«ۇلتتىق بىرەگەيلىكتى ساقتاۋ: ۇلتتىق كود, ۇلتتىق مادەنيەت» تاقىرىبىنا وي تولعاتىپ, پىكىر تالاستىرعان سۋرەتشىلەر باس قوسۋى قىلقالاممەن ورىلگەن بەينەلەر كورمەسىنە ۇلاستى.
سيمپوزيۋمعا ءازىربايجان, رەسەي, تۇركيا, قىتاي, تاجىكستان, قىرعىزتان, وزبەكستان جانە رەسپۋبليكانىڭ باسقا دا ايماقتارىنان 25 سۋرەتشى قاتىستى. شارا اياسىندا قوناقتار وبلىس ورتالىعىنداعى كوركەمونەر گالەرەياسىنا, م.تىنىشپاەۆ اتىنداعى تاريحي-ولكەتانۋ مۋزەيىنە جانە ءى.جانسۇگىروۆ ادەبي مەموريالدىق مۋزەيىنە ەكسكۋرسيا جاسادى.
– ونەر – حالىق تاريحىنىڭ شەجىرەسى. ءسوز, اۋەن, قولونەر, بەينەلەۋ ونەرى ادام ءومىرىنىڭ سان عاسىرلىق تاريحىنان كوپتەگەن نارسە كورسەتىپ, الۋان ءتۇرلى سىر شەرتەدى. كەز كەلگەن قوعامنىڭ تاريحي دامۋى مەن وركەندەۋى سول ەلدىڭ ونەرى مەن مادەنيەتىنە تىكەلەي بايلانىستى. وعان دۇنيە جۇزىنە كەڭىنەن تانىمال, ءبىر توپ تۋىندىلارىمەن ءوز وتانىن الەمگە پاش ەتكەن لەوناردو دا ۆينچي, ميكەلاندجەلو, ءابىلحان قاستەەۆ, ورال تاڭسىقباەۆ, ايشا عالىمباەۆا سىندى تۇلعالاردىڭ تۋىندىلارى كۋا, – دەيدى وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى مارلەن كولباەۆ.
