ءشوپ تايلاعىشتار اقتوبەدە قۇراستىرىلادى

الەمدىك قارجى داعدارىسىنىڭ سالقىنىن سەزىنگەن كاسىپورىنداردىڭ ءبىرى – “متس تراكتور” جشس بولاتىن. كاسىپورىندى, ونداعى جۇمىس ورنىن ساقتاۋ, بەرەشەكتەرىن وتەۋگە قول جەتكىزۋ ماقساتىندا سەرىكتەستىكتى ساۋىقتىرۋ پروتسەدۋراسى جۇرگىزىلۋدە. وسى ماقساتتا وبلىس اكىمدىگىنىڭ ۇسىنىسى بويىنشا سەرىكتەستىك وبلىس اۋماعىندا ءشوپ تايلاعىشتار, ەكى قاتارلى تۇقىم سەپكىشتەر, كوپ سالالى توپىراق وڭدەۋ اگرەگاتتارىن  شىعاراتىن بىرلەسكەن ءوندىرىس ورىندارىن قۇرۋ جونىندەگى قازاقستان- بەلورۋسسيا ۇكىمەتارالىق كوميسسياسىنىڭ قۇرامىنا كىرگىزىلگەن-ءدى. بۇل ءوز ناتيجەسىن بەردى. بەلورۋسسيانىڭ “بوبرۋيسكاگروماش” اشىق اكتسيونەرلىك قوعامى شىعاراتىن  “پت-165” ءشوپ تايلاعىشتارى وسى سەرىكتەستىك بازاسىندا قۇراستىرىلاتىن بولدى. ءشوپ تايلاعىشتاردىڭ وسىندا قۇراستىرىلۋىنىڭ دا وزىندىك سەبەبى بار. مۇندا اۋىل شارۋاشىلىعى تەحنيكالارىن شىعارۋ مەن جوندەۋگە قوندىرعىلار, قۇرال-جابدىقتار جەتكىلىكتى, كاسىپورىندا مۇنداي جۇمىستاردى اتقاراتىن تاجىريبە دە, مامان كادرلار دا بار. بۇعان دەيىن سەرىكتەستىك “ك-700” تراكتورلارىن كۇردەلى جوندەۋمەن, اۋىل شارۋاشىلىعى تەحنيكالارىنىڭ كەيبىر قوسالقى بولشەكتەرىن شىعارۋمەن اينالىسىپ كەلگەن بولاتىن. ەندى مۇندا جاڭا جوبالار جۇزەگە اسىرىلا باستادى. العاشقى جەتكىزىلگەن سەگىز ءشوپ تايلاعىش قۇراستىرىلدى. قازىردىڭ وزىندە ون بەستەن استام تاپسىرىس ءتۇسىپ ۇلگەرىپتى. بولاشاقتا سەرىكتەستىكتە ءشوپ تايلاعىشتىڭ كەيبىر بولشەكتەرىن وزدەرى جاساپ, قازاقستاندىق ۇلەستى ارتتىرۋ كوزدەلۋدە. سونداي-اق, اۋىل شارۋاشىلىعىنا قاجەتتى  قۇرالدار, باسقا دا ونىمدەر شىعاراتىن جوبالاردى جۇزەگە اسىرۋ الداعى كۇندەردىڭ ەنشىسىندەگى شارۋا.سەرىكتەستىك باستاپقىدا وبلىستىڭ شارۋاشىلىق قۇرىلىمدارىنىڭ ءشوپ تايلاعىشقا دەگەن سۇرانىسىن قاناعاتتاندىرىپ, كەيىن ەلىمىزدىڭ وزگە وڭىرلەرىنە دە ونىمدەرىن وتكىزبەكشى. مۇنداي ءشوپ تايلاعىش قۇراستىراتىن كاسىپورىن ازىرگە قازاقستاندا بىرەۋ-اق. –وبلىستا ساۋىقتىرۋعا جاتقىزىلعان ءتورت كاسىپورىن بار. سونىڭ ىشىندە وسى سەرىكتەستىكتىڭ مۇمكىندىگى مول. قازىردىڭ وزىندە جالاقىعا بەرەشەك تولىق وتەلدى. باسقا تولەمدەر كەستەگە ساي وتەلۋدە. ءشوپ تايلاعىشتاردى سەرىكتەستىك بازاسىندا قۇراستىرۋ ءتيىمدى. دايىن ءشوپ تايلاعىش اكەلگەندە ۆاگونعا ءارى كەتسە تورتەۋى عانا سياتىن. ءبىر ءشوپ تايلاعىشتى جەتكىزۋ 560 مىڭ تەڭگە تۇرادى. ال, بولشەكتەپ جەتكىزگەندە جيىرما ءشوپ تايلاعىش اكەلۋگە بولادى. بۇل تاسىمالعا كەتەتىن قارجىنى ۇنەمدەۋگە مۇمكىندىك بەرەدى. سونداي-اق, سەرىكتەستىكتە بۇرىننان ەڭبەك ەتىپ كەلە جاتقان جۇمىسشىلاردى ۇستاۋعا دا ىقپال ەتەدى. بولاشاقتا ءشوپ تايلاعىشتاردىڭ كەيبىر بولشەكتەرىن وسى كاسىپورىندا جاساۋ دا ويلاستىرىلۋدا. ءبىر سوزبەن ايتقاندا, كاسىپورىننىڭ داعدارىس قۇرىعىنان قۇتىلىپ, اياعىنان قاز تۇرىپ كەتۋ مۇمكىندىگى بار, — دەيدى دارمەنسىز بورىشكەرلەرمەن جۇمىس كوميتەتى “باتىس” وڭىرارالىق دە­پارتامەنتىنىڭ باستىعى امانعوس دەربىسالين. ساتىبالدى ءساۋىرباي. اقتوبە وبلىسى.