تىپ ءوتىپ, وسى ءىستىڭ باسى-قاسىندا ءجۇر­گەن ءدىن قىزمەتكەرلەرىنە, قول­عابىس تيگىزگەن ادامدارعا راحمەتىن جەتكىزدى. ەسكەندىر ەرعالي ۇلى. استانا.