تۇركى الەمى ورتالىعى اشىلدى

جەر الەمدى جاڭارتىپ, جاسارتىپ كەلگەن ۇلىستىڭ ۇلى كۇنى – ءاز-ناۋرىز مەيرامىنىڭ قارساڭىندا پرەزيدەنتتىك مادەنيەت ورتالىعىندا “تۇركى الەمى” ورتالىعى اشىلدى. ەلباسى ن.نازارباەۆ وتكەن جىلدىڭ قازان ايىندا ءازىربايجاننىڭ ناحيچەۆان قالاسىندا وتكەن تۇركى مەملەكەتتەرى اراسىنداعى ىنتىماقتاستىقتى ارتتىرۋ جونىندە ۇسىنىس ايتقانى بەلگىلى. سول ۇسىنىس تۇركى مەملەكەتتەرى باسشىلارىنان قولداۋ تاۋىپ, قازىرگى تاڭدا تۇركى مەملەكەتتەرى باسشىلارى كەڭەسى مەن تۇركى دۇنيەسى اقساقالدار كەڭەسى قۇرىلدى. تۇركى دۇنيەسى اكادەمياسىنىڭ استانادا ورنىعاتىنى جانە ءمالىم. ەجەلدەن باۋىرلاس حالىقتار ارا­سىن­داعى وسىنداي ءىستىڭ ەلورداداعى ۇيىتقىسىنداي “تۇركى الەمى” ورتالىعىنىڭ اشىلۋى بۇل باۋىر­لار­دىڭ مادەني, عىلىمي, رۋحاني جاعىنان جا­قىن­داۋىنا جول اشارى انىق. ورتالىقتىڭ اشىلۋ راسىمىندە ءسوز العان پرەزيدەنتتىك مادەنيەت ورتالىعىنىڭ ديرەكتورى مىرزاتاي جولداسبەكوۆ مۇنداي قادام مەملەكەتتەر اراسىنداعى دوستىقتى تەرەڭدەتىپ قانا قويماي, بىرلىكتە جۇمىس ىستەۋگە جول اشاتىنىن, يگىلىكتى شارا تۇركيا پرەمەر-ءمينيسترى جانىنداعى تۇركى حالىقارالىق ىنتىماقتاستىق جانە دامۋ اگەنتتىگىمەن ء(TىKA) بىرلەسۋ ناتيجەسىندە ورىندالىپ وتىرعانىن تىلگە تيەك ەتە كەلىپ, تۇركيا مەن قازاق ەلى ارا­سىنداعى تاريحي بايلانىسقا جان-جاقتى توقتالدى. زامان تالابىنا ساي جاراقتالعان وقۋ زالىنا عالامتورعا قوسىلعان 20 كومپيۋتەر قويىلىپتى. ەكى ەلدىڭ ارعى-بەرگى تاريحىنان مول دەرەك بەرەتىن كىتاپتار, كوركەم دۇنيەلەر, مەملەكەت باسشىلارىنىڭ ەڭبەكتەرى قويىلعان. بولاشاقتا تۇركيادان قازاق ەلىنىڭ ومىرىنە قاتىستى مىڭداعان كىتاپتار جەتكىزىلىپ, كىتاپحانالار عالامتور ارقىلى جالعاسىپ, ماعلۇمات الماسۋ جۇيەلى تۇردە جولعا قويىلماق. مۇنىڭ عالىمدار مەن ىزدەنۋشىلەرگە پايدالى بولاتىنى ايتپاسا دا تۇسىنىكتى. ورتالىقتىڭ اشىلۋ راسىمىندە تۇركيانىڭ قازاقستانداعى توتەنشە جانە وكىلەتتى ەلشىسى اتيللا گۇناي, سەناتور قۋانىش سۇلتانوۆ, ءTىKA-نىڭ قازاقستانداعى وكىلى ومەر قوجامەن “تۇركى الەمى” ورتالىعىنىڭ قازاق توپىراعىندا قۇتتى مەكەن بولاتىنىنا سەنىم ءبىلدىردى. جاقسى باستاما ودان كەيىن “ارمىسىڭ, ءاز-ناۋرىز!” اتتى تۇركى دۇنيەسىنىڭ كورمەسىنە ۇلاستى. سۇلەيمەن مامەت.